Montré-ou prudent kan ou pé preché
1. Kifer nou bizin montré-nou prudent dan predication?
1 Kan zot preche “parmi enn generation ki mauvais ek ki degradé,” bann serviteur Bondié “couma bann brebis au millieu bann lelou.” (Mat. 10:16; Phil. 2:15) De plus en plus nou tann bann nouvelle ki tracasse nou, couma par exemple bann la guerre civil, bann emeute, ou-soit bann enlevement. Tousala montré ki bann mauvais dimoune pé “vinn pli pire.” (2 Tim. 3:13) Pou nou kapav ‘montré-nou prudent’ kan nou pé preché, ki principe la Bible kapav aide nou?—Mat. 10:16.
2. Dan ki situation kitfois li bon ou quitte territoire?
2 Agir avek sagesse: Proverbes 22:3 montré bien ki nou pou agir avek sagesse si nou ‘cachiette kan nou trouve malheur.’ Reste lor ou garde! Kitfois dan enn l’endroit ki habitué trankil, situation kapav changé enn sel coute. Kitfois ou kapav trouve enn quantité la police debarké ou-soit ou trouve bann dimoune faire enn latroupman lor chemin. Parfois enn kikenn kapav signal ou ki ena enn probleme dan l’endroit. Au lieu ki ou reste la parski ou envie koné ki pou arrivé, li pou pli bon si ou quitte sa place-la desuite ek al dan enn lot l’endroit.—Prov. 17:14; Jean 8:59; 1 Thess. 4:11.
3. Couma principe ki trouve en Ecclésiaste 4:9 applik ar nou ministere?
3 Travail ensam: Ecclésiaste 4:9 dire: “Deux pli bon ki enn.” Kitfois ou finn toujours ena l’habitude pou preché tousel sans ki ou gagne probleme, mais azordi eski li bon ou contigne faire sa? Kitfois dan certain region oui. Mais dan lezot region, li dangereux ki enn soeur ou-soit enn jeune al preché porte en porte tousel, surtout kan inn commence faire noir. L’experience finn prouvé ki li bon ki ena enn proclamateur ki prudent avek nou. (Eccl. 4:10, 12) Garde enn ti lizié lor bann dimoune ki pé preche dan ou groupe. Prend l’habitude pou faire lezot koné kan ou pé arrete preché.
4. Pou ki nou senti-nou en securité kan nou preché, ki nou kapav faire?
4 En tant ki bann berger ki pé ‘contigne veille lor nou nâme,’ bann ancien ena responsabilité pou donne bann conseil pratik ki adapté ar nou territoire. (Héb. 13:17) Nou sur ki Jéhovah pou beni nou si nou reconette nou limite ek coopere avek zot, avek tou nou leker. (Mika 6:8; 1 Cor. 10:12) Alors, anou faire nou part pou donne enn bon temoignage dan nou territoire, mais en mem temps nou montré-nou prudent!