Enn l’aide pou bann famille
1. Ki bienfait bann Israélite ti gagné kan zot ti garde sabbat toulé-semaine?
1 Dan le passé, bann famille ti tire beaucoup profit kan zot ti garde sabbat, enn disposition ki Jéhovah ti prend avek beaucoup l’amour. Sa jour-la bann Israélite ti reposé, zot pa ti travail ek zot ti ena le temps pou medite lor bonté Jéhovah ek lor zot relation avek Li. Bann parent ti kapav saisi sa l’occasion-la pou grave la Loi dan leker zot bann zenfant. (Deut. 6:6, 7) Grace a sa disposition-la, peuple Jéhovah ti kapav gagne le temps chaque semaine pou prend compte zot spiritualité.
2. Disposition lor sabbat enseigne nou ki kitsoz lor Jéhovah?
2 Bien sur, Jéhovah nepli demann bann famille pou garde sabbat. Mais, sa la loi-la enseigne nou enn kitsoz lor nou Bondié. Li finn touletan bien interessé ar bien-etre spirituel so peuple. (Is. 48:17, 18) Zordi, enn fason ki Jéhovah montré ki Li interessé ar nou c’est par sa soirée ki’nn reservé pou l’etude familial-la.
3. Ki but soirée l’etude familial?
3 Ki but soirée l’etude familial? En janvier 2009, finn commence faire l’etude de livre mem jour ki Lekol ministere theocratik ek reunion service. Enn raison kifer finn faire sa changement-la c’est pou ki bann famille gagne l’occasion pou fortifié zot relation avek Jéhovah kan zot etabli enn soirée precis chaque semaine pou zot l’etude familial. Chaque famille ti encouragé pou faire so l’etude familial sa soir kot ti habitué ena l’etude de livre-la, si li pratik pou zot. Zot ti encouragé aussi pou servi sa moment-la, sans ki zot pressé, pou faire enn discussion ek enn l’etude lor la Bible ki adapté ar besoin zot famille.
4. Eski l’etude familial bizin dure zis enn heure temps? Expliké.
4 Pou assisté l’etude de livre, nou ti bizin le temps pou habillé, voyagé allé-retour. Pou beaucoup parmi nou, sa ti prend plus ki enn heure temps pou assisté sa reunion-la. Avek sa changement-la, asterla nou ena sa soirée-la pou adore Jéhovah en famille. Alors, nou l’etude familial pa obligé dure zis enn heure temps. Au contraire, nou bizin pense lor bann besoin ek bann limite nou famille ek reserve assez le temps pou sa.
5. Eski bizin passe tou sa le temps-la pou etudié ensam? Expliké.
5 Eski bizin passe tou sa le temps-la pou etudié ensam? Kan bann couple ek bann famille kot ena zenfant koz lor bann sujet spirituel ensam, zot encourage sakenn zot camarade. (Rom. 1:12) Sa faire zot vinn pli proche. Alors, bann sujet ki basé lor la Bible, sa-mem ki bizin forme partie pli important dan l’etude familial. Mais, chaque membre la famille kapav aussi passe inpé le temps pou so l’etude personnel. Par exemple, apré l’etude, la famille kapav reste ensam alors ki chaque membre etudié personnellement, kitfois zot pé fini preparation zot bann reunion ou-soit zot pé lire bann periodik. Certain famille decide pou pa guette television pendant sa soirée-la.
6. Couma bizin faire sa l’etude-la?
6 Couma bizin faire sa l’etude-la? Pa obligé faire li dan forme enn discussion question-reponse. Pou rann l’etude familial interessant ek vivant, beaucoup famille ena enn programme ki pareil couma programme reunion ki nou ena pendant la semaine. Zot divise zot bann discussion en plusieurs partie ek zot examine li dan different fason. Par exemple, zot kapav lire la Bible ensam, prepare enn partie reunion, ek faire bann demonstration ki zot kapav servi dan predication. Nou kapav trouve certain suggestion lor page 6.
7. Ki qualité l’ambiance bann parent bizin faire zeffort pou crée?
7 Ki qualité l’ambiance bann parent bizin faire zeffort pou crée? Ou famille pou aprann pli bien si ena enn bon l’ambiance kot ena l’amour. Kitfois ou kapav etudié dehors si le temps bon. Senti-ou libre pou faire bann pause kan bizin. Certain famille prevoir ki ena bann ti rafraichissement apré zot l’etude. Bien sur, bann parent pou evite servi l’etude familial pou corrige ou-soit discipline zot zenfant, mais zot kapav reserve inpé le temps pou koz lor enn tendance ou-soit enn probleme ki zot finn remarké. Mais, li pou pli bon ki zot koz lor bann sujet personnel ki delicat avek enn zenfant dan enn lot moment pendant la semaine pou ki li pa senti-li mal a l’aise devant so bann frere ek sœur. Fodé pa ki l’etude familial li trop serieux, ek pa interessant. Au contraire, nou l’etude bizin montré ki nou pé adore nou Bondié ki heureux.—1 Tim. 1:11.
8, 9. Ki preparation bann chef famille bizin faire?
8 Couma enn chef famille kapav prepare-li? Si enn chef famille prepare-li a l’avance pou chaque l’etude familial kan li decidé lor ki sujet pou kozé ek ki pli bon fason pou faire li, la famille pou tire beaucoup profit. (Prov. 21:5) Li pou bon ki enn mari demann so madame ki li pensé dan sa domaine-la. (Prov. 15:22) Chef famille, kifer eski de temps en temps ou pa demann ou bann zenfant ki zot ti pou content faire? Si ou faire sa, ou pou arrivé comprend pli bien ki interesse zot ek ki tracasse zot.
9 La plupart bann semaine, bann chef famille pa pou bizin passe beaucoup le temps pou prepare zot. Li possible ki la famille pou content pou faire enn sel kitsoz regulierement toulé-semaine, ek chef famille pa pou bizin prepare enn nouveau programme a chaque fois. Kitfois li pou trouvé ki li pli bon prepare li apré chaque l’etude familial, parski besoin so famille encore frais dan so l’esprit. Certain chef famille ecrire enn ti programme ek colle li enn place kot la famille kapav trouve li facilement, par exemple lor frigidaire. Sa donne la famille le temps pou prepare li si bizin, ek coumsa zot impatient pou faire l’etude.
10. Couma eski bann ki reste tousel kapav servi zot soirée pou l’etude familial?
10 Ki mo pou faire si mo tousel dan mo famille? Bann ki vive tousel kapav servi soirée l’etude familial pou zot etudié personnellement. Enn bon programme l’etude personnel implik lecture la Bible, prepare bann reunion ek lire La Tour de Garde ek Réveillez-vous ! Certain proclamateur etudié enn sujet ki adapté ar zot besoin. De temps en temps, zot kapav invite enn lot proclamateur ou-soit enn famille pou ena enn discussion biblik ensam.
11, 12. Ki bann bienfait nou gagné kan nou ena enn l’etude familial regulier?
11 Ki bann bienfait nou gagné kan nou ena enn l’etude familial regulier? Bann ki engage zot avek tou zot leker dan vrai l’adoration, vinn proche ar Jéhovah. En plus, bann famille ki adore Jéhovah ensam zot vinn pli proche. Enn couple ti ecrire lor bann benediction ki zot inn gagné: “En tant ki enn couple pionnier sans zenfant, nou attann avek impatience soirée kot nou faire nou l’etude familial. Nou senti ki nou pé vinn pli proche ar nou camarade ek ar nou Papa ki dan le ciel. Asterla kan nou levé jour ki nou’nn prevoir pou etudié ensam, nou dire nou camarade: ‘To koné ki ena tantot? L’etude familial!’”
12 Disposition pou ena enn soirée pou etudié en famille, aide aussi bann famille ki bien occupé. Enn mama ki pé elevé so deux garson tousel ek ki pionnier permanent, ti ecrire: “Dan le passé, nou l’etude familial ti bien souffert. Parski mo ti fatigué, mo pa ti faire l’etude regulierement ek dan enn fason ki adapté ar mo bann zenfant. Tellement mo pa ti ena le temps ki mo pa ti koné kan mo pou faire sa. Alors mo pé ecrire pou remercié zot beaucoup pou sa soirée pou l’etude familial-la. Nou finn reussi ena enn l’etude familial regulier ek nou pé gagne bann bienfait.”
13. Quantité ki ou famille pou tire profit ar sa disposition-la pou depann lor ki kitsoz?
13 Pareil couma jour sabbat, soirée ki’nn reservé pou l’etude familial c’est enn cadeau ki nou Papa ki dan le ciel inn donné pou aide bann famille. (Jacq. 1:17) Quantité ki bann famille Israélite ti tire profit lor plan spirituel ti depann lor fason ki zot ti servi sa disposition-la. Li pareil zordi, quantité ki nou famille pou tire profit lor plan spirituel, pou depann lor fason ki nou servi sa soirée ki’nn donne nou pou nou l’etude familial-la. (2 Cor. 9:6; Gal. 6:7, 8; Col. 3:23, 24) Si ou servi bien sa disposition-la, ou famille kapav ena mem sentiment ki sa psalmiste-la: “Vinn pré ar Bondié, sa li bon pou moi. Mo finn mette mo refuge dan Souverain Seigneur Jéhovah.”—Ps. 73:28.
[L’encadré page 5]
Fodé pa ki l’etude familial li trop serieux, ek pa interessant. Au contraire, nou l’etude bizin montré ki nou pé adore nou Bondié ki heureux
[L’encadré page 6]
GARDE BIEN
Certain l’idée pou soirée ki’nn reservé pou l’etude familial
La Bible:
• Lire ensam enn portion dan lecture la Bible ki faire chaque semaine. Certain recit ki ena dan la Bible finn ecrire dan enn fason ki enn dimoune kapav lire zistoire-la, ek lezot kapav lire parole different personnage.
• Joué enn portion dan ou lecture la Bible.
• Demann chaque membre la famille pou lire sa bann chapitre la Bible-la en avance ek ecrire enn ou-soit deux question ki zot ena lor sa lecture-la. Apré sa, ensam faire bann recherche lor sakenn so bann question.
• Chaque semaine prepare enn ti carte avek enn verset la Bible ki’nn ecrire lor la ek essaye rappel ek explik sa verset-la. Faire enn collection sa bann carte-la ek ré-guette zot chaque semaine pou guetté ki quantité verset ou rappel.
• Ecoute lecture la Bible lor enregistrement audio ek suive en mem temps dan ou la Bible.
Bann reunion:
• Prepare enn partie bann reunion ensam.
• Pratik bann cantik ki ena lor programme pou la semaine.
• Si enn membre la famille ena enn sujet dan Lekol ministere theocratik, ou-soit enn demonstration dan reunion service, koz lor bann l’idée ki li kapav servi pou presente so sujet, ou-soit pratik li devant la famille.
Bann besoin la famille:
• Examine bann point dan livre Les jeunes s’interrogent ou-soit Écoute le grand Enseignant.
• Faire bann seance repetition lor couma pou faire face ar enn situation ki kapav arrivé dan lekol.
• Faire enn demonstration kot bann parent prend role bann zenfant ek bann zenfant role bann parent. Bann zenfant faire recherche lor enn sujet ek faire bann parent raisonné lor sa sujet-la.
Ministere:
• Prepare ek pratik bann presentation pou week-end ensam.
• Koz lor bann l’objectif realiste ki la famille kapav fixé pou augmente zot participation dan ministere pendant lepok Mémorial ou-soit vacance.
• Donne chaque membre la famille deux-trois minute pou guetté couma zot pou reponn different question ki kapav soulevé dan ministere ek faire bann demonstration.
Bann lezot suggestion:
• Lire enn lartik dan bann nouveau periodik ensam.
• A l’avance, demann chaque membre la famille pou lire enn lartik ki interesse li dan enn nouveau periodik, ek apré demann zot pou faire enn ti resumé.
• De temps en temps invite enn proclamateur ou-soit enn couple pou etudié ensam avek ou ek kitfois interviewé zot.
• Guette ek discute lor enn nou bann video.
• Lire ensam enn lartik “ Les jeunes s’interrogent ” ou-soit “ Apprenons en famille ” dan Réveillez-vous !
• Lire ensam lartik “ Enseignez vos enfants ” ou-soit “ Pour nos jeunes lecteurs ” dan La Tour de Garde, en français.
• Lire ek koz lor enn portion dan l’Annuaire ki’nn fek gagné ou-soit enn nouveau livre ki’nn gagné pendant dernier l’assemblée district.
• Apré ki zot inn assisté enn l’assemblée, ré-guette bann point interessant ensam.
• Observe enn creation Jéhovah, ek koz lor seki sa aprann nou lor Jéhovah.
• Travail ensam lor enn projet, couma par exemple enn maquette, enn map, ou-soit enn tableau.