Anou toujours pré pou offert enn l’etude la Bible

1. Ki sa impliké pou accompli mission ki Jésus inn donne nou dan Matthieu 28:19, 20?

¹ Jésus inn donne nou mission pou “faire bann disciple . . . , [ek pou] enseigne zot.” (Mat. 28:19, 20) Alors, nou envie toujours pré pou offert enn l’etude la Bible a chaque l’occasion, ek pa zis jour ki’nn reservé dan week-end-la. Bann suggestion ki pou suive kapav aide ou.

2. Kisannla nou kapav offert enn l’etude la Bible?

² Offert enn l’etude la Bible: Plus nou offert enn l’etude la Bible, plus nou pou gagne possibilité pou gagne enn l’etude. (Eccl. 11:6) Eski ou finn essaye methode direct pou offert enn l’etude la Bible? Enn congregation dan l’Amérique ti faire bann grand zeffort pou faire sa pendant enn mois full. Zot ti bien content pou commence 42 nouveau l’etude la Bible! Fodé pa ou pensé ki bann dimoune ki ou visité, deja koné ki ou disposé pou etudié la Bible avek zot. Prochaine fois ki ou retourné, kifer ou pa propose enn l’etude la Bible? Li pa enn probleme si zot refuse pou etudié. Ou kapav contigne developpe zot l’interet. Eski ou’nn demann ou bann voisin, bann famille, bann collegue travail, ek bann camarade lekol si zot envie etudié la Bible avek ou? Ou kapav aussi demann ou bann l’etude si zot ena bann camarade ou-soit bann famille ki ti pou content etudié la Bible.

3. Ki zouti bien pratik nou ena pou commence bann l’etude, ek kan nou kapav servi li?

³ Enn zouti bien pratik: Enn zouti ki bien pratik pou commence bann l’etude la Bible c’est tract Eski ou ti pou content konn la verité? Ou kapav donne sa tract-la bann dimoune, ki zot inn accepté lezot publication ou-soit non. Nou kapav servi sa pou preche dan bann territoire commercial, kan nou faire la voie publik, kan nou envoye bann lettre, ek kan nou faire bann nouvelle visite. Nou kapav aussi quitte enn kot bann absent. Kifer ou pa amenn deux-trois avek ou kan ou pé voyage dan bus, kan ou pé faire shopping, ek kan ou dan travail? Dernier page tract-la donne enn ti l’explication couma enn l’etude la Bible deroulé ek mentionne livre Ki la Bible enseigné?

4. Couma nou kapav servi tract Konn la verité? pou commence enn l’etude la Bible?

⁴ Apré ki ou’nn donne enn dimoune tract-la, ou kapav montré-li bann question ki ena lor premier page ek demann li: “Eski ena enn question ki plus interesse ou ladan?” Apré, guette ensam avek li reponse ki ena dan tract-la, ek lire ou-soit faire enn resumé seki ena lor dernier page, ki expliké couma enn l’etude la Bible deroulé. Ou kapav montré li ki coté dan livre Ki la Bible enseigné? ena plus renseignement lor sa sujet-la, offert li enn livre, ek faire bann l’arrangement pou retourné ek pou contigne conversation-la.

5. Kifer nou bizin toujours pré pou offert enn l’etude la Bible?

⁵ Dan nou territoire encore ena bann dimoune ki bien envie koné ki la Bible enseigné vrai-mem. Kan nou toujours pré pou offert enn l’etude la Bible, nou pou augmente l’occasion pou gagne la joie pou aide lezot marche lor chemin ki amenn vers la vie.—Mat. 7:13, 14.