Question Ki’nn Soulevé
◼ Kisannla ki bizin rempli bann coupon dan nou bann publication ou-soit bann demande lor Internet?
Dan nou bann publication souvent ena bann coupon ki bann dimoune kapav rempli ek envoye la filiale pou demann enn publication ou-soit demann ki enn Témoin de Jéhovah visite zot. En plus, lor nou site www.watchtower.org bann dimoune kapav demann enn l’etude la Bible. Grace a sa bann disposition-la, enn quantité dimoune pé kapav aprann la verité. Mais, finn gagne certain probleme kan bann proclamateur finn servi sa bann zouti-la pou faire bann l’arrangement pou ki zot famille ou-soit lezot dimoune gagne bann publication ou-soit visite bann Témoins.
Certain dimoune finn gagne bann publication ki sorti la filiale, ki zot personnellement zot pa finn demandé. Sa bann dimoune-la finn faire bann complainte parski zot pensé ki nou l’organisation pé harcele zot ou-soit ki zot nom li lor la liste kot nou envoye bann publication regulierement. Bann proclamateur ki finn gagne enn lettre pou al visite enn dimoune ki personnellement pa finn demann enn visite, finn retrouve zot dan enn mauvais situation kan dimoune-la pa finn content ditou. Alors, c’est zis bann dimoune ki interessé zot-mem, pa bann proclamateur, ki bizin faire demann pou gagne bann publication ou-soit enn visite. En general, kan la filiale trouvé ki c’est enn proclamateur ki finn envoye enn demande pou contacté enn dimoune li rejette sa demande-la.
Mais couma nou kapav aide enn famille ou-soit enn connaissance lor plan spirituel? Si ou envie ki li gagne bann publication, kifer ou pa envoye li sa ou-mem directement couma enn cadeau? Si li montré ki li interessé ek ki li envie ki bann Témoins visite li, mais ou pa koné couma pou contacté bann ancien ki reste dan sa l’endroit-la, ou bizin rempli enn forme Veuillez suivre l’intérêt (S-43) ek ou donne sa secretaire ou congregation ki pou examine sa ek pou envoye li la filiale. Mais, si dimoune ki interessé-la li dan prison, dan enn centre rehabilitation ou-soit l’hopital, fodé pa ou contacté la filiale pou li. Au contraire, encourage li pou gagne contact avek bann frere ki visite sa l’endroit-la, ou-soit pou ecrire personnellement la filiale.