Enn jour special pou propose bann l’etude la Bible
1 A partir mois janvier, chaque congregation pou choisir enn week-end dan chaque mois, kitfois premier week-end, pou faire zeffort pou propose bann l’etude la Bible. Sa pou kapav enn samedi ou-soit enn dimanche, dapré seki pli bon pou congregation. Sa jour-la si bann dimoune refuse enn l’etude la Bible, bann proclamateur kapav toujours presente livre Ki la Bible enseigné? ou-soit bann dernier periodik. Tou bann ancien ek bann assistant ministeriel bizin organise-zot pou zot kapav participe autant ki possible dan sa l’activité-la ek aide bann proclamateur pou commence bann l’etude la Bible.
2 Comité service congregation pou guetté ki week-end zot pou reserve enn jour pou propose bann l’etude la Bible. Li bon ki regulierement faire bann rappel lor la pou ki bann proclamateur kapav prepare-zot ek faire enn zeffort special pou propose bann l’etude la Bible lakaz par lakaz ek kan zot retourne visite bann dimoune ki finn montré l’interet.
3 Couma pou preparé: Nou kapav trouve bann suggestion pou commence bann l’etude dan supplement Ministère du Royaume janvier 2006 ek dan livre Comment raisonner, page 12. Kitfois certain proclamateur pou choisir pou servi enn tract, couma par exemple Eski ou ti pou content konn la verité? Ena aussi lezot suggestion pou commence bann l’etude la Bible kan retourne visite bann dimoune ki finn prend bann periodik, dan Ministère du Royaume août 2007 en créole, page 3. Pou choisir bann ancien ek bann assistant ministeriel pou faire enn ti reunion predication, pendant 10-15 minute, kot zot pou kapav discute lor enn ou deux suggestion pratik pou commence bann l’etude la Bible ou-soit faire enn demonstration.
4 Bien sur, pa tou dimoune ki pou accepté enn l’etude la Bible ou-soit ki pou contigne etudié pendant longtemps. Mais fodé pa ki sa empeche nou pou offert bann l’etude, parski c’est Jéhovah ki pé attire bann dimoune ki couma bann brebis vers so l’organisation. (Jean 6:44) Nou responsabilité c’est pa zis pou seme bann la grain la verité, mais nou bizin aussi cultive ek arrose seki finn prend racine. Sa implik ki nou etudié la Bible avek bann dimoune ki disposé pou aprann konn Jéhovah. Kan nou faire sa, nou accepté privilege pou travail ensam avek Bondié.—1 Cor. 3:9.