Parole Bondié Li Puissant
1. Ki theme l’assemblée special enn jour pou l’année service 2014?
1 La Bible kapav faire bann kitsoz ki bann dimoune imparfait pa kapav faire. La Bible ena pouvoir pou transforme nou, parski li aide nou pou pense ek pou agir en accord avek volonté Jéhovah. Ki quantité pouvoir Parole Bondié ena? Couma dan nou lavi, nou kapav bien servi pouvoir ki Parole Bondié ena? Couma nou kapav servi li dan enn fason pli efficace pou aide lezot? Pou developpe sa bann point-la dan l’assemblée special enn jour pou l’année service 2014. Pena doute ki sa bann point-la pou aide nou tou pou vinn fort lor plan spirituel. Theme nou l’assemblée c’est: “Parole Bondié Li Puissant.” Ek li basé lor Hébreux 4:12.
2. Reponse ki bann question nou bizin ecouté?
2 Rod Reponse sa Bann Question-la: Kan ou pou assisté l’assemblée, note reponse sa bann question-la.
• Kifer nou bizin ena confiance dan Parole Jéhovah? (Ps. 29:4)
• Couma nou pou kapav ressenti pouvoir ki Parole Bondié ena dan nou lavi? (Ps. 34:8)
• Couma ou kapav laisse pouvoir ki Parole Bondié ena agir dan ou ministere? (2 Tim. 3:16, 17)
• Ki nou bizin faire pou pa tombe dan piege le monde Satan, ki ena pouvoir pou embete bann dimoune? (1 Jean 5:19)
• Couma ou jeune, ou kapav reussi lor plan spirituel? (Jér. 17:7)
• Couma nou kapav vinn fort mem kan nou faible? (2 Cor. 12:10)
• Ki pou aide nou pou contigne faire bann changement, mem si sa faire longtemps ki nou ena bann mauvais l’habitude ek bann mauvais l’attitude? (Éph. 4:23)
3. En plis ki nou bizin bien ecouté, ki lezot fason nou ena ankor pou profite sa l’assemblée special enn jour-la?
3 Vrai-mem nou pou gagne beaucoup bienfait kan nou pou gagne reponse sa bann question-la! En plis, pareil couma nou l’assemblée circonscription ek nou l’assemblée district, nou l’assemblée special enn jour pou permette nou zwenn ek profite compagnie bann frere ek soeur ki sorti lezot congregation. (Ps. 133:1-3; 2 Cor. 6:11-13) Alors, prend letan pou profite compagnie bann frere ek soeur ki ou koné depuis longtemps, ek essaye faire bann nouveau camarade. Si ena enn orateur visiteur couma enn surveillant district ou-soit enn frere ki sorti Béthel ki’nn vinn faire discours dan sa l’assemblée special enn jour-la, kitfois ou kapav saisi sa l’occasion-la pou koz avek li ek so madame. En tou cas, nou ena beaucoup raison pou attann avek impatience nou l’assemblée special enn jour ki pé vini!