Enseigne dan enn fason simple
1. Cite enn kitsoz important pou nou kapav enseigne dan enn fason clair, ek efficace.
1 Pou nou efficace, li bien important ki nou simple kan nou enseigne bann dimoune. Kan nou examine fason ki nou Grand Enseignant, Jésus, ti enseigné sa kapav aide nou pou ameliore nou “l’art pou enseigné.”—2 Tim. 4:2; Jean 13:13.
2. (a) Ki l’effet enn l’enseignement simple kapav ena? (b) Couma nou kapav enseigné dan enn fason simple?
2 Enn langage simple: Dan Sermon lor montagne, ena bann verité bien profond ki jamais okenn lot dimoune inn dire, ek tousala finn dire avek bann mot simple. (Mat. chap. 5-7) Bann la foule ki ti pé ecoute Jésus ti “impressionné par so fason enseigné.” Kan ti envoye bann officier pou arrete Jésus, zot ti tellement touché par so bann parole, ki zot ti dire: “Jamais enn lot zom pa finn koz coumsa.” (Mat. 7:28, 29; Jean 7:46) Nou pa bizin bann bel-bel mot, bann phrase compliké, ou-soit bann l’exemple bien detaillé pou convaink bann dimoune. Nou kapav explik la verité dan enn fason clair kan nou servi bann mot ki zot habitué tendé.
3. (a) Couma nou kapav evite tendance pou noye bann dimoune avek nou l’enseignement? (b) Kifer certain ena sa tendance-la?
3 Dire zis seki bizin: Jésus ti mazinn so l’auditoire pou li koné ki quantité kitsoz ki li pou dire zot. (Jean 16:12) Nou bizin observé ek adapté-nou ar besoin bann dimoune avek ki nou pé kozé, surtout kan nou pé rann temoignage ar nou famille, bann nouveau ki interessé avek la verité, ou-soit bann zenfant. C’est pa parski zot parette pé bien ecouté ki nou bizin noye zot ar nou bann l’enseignement. Bann ki ena leker sincere pou contigné aprann konn vrai Bondié, Jéhovah, tigit par tigit.—Jean 17:3; 1 Cor. 3:6.
4. Kifer li bon ki nou concentré lor bann point important au lieu ki lor bann detail?
4 Mette l’accent lor bann point important: Jésus pa ti faire so l’enseignement vinn compliké avek trop beaucoup detail. Kan li ti dire: “Tou seki dan tombe souvenir . . . pou sorti,” pa ti encore ler pou ki Jésus donne enn quantité l’information lor deux qualité ressurection ki ti pou ena. (Jean 5:28, 29) Kan nou pé conduire bann l’etude la Bible, nou bizin concentré-nou lor bann point ki pli important ek resisté ar tendance pou ajoute bann sujet ki pa necessaire ek ki pena dan livre.
5. Ki bienfait nou kapav gagné si nou enseigne dan enn fason simple?
5 Nou vrai-mem reconnaissant ki Jéhovah finn enseigne-nou tou seki nou bizin koné dan enn fason simple! (Mat. 11:25) Anou faire zeffort pou enseigne dan enn fason simple ek nou pou ena la joie pou gagne bann bon resultat dan nou ministere.