Trois conseil pou ameliore ou fason enseigné
1. Kifer nou bizin faire zeffort pou ameliore nou fason enseigné?
1 Tou bann proclamateur zot bann enseignant. Ki nou pé zwenn enn dimoune premier fois dan predication, ki nou pé faire enn nouvelle visite, ou-soit nou pé conduire enn l’etude la Bible, nou pé transmette bann l’information. Ek seki nou ena pou enseigne zot, c’est enn kitsoz bien special. Nou pé donne zot bann l’eclaircissement lor “bann l’ecriture sacré,” ki kapav faire zot vinn “sage pou [zot] gagne la vie sauve.” (2 Tim. 3:15) C’est vrai-mem enn grand privilege! Anou guette trois conseil ki kapav aide nou pou ameliore nou fason enseigné.
2. Couma nou kapav enseigne dan enn fason simple?
2 Enseigné dan enn fason simple: Kan nou bien konn enn sujet, li bien facile pou blié ki pou enn dimoune ki pa konn nanyin lor la, sa bann l’information-la kapav parette compliké. Alors, kan ou pé conduire enn l’etude la Bible, pa ajoute enn quantité detail inutile. Au contraire, mette l’accent lor bann point principal. Pou ki enn dimoune enseigne bien, li pa obligé koz beaucoup. (Prov. 10:19) En general, li pli bon ki nou lire bann verset principal. Apré ki’nn lire verset-la, attire l’attention lor partie ki ena enn lien avek sujet ki pé discuté. Dan Sermon lor montagne, ki trouve dan Matthieu chapitre 5 ziska 7, ena bann verité bien profond, pourtant Jésus ti enseigne dan enn fason simple ek ti servi zis enn tigit mot ki li ti bien choisiré.
3. (a) Kifer bann l’exemple ek bann zimage zot important? (b) Ki qualité l’exemple ek zimage ki pli bon?
3 Bann l’exemple ek bann zimage: Bann l’exemple pousse bann dimoune pou reflechi, touche bann sentiment, ek li aide zot pou rappel. Fodé pa ou pensé ki ou bizin enn fouette lor raconte bann zistoire pou ki ou kapav trouve bann bon l’exemple. Souvent Jésus ti servi bann ti illustration ki pa compliké. (Mat. 7:3-5; 18:2-4) Bann ti dessin bien simple ki ou faire lor enn boute papier kapav bien utile. Si ou prepare-ou bien, ou pou kapav trouve bann l’exemple bien efficace.
4. Couma nou kapav servi bann question dan enn fason efficace?
4 Bann question: Bann question encourage ou etudiant pou reflechi. Alors, apré ki ou’nn pose enn question, ou bizin ena patience. Si desuite ou donne reponse-la ou-mem, ou pa pou koné ki ou etudiant inn comprend vrai-mem. Si li donne enn mauvais reponse, au lieu ki ou corrige li, li pli bon ki ou amenn li tire enn bon conclusion kan ou pose lezot question. (Mat. 17:24-27) Bien sur, personne parmi nou pa bann enseignant parfait. Alors, la Bible encourage nou pou faire bien attention ar fason ki nou enseigné. Kan nou faire sa, sa pou permette nou ek bann dimoune ki ecoute nou gagne bann benediction pou touletan.—1 Tim. 4:16.