Ki Kitsoz ki Vremem Determinn Ou Lavenir?
Boukou dimounn krwar ki ena enn lafors invizib ki kontrol zot lavenir. Akoz sa, zot fer bann kitsoz ki zot panse pou amelior zot lavi.
SEKI BOUKOU DIMOUNN PANSE
ASTROLOZI: Sertin dimounn panse ki pozision bann zetwal dan lesiel kan zot inn ne, montre ki kalite lavenir zot pou ena. Zot al fer chek zot oroskop pou gete si ena kit maler ki pe atann zot. Lerla, zot fer bann kitsoz pou ki zot kapav evit li
FENG SHUI: Lezot panse ki fason ki zot ranz zot lakaz ouswa plas zot bann meb pou fer zot reisi dan lavi. Lo Wing,a ki res Hong Kong, dir: “Enn met feng shui ti dir mwa ki si mo gard enn ros an kristal dan enn plas spesifik dan mo magazin, sa pou ed mwa pou gagn plis kas.”
LADORASION BANN ANSET: Ena dimounn krwar ki zot bizin onor zot bann anset ki’nn mor ouswa bann lezot bondie pou gagn zot proteksion ek zot benediksion. Van, ki res Vietnam, dir: “Mo ti krwar ki si mo ador mo bann anset, mwa ek mo bann zanfan ti pou gagn enn pli bon lavi ek enn bon lavenir.”
REINKARNASION: Boukou dimounn krwar ki kan enn dimounn mor, li repran nesans ek regagn enn lot lavi, ek sa li ale mem koumsa. Zot panse ki bann bon ouswa move kitsoz ki zot pe gagne azordi, se akoz seki zot inn fer dan zot lavi avan.
Me boukou panse ki sa bann krwayans-la se zis bann siperstision. Kanmem sa, zot lir bann lalign lor zot lame, chek zot oroskop, kominik avek bann lespri, lir kart ek bann lezot kitsoz koumsa. Zot panse sa bann kitsoz-la kapav fer zot konn zot lavenir.
ESKI SA FINN VREMEM ED ZOT?
Eski bann ki ena konfians dan sa bann krwayans-la ek sa bann pratik-la inn gagn enn bon lavi ek enn bon lavenir?
Anou get lexperyans Hào, ki res Vietnam. Li’nn servi astrolozi, feng shui, ek ladorasion bann anset pou gid li. Eski li’nn reisi dan so lavi? Hào dir: “Mo’nn perdi boukou kas dan mo biznes. Mo ena boukou det, problem fami ek mo’nn tom dan depresion.”
Parey, Qiuming ki res Taywan, ti krwar dan oroskop, reinkarnasion, destin, feng shui ek ladorasion bann anset. Apre ki li’nn bien examinn sa bann krwayans-la, li dir: “Mo’nn realize ki sa bann lansegnman-la ek sa bann koutim-la, zot kontredir sakenn zot kamarad ek zot pa kler. Mo’nn remarke ki bann oroskop souvan zot pa vre. Ek pou reinkarnasion, si ou pa rapel nanye dan ou lavi avan, kouma ou kapav sanze ek amelior oumem dan ou prosin lavi?”
“Mo’nn realize ki sa bann lansegnman-la ek sa bann koutim-la, zot kontredir sakenn zot kamarad ek zot pa kler.”—QIUMING, TAYWAN
Hào, Qiuming ek bann lezot dimounn finn aprann ki se ni destin, ni bann zetwal, ni nou bann anset ki’nn mor ek ni reinkarnasion ki determinn nou lavenir. Me eski savedir ki nou pena okenn kontrol lor nou lavenir?
Boukou dimounn panse ki pou gagn enn bon lavenir, zot bizin fer bann gran letid ek gagn boukou kas. Ki rezilta sertin finn gagne akoz zot finn swazir sa kalite lavi-la?
a Dan sa lartik-la ek bann lartik ki pou swiv, finn sanz sertin nom.