Campagne special pou distribué enn tract le 20 octobre ziska le 16 novembre!
1 A partir lundi 20 octobre ek pendant quatre semaine, nou pou participe dan enn campagne special pou distribué enn nouveau tract ki ena theme Eski ou ti pou content konn la verité? Nou esperé ki sa campagne special ki pou faire partout lor la terre-la pou faire bann dimoune plus interessé ar sel la source la verité ki ena.—Jean 17:17.
2 Sa tract-la donne bann reponse clair lor six question biblik important: “Eski Bondié vrai-mem interessé ar nou?” “Eski la guerre ek souffrance pou arreté enn jour?” “Ki arrive nou kan nou mort?” “Eski ena kit l’espoir pou bann dimoune mort?” “Couma mo kapav prié pou ki Bondié ecoute moi?” ek “Couma mo kapav trouve vrai bonheur?” Bann religion la chretienté jamais pa finn donne bann bon reponse pou sa bann question-la. Mem beaucoup dimoune ki pa chretien finn pose-zot sa bann question-la, mais li possible ki zot pa koné ki la Bible reponn sa bann question-la dan enn fason clair. Alors nou esperé ki sa message-la pou attire l’attention beaucoup dimoune.
3 Couvert ou territoire: Faire tou seki ou kapav pou couvert tou ou territoire autant ki possible dan predication porte en porte. Si ou ena enn grand territoire, bann ancien kapav encourage ou pou laisse enn tract kot bann absent. Pa blié donne enn tract ou bann voisin, ou bann famille, ou bann collegue travail, ou-soit ou bann camarade lekol, ek lezot dimoune avek ki ou habitué kozé regulierement. Kitfois ou kapav arrange ou programme pou faire pionnier auxiliaire pendant mois octobre ou-soit novembre. Eski ou ena enn zenfant ou-soit enn etudiant ki pé progressé spirituellement ek ki kapav rempli bann condition pou joinde nou dan sa campagne-la en tant ki enn proclamateur non-baptisé? Dan sa cas-la, informe bann ancien.
4 Ki pou dire? Pou ki nou partage nou message avek plus dimoune, li pli bon ki nou faire enn presentation courte. Ou kapav zis pose bann dimoune enn parmi sa six question ki ena lor premier page tract-la, ek montré zot so reponse dan tract-la. Sa pou permette bann proclamateur pou adapté zot presentation dapré bann besoin ki ena dan territoire. Prend note si enn dimoune montré l’interet, ek revinn visite li. Dan week-end ou kapav offert bann nouveau magazine ensam avek tract-la. Kan campagne-la fini le 16 novembre, nou pou offert livre Ki la Bible enseigné? Si ena tract ki resté, kapav servi zot couma n’importe ki lezot tract.
5 Commence enn l’etude la Bible: Sa tract-la inn faire surtout pou aide nou commence bann l’etude la Bible. Kan ou revisite enn dimoune ki’nn montré l’interet, ou kapav demann li ki l’enseignement ki ena dan la Bible finn reconforte li ek finn soulage li. Montré li dernier page ki koz lor l’etude la Bible, ek donne li livre Ki la Bible enseigné? Si li possible, examine pou enn ti moment enn ou deux paragraphe dan chapitre ki donne plus renseignement lor sujet ki li finn choisir.
6 Jéhovah pé rod bann ki pou adore Li “avek l’esprit ek la verité.” (Jean 4:23) Anou faire enn zeffort pou ki nou tou participe dan sa campagne special-la pou aide lezot konn la verité-la!