Zot fidelité, li enn bon l’exemple pou nou
1 En 1937, la societé finn etabli enn nouveau forme service a plein temps—service pionnier special. Bann frere ek sœur capable, ki ti ena l’experience dan ministere, ti accepté avek tou zot leker pou al servi kot l’organisation ti envoye zot. Zordi, plusieurs dizaine l’année plitar, bann pionnier special pé contigne donne nou enn bon l’exemple par zot fidelité. Oui, li bon ki nou suive zot l’exemple!—Héb. 6:12.
2 Zot ti prend la tête: Bann pionnier special, au commencement, ti parmi bann premier pou preche avek bann tourne-disque portatif devant la porte bann dimoune. Kan zot ti faire bann nouvelle visite, zot ti servi aussi bann enregistrement pou commence bann conversation lor la Bible. Zot ti faire sa dan bann grand la-ville kot ti deja ena bann congregation. Plitar, ti envoye bann pionnier special dan bann l’endroit kot ti bizin plus proclamateur. Zot ti contigne visite tou bann dimoune ki ti montré l’interet pou la Bible ek zot ti commence bann l’etude. Grace a bann grand zeffort ki zot inn faire, plusieurs centaine nouveau congregation finn formé. Sa bann pionnier zelé-la, finn joué enn role bien important dan grand l’accroissement ki l’organisation finn koné. (Is. 60:22) Bann pionnier special pé contigne faire zot part pou partage bon nouvel “dan tou creation ki trouve enba le ciel.”—Col. 1:23.
3 Li bon ki nou suive zot l’exemple: Certain pionnier special finn servi pendant plusieurs dizaine l’année. Pendant tou sa bann l’année-la, different situation finn affine la foi tou sa bann frere ek soeur fidel-la. (1 Pierre 1:6, 7) Zot finn accepté pou sacrifié bann confort materiel pou ki zot kapav servi dan bann l’endroit kot ti bien bizin l’aide. Zordi, certain parmi zot finn vinn vié ek zot pena enn bon la-santé, ou-soit zot bizin faire face ar lezot situation difficile. (2 Cor. 4:16, 17) Pourtant, zot ‘pé contigne prosperé pendant zot vieillesse.’ (Ps. 92:14) Zot mette zot confiance en Jéhovah ek zot gagne so benediction.—Ps. 34:8; Prov. 10:22.
4 Oui, bann pionnier special merite nou bann felicitation sincere! Li enn privilege si ena bann pionnier special dan ou congregation. Rod tou l’occasion pou passe le temps avek zot ek profite zot l’experience. Montré ki ou apprecié service ki zot faire en tant ki bann proclamateur fidel. Nou gagne courage kan nou trouve zot bien determiné pou reste ferme. Tou bann ki imite zot la-foi, zot aussi zot pou kapav gagne faveur Jéhovah ek so benediction parski ‘Li prend plaisir dan bann dimoune ki agir avek fidelité.’—Prov. 12:22.