Eski ou pé tardé?

Tardé pou faire ki zaffaire? Pou rempli ou carte Pa mette di-sang (Advance Decision to Refuse Specified Medical Treatment) ki tou bann Témoin baptisé gagné. Parski ‘ou pa koné ki ou la-vie pou été demain,’ li bien important ki ou decidé a l’avance ki bann traitement ek methode medical ou pou accepté si jamais ou dan enn situation urgent ek ou ecrire sa. (Jacq. 4:14; Actes 15:28, 29) Pou aide ou dan sa domaine-la, finn faire enn video ki appel Soigner sans transfuser — Besoins et droits du patient. Guette li, ek apré, examine dan la priere seki ou finn aprann avek l’aide sa bann question ki ena ici-la.—Note: Parski ena bann boute kot montré bann scene l’operation, bann parent kapav decidé si zot pou laisse zot zenfant guette sa video-la ou-soit non.

(1) Kifer certain professionnel dan domaine medical pé demandé si li vrai-mem necessaire faire transfusion? (2) Donne trois l’exemple l’operation compliké ki kapav faire sans transfusion. (3) Comié docteur ek chirurgien dan le monde finn dire ki zot disposé pou traite bann malade sans transfusion? Kifer zot disposé pou faire sa? (4) Ki bann recherche ki’nn faire dan bann l’hopital montré concernant bann transfusion? (5) Ki bann risk ena kan faire transfusion? (6) Ki beaucoup specialiste inn decouvert lor bann l’avantage ki ena pou servi lezot traitement dan place transfusion? (7) Ki kapav faire enn dimoune gagne l’anemie? Ziska ki point enn dimoune kapav anemie sans ki sa vinn enn danger pou so la-vie? Ki kapav faire pou soigne li? (8) Ki kapav faire pou augmente production bann globule rouge dan lekor enn malade? (9) Ki bann technik pé servi pou perdi moins di-sang pendant enn l’operation? (10) Eski kapav servi bann lezot traitement ki efficace dan place transfusion pou bann ti zenfant, ou-soit kan la vie enn dimoune en danger? (11) Cite enn principe bien important ki bann docteur bizin prend en consideration kan zot donne bann soin medical. (12) Kifer li important ki bann chretien choisir en avance ki bann traitement zot pou accepté dan place faire transfusion? Couma nou kapav faire sa?

Chaque chretien pou decidé personnellement, en accord avek so conscience ki’nn formé par la Bible, si li pou accepté ou non certain traitement ki mentionné dan sa video-la. Eski ou finn prend enn decision bien precis concernant bann traitement ki ou disposé pou accepté pou ou-mem ek pou ou bann zenfant? Pou gagne plus renseignement lor la, guette “ Questions des lecteurs ” dan La Tour de Garde 15 juin 2004, ek 15 octobre 2000, ek lartik “Ki decision mo pou prend concernant bann fraction di-sang ek bann soin medical kot servi mo prop di-sang?” ki trouve dan supplement Ministère du Royaume novembre 2006. Ou bizin aussi faire bann dimoune ki’nn signe ou carte ek bann membre ou famille ki pa Témoin koné ki bann decision ou finn prend, ek kifer ou finn prend sa bann decision-la.