La priere

ESKI Bondié ecoute tou la priere, mem si bann dimoune prié n’importe ki bondié? Dan le monde zordi, souvent bann dimoune pense sa. Sa l’opinion-la attire beaucoup dimoune ki soutenir bann religion ki joinde ensam dan bann groupe ek zot envie ki accepté tou religion malgré zot difference. Mais eski li possible ki sa l’idée-la pa vrai?

La Bible enseigné ki la plupart du temps bann dimoune pa prié bondié ki bizin. Dan lepok ki ti ecrire la Bible, li ti populaire ki bann dimoune ti prié bann zimage sculpté. Pourtant, plusieurs fois Bondié ti mette so bann serviteur en garde kont sa pratik-la. Par exemple, Psaume 115:4-6 dire lor bann zidole: “Zot ena zoreille, mais zot pa kapav tendé.” Sa l’idée-la bien clair. Kifer ou pou prié enn bondié ki jamais pa pou tann ou?

Enn recit la Bible bien vivant faire nou comprend pli bien sa l’idée-la. Éliya, enn vrai prophete, ti lance en defi bann prophete Baal pou zot prié zot bondié, apré sa, Éliya ti pou prié so Bondié. Éliya ti dire ki vrai Bondié ti pou reponn ek ki fausse bondié pa ti pou reponn. Bann prophete Baal ti accepté sa defi-la ek zot ti faire enn longue la priere ek zot ti prié avek tou zot leker, zot ti mem criyé bien fort—mais personne pa ti reponn zot! Sa recit-la dire: “Pa ti ena . . . personne ki ti reponn, ni personne ki ti prend compte.” (1 Rois 18:29) Mais ki ti arrivé kan Éliya ti prié?

Apré ki Éliya ti prié, so Bondié ti reponn li desuite. Li ti envoye enn difé ki ti sorti dan le ciel ek ki ti brule sacrifice ki Éliya ti preparé. Ki difference ti ena? Ena enn kitsoz bien important dan sa la priere ki Éliya ti faire-la, ki nou kapav lire dan 1 Rois 18:36, 37. La priere Éliya ti bien courte—ti ena apepré 30 mot dan langue hébreu original. Pourtant, dan sa bann tigit mot-la, trois fois Éliya ti servi nom personnel Bondié, Jéhovah, kan li ti prié Li.

Baal vedir “proprietaire” ou-soit “maitre.” Li ti bondié bann Cananéen, ek ti ena toute sorte qualité bondié Baal dan zot pays. Mais, Jéhovah c’est enn nom unique, ki applik zis ar enn sel Personnage dan tou l’univers. Sa Bondié-la ti dire so peuple: “Moi mo Jéhovah. Sa-mem mo nom; ek mo pa pou donne personne mo la gloire.”—Isaïe 42:8.

Eski la priere Éliya ek bann la priere ki bann prophete Baal ti faire ti al dan mem place? L’adoration Baal ti abaisse bann dimoune parski zot ti faire prostitution ek zot ti mem sacrifié bann dimoune kan zot ti pé adore li. Mais l’adoration Jéhovah ti different, li ti donne dignité so peuple, Israël, parski so bann serviteur pa ti pratik bann kitsoz degoutant coumsa. Alors reflechi lor la: maziné ki ou envoye enn lettre enn camarade pou ki ou ena enn grand respé ek ki ou finn bien ecrire so nom lor l’enveloppe. Eski ou pou attann ki enn lot dimoune gagne sa lettre-la, enn dimoune ki pena mem nom ki ou camarade ek ki ena enn mauvais reputation ki contraire ar tou seki ou camarade été? Non!

Si ou prié Jéhovah, ou pé prié Createur, Papa tou dimoune.a Prophete Isaïe ti dire dan so la priere: “Toi, o Jéhovah to nou Papa.” (Isaïe 63:16) Alors, c’est lor Li-mem ki Jésus Christ ti pé kozé kan li ti dire so bann disciple: “Mo pé monte kot mo Papa ek zot Papa ek kot mo Bondié ek zot Bondié.” (Jean 20:17) Jéhovah c’est Papa Jésus. Li-mem Bondié ki Jésus ti prié ek ki Jésus ti enseigne so bann disciple pou prié.—Matthieu 6:9.

Eski la Bible dire nou prié Jésus, Marie, bann saint ou-soit bann ange? Non—zis Jéhovah tousel ki nou bizin prié. Anou examine deux raison kifer. Premierement, la priere c’est enn forme l’adoration, ek la Bible dire ki c’est zis Jéhovah tousel ki nou bizin adoré. (Exode 20:5) Deuxiemement, la Bible dire ki Li “ecoute la priere.” (Psaume 65:2) Mem si Jéhovah donne beaucoup responsabilité lezot, sa responsabilité pou ecoute bann la priere-la, jamais Li pa’nn donne sa personne. C’est Li-mem Bondié ki promette pou ecoute personnellement nou bann la priere.

Alors si ou envie ki Bondié ecoute ou bann la priere, rappel sa conseil ki la Bible donné-la: “Tou dimoune ki invok nom Jéhovah pou sapé.” (Actes 2:21) Mais eski Jéhovah ecoute tou bann la priere sans okenn condition? Ou-soit eski ena lezot kitsoz ki nou bizin koné si nou envie ki Jéhovah ecoute nou bann la priere?

[Note]

[Zimage page 5]

Defi ki Éliya ti lance bann prophete Baal ti prouvé ki tou bann la priere pa al dan mem place