Zot Inn Resanti Lamour Zot Bann Frer ek Ser

YOMARA ek so bann frer, Marcelo ek Hiver, res dan enn ti vilaz dan Gwatemala. Yomara ti koumans etidie Labib avek bann Temwin Zeova, ek apre, so bann frer osi ti koumans etidie. Me ti ena enn problem. Toule trwa ti aveg, ek zot pa ti konn lir bray. Alor, sa frer ki ti fer zot letid la, ti lir bann paragraf ek bann verse Labib dan leson ki zot ti pe etidie.

Sa ti difisil osi pou zot asiste bann renion. Zot ti bizin vwayaz 40 minit pou al Lasal Renion ki ti pli pre ar zot. Me selman, zot pa ti kapav fer sa par zotmem. Alor, bann frer dan lasanble ti fer bann laranzman pou amenn zot Lasal. Kan toule trwa ti koumans gagn bann devwar pou fer pandan bann renion lasemenn, bann frer ti ed zot pou aprann zot devwar par-ker.

An Me 2019, ti koumans fer bann renion dan zot vilaz. Sa lepok-la, enn koup pionie ti vinn res dan zot vilaz. Mem si sa koup-la pa ti konn lir ek ekrir bray, zot ti anvi montre bann-la kouma pou fer sa. Alor, zot inn al dan enn libreri pou gagn bann liv ki explike kouma pou montre bray.

Dan de-trwa mwa, toule trwa ti reisi lir bray bien, ek sa ti ed zot pou ena enn pli bon lamitie avek Zeova.a Aster-la Yomara, Marcelo, ek Hiver pe servi kouma pionie permanan ek Marcelo enn serviter lasanble. Toutlong lasemenn, zot bien okipe dan zot servis pou Zeova. Zot ti telman aktif dan zot servis pou Zeova ki sa ti ankouraz lezot pou fer plis dan predikasion.

Toule trwa bien rekonesan pou lamour ek soutien zot bann frer ek ser. Yomara dir: “Depi premie zour ki nou’nn zwenn bann Temwin, nou’nn trouve ki zot ena vre lamour Kretien.” Marcelo dir: “Nou ena bann kamarad extraordiner dan nou lasanble, ek nou form parti dan enn fami internasional ki ini dan lamour.” Yomara ek so bann frer pe atann avek inpasians zour kot later pou vinn enn paradi.​—Ps. 37:10, 11; Iza. 35:5.