Nou priorité
1. Couma Jésus ti montré ki so ministere ti important pou li?
1 Jésus ti donne priorité so ministere. Li ti travail bien dur, li ti marche plusieurs centaine kilometre dan Palestine pou preche avek maximum dimoune. Li ti garde enn la vie simple pou ki li kapav consacré plus le temps ek l’attention ar so ministere. (Mat. 8:20) Kan bann la foule ti essaye retenir li pou ki li gueri zot bann malade, li ti dire: “Mo bizin annonce la bonne nouvelle lor royaume Bondié dan bann lezot la ville aussi, parski c’est a cause sa ki finn envoye moi.” —Luc 4:43.
2. Kifer Jésus ti donne sa quantité l’importance-la so ministere?
2 Kifer Jésus ti donne sa quantité l’importance-la so ministere? Seki ti pli important pou li c’est sanctification nom Jéhovah. (Mat. 6:9) Li ti content so Papa ki dan le ciel ek a cause sa l’amour-la, li ti envie faire So volonté ek obeir tou So commandement. (Jean 14:31) En plus, li ti vrai-mem prend compte bann dimoune ek li ti envie aide zot.—Mat. 9:36, 37.
3. Couma nou kapav montré ki nou ministere li nou priorité?
3 Imite Jésus: Faire ki nou ministere reste nou priorité couma Jésus kapav difficile, parski le monde prend beaucoup nou le temps ek offert beaucoup distraction. (Mat. 24:37-39; Luc 21:34) Alors, nou bizin verifié bann kitsoz ki pli important, reserve le temps pou prepare ek pou participe dan travail predication regulierement. (Phil. 1:10) Nou faire tou pou garde enn la vie simple ek evite profite tou seki ena dan le monde.—1 Cor. 7:31.
4. Kifer li bien important ki nou garde enn bon priorité depuis aster-la mem?
4 Kan pena beaucoup le temps, enn dimoune ki sage faire seki pli important avant. Si, par exemple, li aprann ki enn grand tempete pé vini, li pou consacré so le temps ek donne tou so la force pou mette so famille en securité ek li pou averti so bann voisin. Bann activité ki moins important pou attann. Le temps ki resté avant ki tempete Har-Maguédôn vini, bien courte. (Tseph. 1:14-16; 1 Cor. 7:29) Pou ki nou sauve nou-mem ek bann ki ecoute nou, nou bizin contigne veille bien lor nou-mem ek nou l’enseignement, ki li dan congregation ou en dehors. (1 Tim. 4:16) Oui, pou nou sapé li bien important ki nou ministere reste nou priorité!