Donne bann coup avek sagesse
1. Couma eski 1 Corinthiens 9:26 applik ar nou ministere?
1 L’apotre Paul ti ecrire: “Ala couma mo pé galopé: mo pa pé galope bonavini; ala couma mo pé donne bann coup: c’est pa coumadir mo pé tape coute poing dan l’air.” (1 Cor. 9:26) Ici Paul ti pé dire ki li ti reste concentré zis lor enn sel kitsoz: poursuive bann l’objectif spirituel. Mais selman, sa bann parole-la kapav applik aussi ar nou ministere. Nou envie donne “bann coup,” ou-soit faire bann zeffort, avek sagesse pou ki nou kapav gagne bann pli bon resultat. Couma nou pou faire sa?
2. Kan nou choisir kan ek kot-sa pou preché, couma nou kapav imite Paul ek bann lezot predicateur dan premier siecle?
2 Al kot bann dimoune été: Paul ek lezot predicateur dan premier siecle ti preche la kot zot ti pensé bann dimoune été. (Actes 5:42; 16:13; 17:17) Alors, si beaucoup dimoune dan nou territoire kot zot dan la soirée kitfois c’est pli bon moment pou preché lakaz par lakaz. Eski bann bus-stop ou-soit la gare bus rempli gramatin ou-soit tard dan l’apré-midi kan bann dimoune pé al travail ou-soit pé retourne lakaz? Dan nou territoire, kan eski bann l’endroit kot ena bann magasin rempli ar dimoune? Kitfois nou pou gagne pli bon resultat si nou faire la voie publik dan sa bann l’heure-la.
3. Couma nou kapav donne bann coup avek sagesse kan nou travail nou territoire?
3 Travail nou territoire avek sagesse: Pou ki nou kapav donne bann coup avek sagesse kan nou pé travail dan nou territoire, li bon ki nou veille lor certain kitsoz. Par exemple, au lieu ki beaucoup proclamateur al preché dan mem l’endroit, seki pou demann beaucoup le temps ek zeffort pou organise zot ek donne zot territoire pou travail, kitfois li pli bon ki divise groupe-la. Li pareil aussi kan faire bann territoire dan la campagne, si nou pa faire bann grand-grand groupe nou pou reussi travail territoire-la pli vite ek nou pou gagne plus l’occasion pou kozé. Eski nou kapav gagne enn territoire personnel pré kot nou lakaz, coumsa nou pa passe beaucoup le temps voyagé?
4. Ki pou aide nou vinn bann bon pecheur ki “la peche dimoune”?
4 Jésus ti compare bann predicateur ar bann pecheur ki “la peche dimoune.” (Marc 1:17) Enn pecheur so l’objectif c’est pa zis pou la peche mais pou maye poisson. C’est pou sa ki bann bon pecheur al dan bann l’endroit ek dan l’heure kot zot koné zot pou gagne poisson, ek zot commence la peche sans perdi le temps. Avredir, zot dirige zot bann zeffort avek sagesse. Anou montré mem zele dan nou ministere, nou aussi.—Héb. 6:11.