Nou content pou donne nou-mem net dan service Jéhovah!
1 L’apotre Paul ti content pou ‘donne li-mem net’ pou li kapav participe bien dan so ministere. (2 Cor. 12:15) Zordi aussi pareil, beaucoup chrétien travail dur dan service pionnier. Lezot ki ena bann grand responsabilité familial organise zot program, ki pourtant bien lourd, pou al preché chaque semaine. Certain ki ena bann grave problem la santé donne l’energie ki zot kapav pou favorise bann l’interet Royaume Bondié. Li vrai-mem encourageant pou trouve bann serviteur Jéhovah donne tou seki zot kapav dan so service, n’importe ki l’age zot ena ek n’importe ki situation zot été!
2 L’amour pou nou prochain: Kan nou faire tou seki nou kapav pou servi Jéhovah, kan nou montré ki nou ena l’amour pou Bondié ek pou nou prochain, sa donne nou enn bon conscience. Paul ti consacré tou so la-vie pou participe dan predication la bonne nouvelle. A cause sa, li ti kapav dire avek beaucoup la-joie: “Mo prend zot couma temoin zordi-mem, ki mo pena di-sang personne lor mo la-tête.” (Actes 20:24, 26; 1 Thess. 2:8) Kan nou participe dan ministere autant ki nou situation permette nou, sa pou empeche nou ena enn dette di-sang lor nou la-tête.—Ézék. 3:18-21.
3 Kan nou travail dur pou aide lezot, sa faire nou gagne la joie. (Actes 20:35) Enn frere ti dire: “Kan mo rente kot moi tantot apré enn la-journée dan service Jéhovah, c’est vrai ki mo senti-moi fatigué. Mais mo content ek mo remercié Jéhovah ki Li finn donne moi enn la-joie ki personne pa kapav tiré.”
4 L’amour pou Bondié: Raison ki pli important pou nou donne nou-mem net dan service Jéhovah, c’est parski sa faire nou Papa ki dan le ciel plaisir. L’amour pou Bondié pousse nou pou suive so bann commandement, parmi ena l’ordre pou preché ek pou faire bann disciple. (1 Jean 5:3) Mem kan bann dimoune indifferent ou-soit zot opposé, nou contigne travail dur dan la joie pou Jéhovah.
5 Asterla, pa l’heure pou ralenti. Nou pé vive dan enn lepok kot pé faire recolte. (Mat. 9:37) Enn planteur souvent travail ziska tard pendant recolte, parski li ena tigit lé-temps pou ramasse bann recolte avant zot commence gaté. Le temps ki nou ena pou faire recolte spirituel, sa aussi li limité. Alors ki nou contigne mazinn lepok ki nou pé vive, anou contigne donne nou-mem net dan nou ministere.—Luc 13:24; 1 Cor. 7:29-31.