Kestion Bann Lekter

Dan 1 Timote 5:21, kisann-la sa “bann anz ki Bondie inn swazir” la?

Dan let ki lapot Pol ti ekrir Timote, ki ti enn ansien parey kouma li, li ti dir: “Mo donn twa lord devan Bondie ek Kris Zezi, ek bann anz ki Bondie inn swazir, pou swiv sa bann linstriksion-la san okenn prezize ek san fer preferans.”—1 Tim. 5:21.

Pou nou konpran kisann-la sa “bann anz ki Bondie inn swazir” la, anou gete kisann-la pa form parti dan sa group-la. Li kler ki se pa bann 144,000, parski kan Pol ti ekrir Timote, bann zapot ek bann Kretien ki ena lesperans pou al dan lesiel pa ti ankor resisite ek vinn bann kreatir spiritiel. Alor, sa “bann anz ki Bondie inn swazir” la, se pa bann 144,000.—1 Kor. 15:50-54; 1 Tes. 4:13-17; 1 Zan 3:2.

Bann anz ki ti dezobeir Zeova kan ti ena Deliz, zot osi zot pa form parti sa “bann anz ki Bondie inn swazir” la. Sa bann anz-la ti al dan kote Satan. Zot ti vinn bann demon ek bann lennmi Zezi. (Zen. 6:2; Lik 8:30, 31; 2 Pier 2:4) Dan lavenir, Zezi pou zet zot dan “trou san fon,” kot zot pou reste pandan 1,000 an. Apre sa, pou detrir zot ansam avek Satan.—Zid 6; Rev. 20:1-3, 10.

Alor, kan Pol ti koz lor sa “bann anz ki Bondie inn swazir” la, li ti pe koz lor bann anz fidel ki dan lesiel ek ki soutenir “Bondie ek Kris Zezi.”

Dan lesiel, ena bann milye anz ki fidel. (Ebre 12:22, 23) Zeova pa donn tou bann anz mem travay. (Rev. 14:17, 18) Par exanp, Zeova ti demann enn anz pou touy 185,000 solda Asirien. (2 Ler. 19:35) Plizir anz kitfwa inn gagn responsabilite ‘pou tir dan Rwayom Zezi tou bann kitsoz ki fer lezot fer pese ek bann dimounn ki pratik bann move kitsoz.’ (Mat. 13:39-41) Sertin anz kitfwa inn gagn responsabilite “pou rasanble bann ki Bondie inn swazir.” (Mat. 24:31) Ek ena lezot ki’nn gagn lord “pou vey lor twa dan tou seki to fer.”—Ps. 91:11; Mat. 18:10; konpar ar Matie 4:11; Lik 22:43.

Alor, dan 1 Timote 5:21, sa “bann anz ki Bondie inn swazir” la, kitfwa se bann anz ki’nn gagn responsabilite pou okip bann lasanble. Se akoz sa ki Pol ti donn bann konsey lor kouma bann ansien bizin asim bien zot bann responsabilite ek lor kouma bann frer ek ser dan lasanble bizin montre respe anver bann ansien. Bann ansien bizin fer zot travay “san okenn prezize ek san fer preferans,” ek zot bizin pa pran enn desizion san ki zot reflesi bien lor la. Enn parmi bann rezon bien inportan kifer zot bizin swiv linstriksion ki Pol inn donn zot, se parski zot pe azir “devan Bondie ek Kris Zezi, ek bann anz ki Bondie inn swazir.” Alor, li kler ki sertin anz ena responsabilite pou pran swin lasanble kan zot protez bann frer ek ser, kan zot ede dan predikasion, ek kan zot dir Zeova seki zot trouve.—Mat. 18:10; Rev. 14:6.