Servi Bann Tract pou Partage la Bonne Nouvelle
1. Couma bann serviteur Bondié finn servi bann tract?
1 Sa faire longtemps ki bann serviteur Jéhovah servi bann tract Biblik pou partage la bonne nouvelle. En 1880, C. T. Russell ek so bann associé ti commence produire Tract Bann Etudiant La Bible (en anglais), ek zot ti donne sa bann dimoune ki ti lire La Tour de Garde pou ki zot partage sa avek lezot. Bann tract ti vrai-mem important. Kifer nou dire sa? En 1884, kan C. T. Russell ti enregistré enn societé legal ki pa faire profit pou favorise l’interet Royaume Bondié, li ti faire mette mot “tract” dan sa nom-la, Zion’s Watch Tower Tract Society. Azordi, appel sa societé-la Watch Tower Bible and Tract Society of Pennsylvania. Depuis ki zot ti commence servi tract ziska 1918, bann Etudiant La Bible ti’nn partage plus ki 300 million tract. Bann tract encore toujours bann zouti bien efficace pou rann temoignage.
2. Kifer bann tract efficace?
2 Kifer Zot Efficace: Bann tract bien coloré ek attire l’attention. Message precis ki ena ladan capté l’attention ek bien instructif. Sa interesse bann dimoune ki kitfois hesité kan offert zot enn magazine ou-soit enn livre. Li facile pou offert bann tract, mem pou bann nouveau proclamateur ek bann zenfant. En plus, bann tract tipti ek bien facile pou sarié zot.
3. Raconte enn fait personnel ou-soit ki mentionné dan bann publication pou montré valeur ki bann tract ena.
3 Beaucoup finn tann koz la verité grace a enn tract. Par exemple, enn madame dan Haïti ti trouve enn nou bann tract lor chemin. Li ti ramasse li, li ti lire li, ek ti dire: “Mo finn trouve la verité!” Alors, li’nn al dan enn La Salle du Royaume, inn commence etudié, ek inn prend bapteme—tousala a cause message bien puissant Parole Bondié ki ti ena dan enn tract.
4. Ki pou nou l’objectif pendant bann mois ki pou offert bann tract?
4 Lakaz-Lakaz: Parski bann tract enn zouti bien efficace pou rann temoignage, a partir Novembre, temps en temps nou pou offert bann tract couma l’offre du mois. Nou l’objectif c’est pa zis quitte bann tract mais servi sa bann tract-la pou commence bann conversation. Si dimoune-la montré l’interet premier fois ki nou zwenn li ou-soit kan nou ré-visite li, nou kapav montré li couma enn l’etude La Bible deroulé dan livre Ki la Bible enseigné? ou-soit dan enn lot publication ki servi pou faire l’etude. Couma nou kapav offert bann tract kan nou pé preché lakaz-lakaz? Chaque tract different, alors nou bizin konn bien bann tract ki nou pou offert.
5. Couma nou kapav offert bann tract lakaz-lakaz?
5 Nou bizin adapté nou presentation ar territoire ek avek tract ki nou pou servi. Nou kapav commence enn conversation kan nou donne dimoune-la enn tract. So couverture ki bien attirant kapav interesse dimoune-la. Ou-soit nou kapav montré li plusieurs tract ek laisse li choisir seki interesse li. Kan nou preche dan bann territoire kot bann dimoune hesité pou ouvert la porte, nou kapav tini tract-la dan enn fason ki li pou trouve so couverture, ou-soit demandé si nou kapav glisse li enba la porte pou ki nou koné ki li pensé lor tract-la. Si titre tract-la enn question, nou kapav demann dimoune-la ki li pensé lor sa question-la. Ou-soit nou-mem nou kapav pose enn question ki pou interesse dimoune-la ek encourage li pou faire enn conversation. Lerla, nou kapav lire enn partie dan tract-la, faire enn pause kot ena bann question ek invite dimoune-la pou dire seki li pensée. Kapav lire bann verset important dan La Bible. Kan nou’nn fini examine enn partie dan tract-la, nou kapav termine nou conversation ek faire bann l’arrangement pou ré-visite li. Si dan territoire habitué quitte bann publication kot bann dimoune ki pa la, nou kapav quitte enn tract dan enn place kot lezot dimoune ki passé pa pou trouvé.
6. Couma kapav servi bann tract dan la voie publik?
6 La Voie Publik: Eski ou’nn deja servi bann tract dan la voie publik? Certain dimoune pressé ek zot pena tendance pou arreté pou koz avek nou. Kitfois li difficile pou koné si zot vrai-mem interessé. Au lieu ki nou donne zot bann dernier magazine sans ki nou koné si zot pou lire li ou-soit non, kifer nou pa donne zot enn tract? Parski couverture-la attirant ek message-la li courte, kitfois zot curiosité kapav pousse zot pou lire tract-la kan zot gagne deux-trois minute. Bien sur, si zot pa pressé, nou kapav koz avek zot lor certain point ki ena dan tract-la.
7. Raconte bann fait pou montré couma pou servi bann tract pou faire temoignage informel.
7 Temoignage Informel: Li facile pou faire temoignage informel avek bann tract. Enn frere mette deux-trois tract dan so poche a chaque fois ki li sorti. Kan li zwenn enn dimoune, par exemple enn vendeur, li zis propose pou donne dimoune-la enn kitsoz pou lire ek donne li tract-la. Kan enn couple ti al visite la ville New York, zot ti realisé ki zot ti pou zwenn beaucoup dimoune ki sorti dan different pays. Alors, zot ti prend avek zot brochure Une bonne nouvelle pour des gens de toutes nations ek plusieurs tract dan bann different langue. Lerla, kan zot ti tann enn dimoune ki koz enn lot langue pé vann kitsoz lor trottoir ou-soit ki pé assize a coté zot dan jardin ou-soit dan restaurant, zot ti donne dimoune-la enn tract dan langue ki li kozé.
8. Couma eski bann tract pareil couma bann la grain?
8 “Seme To Bann La Grain”: Kapav compare bann tract ar bann la grain. Enn planteur fann beaucoup la grain parski li pa koné lekel pou germé ek poussé. Ecclésiaste 11:6 dire: “Dan gramatin, seme to bann la grain ek ziska a-soir pa laisse to la main reposé; parski to pa koné ki coté sa pou reussi, ici ou-soit la, ou-soit si toulé-deux pou bon pareil.” Alors, anou “contigne seme la connaissance” a travers sa zouti bien efficace pou rann temoignage-la.—Prov. 15:7.
[L’encadré, page 3]
Parski bann tract enn zouti bien efficace pou rann temoignage, a partir Novembre, temps en temps nou pou offert bann tract couma l’offre du mois.