Bann Lanrezistreman Odio—Kouma pou Servi Zot?
1. Apart bann piblikasion ki nou kapav lir, ki dispozision nou kapav profite ankor lor nou sit Internet?
1 Boukou dimounn kontan servi nou sit jw.org pou lir bann parol laverite ki exakt ek ki fer plezir. (Ekle. 12:10) Me eski to finn deza servi bann lanrezistreman odio? Gras-a sa bann lanrezistreman-la, li posib pou tann boukou linformasion an odio lor nou sit Internet. Kouma nou kapav profit sa bann anrezistreman-la?
2. Kouma nou kapav servi bann lanrezistreman odio dan nou letid personel ouswa nou letid an fami?
2 Pou Nou Letid Personel Ouswa Nou Letid an Fami: Ena boukou piblikasion ki disponib an version odio. Par exanp, Labib, bann magazinn, ek lezot piblikasion. Kan nou ekout sa bann lanrezistreman-la kan nou pe vwayaze ouswa dan nou bann aktivite toulezour, sa pou ed nou servi bien nou letan. (Efe. 5:15, 16) Nou kapav varye nou ladorasion an fami kan nou ekout lektir enn piblikasion ek anmemtan swiv li dan nou prop kopi. Kan nou servi bann lanrezistreman odio dan nou letid personel, sa kapav ed nou sirtou si nou ti pou kontan amelior nou lektir ouswa si nou pe aprann enn lang.
3. Kisannla dan nou teritwar kapav profit bann anrezistreman odio?
3 Dan Predikasion: Bann dimounn dan nou teritwar ki panse ki zot pa pou gagn letan lir parski zot tro okipe, kitfwa pou pli dispoze pou ekout bann lanrezistreman odio. Li kapav arive ki nou zwenn bann dimounn ki koz enn lot lang. Kitfwa zot pou plis reazir ar mesaz Rwayom Bondie si zot tann sa mesaz-la dan zot “prop lang.” (Zist. 2:6-8, NW.) Dan sertin landrwa, ekoute, se enn kitsoz inportan dan kiltir bann dimounn. Par exanp, dan kiltir bann Hmong, bann dimounn abitie rakont zot listwar ar prosin zenerasion, ek zot reisi rapel bien bann kitsoz ki zot tande. Dan boukou kiltir Afriken, bann dimounn kontan ansegn lezot atraver bann zistwar.
4. Ki kestion nou kapav poz noumem konsernan led ki nou donn bann dimounn dan nou teritwar?
4 Dan to teritwar, eski li pou itil si to zwe enn lanrezistreman odio avek enn dimounn, zis pou enn ti moman, dan so lang maternel? Eski ena enn dimounn ki kapav profit lanrezistreman odio enn piblikasion si to avoy li sa par e-mail? Eski nou kapav download enn piblikasion an odio ek grav sa lor enn CD? Lerla nou donn sa enn dimounn ki interese, ek kitfwa avek so kopi inprime. Nou kapav kont lor nou rapor sak liv, brosir, magazinn ouswa trak elektronik ki nou donn enn dimounn dan predikasion. Bann lanrezistreman odio inn fer pou ki nou kapav servi zot dan nou letid personel ek pou plant lagrin laverite dan leker bann dimounn.—1 Kor. 3:6.