Servi Liv Viv Ere pou Touletan! pou Ed Lezot pou Ena Lafwa

Pou fer Bondie plezir, bann etidian Labib bizin devlop enn lafwa bien for. (Eb 11:6) Nou kapav servi liv Viv Ere pou Touletan! pou tous zot leker. Dan sa liv-la, ena bann verse inportan, bann rezonnman bien sinp, bann kestion efikas, bann video ki kapte latansion, ek bann zoli zimaz. Kan nou ed bann etidian pou devlop bann kalite Kretien ek enn relasion solid avek Bondie, nou pe konstrir avek bann materyo ki reziste dife.​—1Ko 3:12-15.

Sertin dimounn trouv sa difisil pou vinn kamarad Bondie parski zot pa trouv Li. Alor, nou bizin ed zot pou aprann konn Zeova ek fer Li konfians.

GET VIDEO SERVI LIV “VIV ERE POU TOULETAN!” POU ED LEZOT POU ENA LAFWA AN ZEOVA, EK APRE SA, REPONN SA BANN KESTION-LA:

• Ki bann kitsoz ki montre ki ser-la finn bien prepar li pou fer letid?

• Apre ki zot inn lir Izai 41:10, 13, kouma eski li’nn bien servi bann kestion pou ed etidian-la dir seki ena dan so leker?

• Ki lefe sa video-la ek bann verse Labib finn ena lor etidian-la?

Boukou dimounn pa konpran linportans laranson, ouswa zot pa trouv li kouma enn kado personel ki Bondie finn donn zot. (Ga 2:20) Alor, nou bizin ed zot pou devlop lafwa dan sakrifis Zezi.

GET VIDEO SERVI LIV “VIV ERE POU TOULETAN!” POU ED LEZOT POU ENA LAFWA AN ZEZI, EK APRE SA, REPONN SA BANN KESTION-LA:

• Ki bann kitsoz ki montre ki frer-la finn bien prepar li pou fer letid?

• Kouma li’nn servi seki ena dan seksion “Dekouver” pou ed etidian-la?

• Kifer eski lapriyer li bien inportan pou etidian-la?