Parole Bondié Li Utile pou Enseigné
1. Ki theme l’assemblée circonscription pou l’année service 2014, ek ki question programme sa l’assemblée-la pou reponn?
1 Jéhovah nou “Grand Instructeur,” Li-mem meilleur professeur dan l’univers. (Is. 30:20, 21) Mais, couma eski Li enseigne nou? Li finn donne nou enn livre ki pli superieur ki tou lezot livre—so Parole ki inspiré, la Bible. Couma eski l’enseignement Bondié kapav faire nou gagne bann bienfait lor plan physik, mental, affectif, ek spirituel? Nou pou gagne reponse sa question-la pendant programme nou l’assemblée circonscription pou l’année service 2014. Theme sa l’assemblée-la c’est: “Parole Bondié Li Utile pou Enseigné.” Ek li basé lor 2 Timothée 3:16.
2. Reponse ki bann question pou mette l’accent lor bann point important sa l’assemblée circonscription-la?
2 Rod sa Bann Point Important-la: Reponse bann question ki suive pou mette l’accent lor bann point important sa l’assemblée circonscription-la:
• Ki l’effet l’enseignement Bondié ena lor nou lavi? (Is. 48:17, 18)
• Si nou pé essaye faire bann changement dan nou situation pou nou kapav servi Jéhovah a plein temps, ki l’assurance nou ena? (Mal. 3:10)
• Couma nou bizin reagir kan nou tann “bann l’enseignement ki bizarre”? (Héb. 13:9)
• Couma nou kapav imite Jésus so “fason enseigné”? (Mat. 7:28, 29)
• Kifer bann enseignant dan congregation bizin enseigne zot-mem? (Rom. 2:21)
• Parole Bondié li utile pou ki kitsoz? (2 Tim. 3:16)
• Ki l’effet sa ena lor bann dimoune kan Jéhovah “sakouye” bann nation? (Hag. 2:6, 7)
• Ki confiance Jéhovah ena en nou? (Éph. 5:1)
• Kifer nou bizin faire zeffort pou contigne suive l’enseignement Jéhovah? (Luc 13:24)
3. Kifer li important ki nou assisté ek suive bien programme sa l’assemblée-la, ki’nn preparé pou nou dan ler ki bizin?
3 Dan 2 Timothée chapitre 3, enn ti pé avant ki li ecrire bann parole lor ki theme nou l’assemblée basé, Paul ti koz lor bann lepok critik ki ti pou ena dan bann dernier jour. Li ti ecrire: “Bann dimoune mauvais ek bann faussaire pou vinn pli pire, zot embete lezot ek zot embete zot-mem.” (2 Tim. 3:13) Pou ki nou pa laisse personne embete nou, li important ki nou ecoute ek applik l’enseignement Bondié. Alors, anou bien decidé pou assisté ek suive bien programme sa l’assemblée-la, ki’nn preparé pou nou dan ler ki bizin.