Kestion Ki’nn Souleve

◼ Eski bann proklamater bizin servi Internet dan enn fason exazere pou rann temwaniaz ouswa pou etidie avek bann etranze ki res dan enn lot pei?

Sertin proklamater finn servi Internet pou gagn bann letid Labib dan bann pei kot nou laktivite interdi ouswa kot ena tigit proklamater. Dan sertin ka, zot finn gagn bann bon rezilta. Selman, ena bann danze kan bann proklamater avoy ek resevwar bann e-mail ouswa chat (setadir ena bann konversasion lor Internet) avek bann etranze. (Get Nou Minister Ziliet 2007, p. 3.) Li vre ki bann proklamater ena lobzektif pou pres bon nouvel lor Rwayom Bondie avek bann dimounn sinser. Selman, sa bann konversasion-la kapav fer enn frer ouswa enn ser ena bann move frekantasion, ouswa rant an kontak avek bann aposta. (1 Kor. 1:19-25; Kol. 2:8) Anplis, dan bann pei kot nou laktivite lor restriksion ouswa interdi, li posib ki bann lotorite vey kominikasion ki ena ant bann dimounn ek sa kapav met nou bann frer ek ser ki res dan sa bann pei-la an danze. Alor, fode pa ki bann proklamater al lor Internet pou al rod bann dimounn ki res dan enn lot pei, pou rann temwaniaz.

Si nou rann temwaniaz informel ar enn kikenn ki pe vizit nou pei, fode pa ki nou esey kontign swiv so lintere apre ki li finn retourn dan so pei, amwin ki nou finn gagn linstriksion ar biro nasional. Me, nou kapav montre li kouma servi jw.org pou gagn plis ransegnman ek kouma pou kontakte biro nasional ki trouv dan so pei. Nou kapav ankouraz li pou vizit enn Lasal bann Temwin Zeova ki pre kot li. Biensir, dan tou pei pena bann Lasal kot fer renion. Si li anvi ki bann Temwin dan so landrwa vizit li, nou bizin ranpli enn form Veuillez suivre l’intérêt (S-43) ek donn sa sekreter kongregasion ki pou avoy sa par nou sit jw.org. Biro nasional ki siperviz laktivite dan pei kot sa dimounn-la reste, konn bien kouma sitiasion ete laba. Bann frer dan sa pei-la pou dan enn pli bon pozision pou ed li lor plan spiritiel.​—Get Nou Minister Zin 2014, p. 7, ek Nou Minister Novam 2011 p. 2.

Nou bizin swiv bann instriksion ki finn mansione lao si nou pe vizit enn dimounn ki pou demenaze pou al res dan enn lot pei, ouswa si nou pe etidie avek enn dimounn ki res dan enn lot pei, ek ki nou finn kone zis par Internet. Selman, nou kapav kontign swiv so lintere ziska ki bann proklamater dan so landrwa al vizit li. Me, si li res dan enn pei kot nou laktivite lor restriksion ouswa interdi, nou bizin fer bien atansion kan nou koz bann size Biblik avek li par let, par telefonn ouswa par Internet.​—Mat. 10:16.