Ki U Priyorite?
1 Buku relizyon met lanfaz lor bann aksyon saritab. Par egzanp, zot ranz bann lekol uswa bann lopital, ubyin zot donn bann fon neseser pu sa. Byinsir, bann Temwin Zeova usi kone ki zot bizin “fer dibyin ek partaz avek lezot.” (Ebre 13:16) Selman, seki kont plis pu zot se ed bann dimunn lor plan spirityel.
2 Model Premye Syek: Pandan so minister lor later, Zezi ti fer buku bon travay. Me, ki ti so travay prinsipal? Donn temwaynaz lor laverite. (Lik 4:43; Zan 18:37; Akt 10:38) Ala kifer, li ti donn so bann disip lord pu “ale ek fer bann dimunn dan tu bann nasyon vinn bann disip, . . . ek anseyn zot.” (Mat. 28:19, 20) Zezi ti kumans sa travay la. Li ti montre usi ki bann ki ena lafwa an li ti pu fer sa travay la ankor plis ki seki li, li’nn akonpli. (Zan 14:12) Wi, Zezi ti donn priyorite travay predikasyon, parski sa ed bann dimunn pu aprann semin ki amenn ver lavi.—Zan 17:3.
3 Lapot Pol ti konsider so laktivite predikasyon kuma enn “nesesite,” enn lobligasyon ki li pa ti pu kapav inyore. (1 Kor. 9:16, 17) Li ti dispoze pu fer ninport ki sakrifis, pu siport ninport ki leprev uswa sufrans, pu li akonpli so minister. (Akt 20:22-24) Lapot Pyer ek so bann konpaynon, ti ena sa mem latitid la. Malgre ki zot ti fer prizon ek zot ti gayn bate, “zot finn kontiyn anseyne ek anons labonn nuvel konsernan Kris Zezi, san arete.”—Akt 5:40-42.
4 Ek nu? Eski proklam Rwayom Bondye ek fer bann disip, li enn priyorite pu nu? Eski nu’si, parey kuma Zezi, nu anvi ed bann dimunn ki ‘ranpli ar stres ek ki fane inpe partu parey bann muton ki pena berze’? (Mat. 9:36) Seki pe arive dan lemond ek bann profesi Labib montre klerman ki lafin sa lemond la byin-byin pre! Si tuletan nu fixe nu lespri lor linportans travay predikasyon, sa pu pus nu pu kontiyn prese avek tu nu leker.
5 Egzaminn U Sityasyon: Sityasyon enn dimunn kapav sanze dan ninport ki moman. Akoz sa, li bon ki detanzantan nu egzaminn nu sityasyon pu gete si nu kapav fer plis dan travay predikasyon. Enn ser ti fer pyonye permanan dan bann lane ant 1950 ek 1970. Me apre, li’nn oblize aret so servis akoz bann problem lasante. Me, avek letan, so lasante inn amelyore. Ek fek la, li’nn egzaminn so sityasyon ankor enn fwa, li’nn deside pu repran so servis. Nu pa kapav imazinn so lazwa kan li finn kapav asiste Lekol Pyonye, laz 90 an! Ek u? Eski u enn kikenn ki pre pu pran retret uswa ki pre pu fini lekol? Eski sa sanzman sityasyon la kapav permet u fer pyonye?
6 Enn fwa, Zezi ti remarke ki Mart “ti okipe ar enn kantite luvraz.” Alor, li ti dir li zantiman ki si li gard bann kitsoz sinp, li pu gayn bann pli gran rekonpans. (Lik 10:40-42) Eski u kapav fer u lavi vinn pli sinp? Eski li vremem neseser ki misye ek madam tulede travay? Si u fer detrwa sanzman, eski u fami pa pu kapav viv avek lapey enn sel dimunn? Buku finn tir profi lor plan spirityel kan zot finn fer bann sanzman pu partisip plis dan predikasyon.
7 Nu tu, anu swiv model ki Zezi ek bann zapot finn lese! Wi, nu kapav sir ki Zeova pu beni bann zefor sinser ki nu fer pu partisip plis dan predikasyon labonn nuvel—enn travay ki sov lavi.—Lik 9:57-62.