Faire seki bon ek partage avek lezot
1 Dorcas “ti faire beaucoup bon action ek bann don misericorde.” (Actes 9:36, 39) Tellement li ti content donné, ki Jéhovah ek tou bann dimoune ki ti konn li, ti bien content li. Hébreux 13:16 dire: ‘Pa blié faire seki bon ek partage avek lezot, parski Bondié bien content bann sacrifice coumsa.’ Couma nou kapav faire seki bon ek partage avek lezot zordi?
2 Enn fason pou ki nou aide lezot, c’est kan nou partage nou “bann kitsoz ki ena valeur.” (Prov. 3:9) Grace a bann contribution ki nou faire pou soutenir travail ki pé faire dan le monde entier, bann frere kapav construire bann la-Salle du Royaume, bann la-Salle l’assemblée, ek bann Béthel, dan le monde entier. Sa finn permette bann million dimoune pou gagne enn l’enseignement theocratik ek pou profite compagnie bann frere ek soeur ki pou faire zot vinn pli fort lor plan spirituel.
3 Anou encourage lezot: Kan arrive enn catastrophe, le peuple Jéhovah pré pou ‘faire seki bon’ envers zot bann frere ek soeur, ek mem envers bann ki pa partage zot la-foi. (Gal. 6:10) Apré ki enn l’usine ki faire bann produit chimik ti eclaté en France en 2001, enn couple ki ti reste a-coté ti dire: “Nou bann frere ti vinn aidé, dé-suite. Zot finn aidé pou nettoye nou l’appartement ek l’appartement lezot dimoune ki ti reste dan batiment. Nou bann voisin ti bien etonné pou trouve tou sa quantité dimoune ki ti vinn aidé-la.” Enn lot soeur ajouté: “Bann ancien ti vinn aide nou. Zot ti vinn encourage nou. Ek en realité, nou ti bizin sa plus ki l’aide materiel.”
4 Nou ena beaucoup fason pou faire seki bon envers nou prochain, mais pli bon fason, c’est kan nou partage connaissance lor la verité ki couma enn tresor. Coumsa zot pou konn “l’espoir pou gagne la vie eternel” ki Jéhovah Li-mem finn promette. (Tite 1:1, 2) Message ki ena dan la Bible donne enn vrai consolation bann ki pé plaigné a cause bann condition ki ena dan le monde, ek a cause zot prop l’imperfection. (Mat. 5:4) Anou faire seki bon ek partage avek lezot, chaque foi ki nou gagne l’occasion.—Prov. 3:27.