Kouma Nou Kapav Servi Bann Trak Pou Koumans Bann Konversasion?

Depi Zanvie 2018, ena bann model konversasion lor premie paz Kaye Renion Lavi Kretien ek Minister. Lesklav fidel ek saz ti ankouraz nou pou konsantre plis lor gagn enn konversasion avek bann dimounn, olie ki nou zis prezant enn piblikasion. Pou ed bann proklamater fer sa, bann video model konversasion ti montre nou kouma nou kapav koumans enn konversasion zis avek Labib. Me, sa pa vedir ki fode pa nou servi bann piblikasion kan nou prese lakaz-lakaz! Par exanp, bann trak zot enn bon zouti pou koumans enn konversasion. Nou kapav servi sa metod-la avek ninport ki trak:

1. Lir kestion ek bann diferan repons ki ena lor premie paz.

2. Servi verse ki ena lao lor paz 2 pou montre repons ki Labib done. Si letan permet, lir ek koz lor sertin pwin ki ena dan trak-la.

3. Donn trak-la dimounn-la, ek ankouraz li pou lir leres kan li kapav.

4. Avan to ale, montre li kestion ki trouv lor dernie paz anba soutit “Reflesi lor La,” ek fer laranzman pou retourne ek montre li repons ki Labib done.

Kan to retourne, koz lor repons ki Labib done, ek poz enn lot kestion pou prosin vizit. To kapav servi enn kestion ki ena lor nou sit ouswa ki ena dan enn piblikasion ki mansione lor dernie paz. Swazir bon moman pou prezant brosir Enn Bon Nouvel ki Sorti kot Bondie! ouswa enn lot piblikasion ki servi pou fer letid ki trouv dan nou Kes Zouti pou Ansegne.