Enn Nouvo Look pou Bann Trak!
1. Ki bann nouvo zouti nou pou kapav servi dan predikasion?
1 Pandan Lasanble Distrik 2013, “Parol Bondie Li Laverite!” nou ti gagn sink nouvo trak. Anplis, nou’nn fek gagn Nouvel lor Rwayom No. 38, “Eski Vremem Bann Ki’nn Mor Kapav Reviv?” ki’nn azoute avek sa bann trak-la. Toule sis trak ena enn nouvo look. Pou ki rezon nou bann trak finn sanze koumsa? Kan nou pe prezant sa lakaz par lakaz, kouma nou kapav servi bann nouvo karakteristik sa bann trak-la?
2. Kifer eski bann trak finn gagn enn nouvo look?
2 Kifer enn Nouvo Look?: Sa kat letap-la ed nou pou fer enn prezantasion efikas kan nou prese lakaz par lakaz: (1) Pou koumans enn konversasion, poz dimounn-la enn kestion pou kone ki li panse lor enn sertin size. (2) Partaz enn panse Labib. (3) Propoz li enn piblikasion pou lir. (4) Poz li enn kestion ek fer laranzman pou retourne pou reponn sa kestion-la. Gras-a nouvo look sa bann trak-la, nou pou pli kapav swiv sa bann letap-la.
3. Kouma to kapav ofer sa bann trak-la dan predikasion?
3 Kouma pou Servi Zot: (1) Apre ki to’nn dir bonzour, montre dimounn-la kestion ki ena lor sa trak-la ek diferan repons ki ena anba, ek demann li ki li panse. (2) Ouver trak-la ek examinn “Seki Labib Dir.” Si sitiasion permet, lir enn verse direk dan to Labib ek si dimounn-la ena letan, examinn “Ki Bienfe Ou pou Gagne?” (3) Donn li trak-la, ek ankouraz li pou lir leres kan li kapav. (4) Avan to ale, montre li kestion ki trouv lor dernie paz anba soutit “Reflesi lor la.” Fer laranzman pou retourne ek reponn sa kestion-la prosenn fwa.
4. Kouma nou kapav servi bann nouvo trak kan nou pe fer enn vizit?
4 Li bien fasil pou fer bann vizit osi avek sa trak-la. To kapav zis servi bann verse Labib ki site lor dernie paz pou reponn kestion ki to ti poze dernie fwa. Lor dernie paz ena enn zimaz brosir Bon Nouvel. Avan to ale, atir so latansion lor la ek montre li brosir-la. Montre li leson ki mansione lor sa trak-la ek donn li enn brosir. Si li aksepte, fer laranzman pou retourne ek examinn brosir-la. To’nn koumans enn letid Labib! Ouswa, olie ki to donn li brosir-la, to kapav donn li enn lot trak ek fer laranzman pou retourne pou koz lor la.
5. Ki linportans bann trak ena dan predikasion?
5 Sa fer plis ki 130 an depi ki nou pe servi bann trak dan predikasion. Mem si zot groser ek look inn sanze, zot inn touletan enn zouti ki bien efikas dan predikasion. Alor, anou servi bien sa bann nouvo trak-la pou fer bann dimounn partou lor later gagn enn konesans lor Labib.—Prov. 15:7a.