Nu Ena enn Nuvo Zuti pu Kumans Bann Letid!
1 Enn Amerikenn ti Katolik Romin ziska liku. Li ti byin atase ar bann lanseynman legliz. Li ti mem fer enn pelrinaz pu al Vatikan. Purtan, kan enn Temwin Zeova finn tap so laport, li finn aksepte enn letid Labib. Kifer? Parski li ti anvi aprann seki Labib dir ek so legliz zame pa finn ofer li enn letid Labib kot li. Ki sa legzanp la anseyn nu? Ki nu zame kone kisannla kapav aksepte enn letid Labib.—Ekl. 11:6.
2 Eski u finn deza ezite pu dir bann dimunn ki nu dispoze pu etidye Labib avek ninport kisannla ki interese? Eski tu dimunn dan u landrwa kone ki nu ofer sa servis la gratis? Kuma eski nu kapav fer enn manyer ki zot konn sa? Par mwayin enn nuvo zuti! Enn trak sis paz ki byin atiran, ek so tem li, Eski U Ti Pu Kontan Konn Plis lor Labib? Anu fer plis konesans avek sa trak la, sutit par sutit.
3 “Kifer Bizin Lir Labib?” Bann rezon ki sa trak la done byin atiran. Li explike ki dan Labib ena “linstriksyon ki Bondye donn nu dan so lamur,” ek li montre kuma pu apros Li dan lapriyer pu rod so led ek kuma pu gayn don lavi pu tuletan. (1 Tes. 2:13) Sa trak la atir latansyon lor ‘laverite ki ena dan Labib ek ki ekler bann dimunn.’ Par egzanp li explike seki arive apre lamor ek kifer ena enn kantite problem lor later. Li explik byin “bann prinsip ki Bondye finn done dan Labib” ki fer nu tir profi lor plan fizik, fer nu gayn boner, lesperans, ek devlop bann lezot bon kalite ankor, si nu met zot an pratik dan nu lavi. Trak la montre enn lot rezon ankor kifer bizin lir Labib—so bann profesi ki anons lavenir ek ki montre seki pe atann nu devan.—Rev. 21:3, 4.
4 “Led pu Konpran Labib”: Trak la dir: “Nu tu nu bizin led pu konpran Parol Bondye.” Apre sa, li explik metod ki nu servi pu etidye Labib: “Normalman li preferab etidye Labib tigit par tigit, u kapav kumans par bann lanseynman prinsipal.” Trak la montre klerman ki “Labib li mem nu lotorite,” ek li mansyonn sirtu brosir Ki Bondye Pe Demann Nu? kuma enn kitsoz ki pu ed etidyan la “pu konpran bann referans Labib lor diferan size.” Prosin sutit poz enn kestyon byin interesan.
5 “Eski U Dispoze pu Pas Letan Sak Semenn pu Konpran Labib?” Trak la explike ki kapav fer letid Labib dan ninport ki moman ek dan ninport ki plas ki aranz etidyan la, swa kot limem uswa par telefonn. Kisannla ki kapav partisip dan sa letid la? Trak la reponn: “Tu u fami. Ninport ki kamarad ki u anvi invite kapav usi partisipe. Uswa si u prefere, kapav fer letid ar u tusel.” Komye letan enn letid bizin dire? Li explike: “Buku rezerv enertan sak semenn pu etidye Labib. Si u kapav pas plis letan uswa u pena ase letan tulesemenn, bann Temwin pu dispoze pu ed u.” Sa li enn pwin inportan! Wi, nu pre pu adapte nu ar sityasyon sak etidyan.
6 “Enn Linvitasyon pu Aprann”: Ena enn kupon alafin sa trak la, ki sak dimunn kapav ranpli si li swete gayn brosir Ki Bondye Pe Demann Nu? uswa enn vizit ki pu explik li nu program letid Labib gratis. Kapav truv kuvertir brosir Ki Bondye Pe Demann Nu? an kuler lor sa paz la. Eski u pa truve ki sa trak la pu ankuraz plis dimunn sinser pu aksepte nu led? Asterla, kuma eski nu kapav servi sa nuvo zuti la pli byin?
7 Ar Kisannla U Kapav Prezant Sa Trak La? U kapav les sa trak la ar bann dimunn ki u zwenn, uswa kot bann absan. U kapav prezant li dan predikasyon lakaz-lakaz, lor lari, ek dan bann plas komers. Ofer li ar tu dimunn, ki zot aksepte nu piblikasyon uswa non. Met li dan bann peryodik uswa bann lezot piblikasyon ki u plase. Met li ansam avek bann let ki u ekrir. Propoz pu avoy li tu dimunn ki u kontakte par telefonn. Pran tuzur sa bann trak la ar u kan u al fer shopping, kan u vwayaze dan transpor piblik, ek kan u donn temwaynaz okazyonel. Donn li ninport ki dimunn ki vinn kot u. Ofer li u bann fami, u bann vwazin, u bann kamarad travay, u bann kamarad lekol, ek bann lezot konesans ankor. Fer zefor pu met sa trak la dan lamin tu dimunn u zwenn! Apre sa?
8 Si Gayn Rezilta Deswit: Ena dimunn pu reazir deswit, zot pu dir ki zot ti pu kontan gayn enn letid Labib. Alor, sak fwa u al predikasyon, fer enn manyer ki u tuzur ena de kopi brosir Ki Bondye Pe Demann Nu?—enn pu etidyan la ek enn pu u mem. Si dimunn la dispoze, kumans letid la anplas-anplas. Uver dezyem paz brosir la, ek lir parti “Kuma Servi Sa Brosir La.” Apre sa, kumans direkteman leson 1, ek montre kuma letid la derule. Pena nanyin pli fasil ki sa, pa vre?
9 Si Dimunn La Bizin Letan pu Reflesi: Pa les tro buku letan pase pu zwenn dimunn la ankor enn fwa. Kan u fer sa, fer enn manyer ki u ena brosir Ki Bondye Pe Demann Nu? avek u. Montre dimunn la dezyem paz kot ena lalis bann leson dan brosir la. Les li swazir size ki pli interes li. Uver brosir la dan leson ki li finn swazire, ek kumans egzaminn size la.
10 Swiv Lintere Kan U Plas Bann Peryodik: Si u finn les trak la ansam avek detrwa peryodik, u kapav returne ek dir dimunn la: “Dernye fwa kan mo ti pase, mo ti les u enn kopi magazinn La Tour de Garde. Kitfwa u finn remarke ki tit sa zurnal la an antye li: La Tour de Garde annonce le Royaume de Jéhovah. Zordi mo ti pu kontan explik u ki ete sa Rwayom la ek ki li pu vedir pu u ek pu u fami.” Apre sa, uver brosir Ki Bondye Pe Demann Nu? dan leson 6. Kumans avek premye paragraf, lir ek egzaminn sa size la dapre letan ki dimunn la ena. Apre sa, fer bann laranzman pu returne enn lot zur pu fini leson la.
11 Fode Ki Sa Bann Trak La Zame Manke: Sirveyan servis ek bann frer ki okip piblikasyon pu fer enn manyer pu gard tuletan enn bon kantite sa trak Konn Labib la dan stok kongregasyon. Gard detrwa dan u pos uswa dan u portfey, dan u loto, kot u travay, dan lekol, pre kot u laport lantre—partu kot dimunn kapav gayn li. Byinsir, amenn detrwa dan u sak predikasyon, anka u zwenn enn kikenn avek ki u kapav gayn enn konversasyon lor Labib.
12 Ki Zeova Beni Nu Bann Zefor: Tu bann Kretyin ena sa bon lobzektif pu anseyn laverite ar enn lot dimunn. (Mat. 28:19, 20) Eski u deza pe diriz enn letid Labib? Si wi, eski u kapav truv letan dan u program lasemenn pu fer enn lot letid? Si u pena letid, sirman u ti pu kontan gayn enn. Priye Zeova pu beni bann zefor ki u pe fer pu truv enn kikenn ar ki u kapav fer letid. Lerla, fer zefor an akor avek u bann lapriyer.—1 Zan 5:14, 15.
13 Wi, nu ena enn nuvo zuti pu kumans bann letid! Abitye u byin ar li. Ofer li tu dimunn. Fer tu u posib “pu fer dibyin, pu vinn ris dan bann bon travay, pu vinn bonker, ek pre pu partaz” seki u finn aprann lor Parol Bondye.—1 Tim. 6:18.
[Lankadre lor paz 4]
BANN LOKAZYON PU PREZANT SA TRAK LA
◼ Dan bann konversasyon tulezur
◼ Kan enn kikenn aksepte nu piblikasyon
◼ Kan bann dimunn pa kot zot
◼ Kan nu fer bann vizit
◼ Kan nu donn temwaynaz lor lari
◼ Kan nu donn temwaynaz dan bann plas komers
◼ Kan nu donn temwaynaz okazyonel
◼ Kan nu ekrir bann let
◼ Kan nu vwayaz dan transpor piblik
◼ Kan enn kikenn vinn kot nu
◼ Kan nu koz avek nu bann fami, nu bann vwazin, nu bann kamarad travay, nu kamarad lekol, ek nu bann lezot konesans.