SIZESION LOR KOUMA POU ETIDIE
Bann Kitsoz ki Pou Ed Twa pou Lir Labib Toulezour
Avek tou seki to ena pou fer sak zour, eski parfwa to trouv sa difisil pou lir Labib toulezour? (Zozwe 1:8) Si wi, to kapav sey enn parmi sa bann sizesion-la:
Met enn alarm toulezour. Met enn alarm lor to laparey elektronik pou to rapel ki to bizin lir Labib.
Gard to Labib dan enn plas kot to pou trouv li. Si to lir Labib dan version inprime, met li enn plas kot li pou pli fasil pou ki to trouv li toulezour.—Det. 11:18.
Ekout Labib an version odio. Ekout Labib an version odio kan to pe fer to bann laktivite toulezour. Tara, enn ser ki enn mama ek enn pionie, ek ki osi travay aswar, dir: “Mo ekout Labib odio kan mo fer bann louvraz lakaz, ek sa ed mwa pou lir Labib toulezour.”
Pa bes lebra. Si enn kitsoz ki to pa atann arive ek ki to pa reisi lir Labib dan moman ki to ti deside pou fer li, lir omwin de-trwa verse avan ki to al dormi. Mem si to lir zis de-trwa verse sak zour, to pou gagn bann bienfe.—1 Pier 2:2.