Servi enn presentation ki marché

1. Ki nou kapav aprann ar bann different presentation ki bann premier chretien ti servi?

¹ Bann premier chretien ti preche la bonne nouvelle ar bann dimoune ki sorti dan different culture ek religion. (Col. 1:23) Zot ti preche mem message​—⁠Royaume Bondié⁠—mais zot ti adapté zot presentation avek bann dimoune ar ki zot ti kozé. Par exemple, kan Pierre ti koz avek bann Juif ki ti ena enn grand respé pou bann l’Ecriture, li ti cite prophete Yoël kan li ti commence so discours. (Actes 2:14-17) Parkont, remarké dan ki fason Paul ti raisonne avek bann grec en Actes 17:22-31. Zordi, dan certain territoire bann dimoune ena respé pou Parole Bondié, ek sans hesité nou kapav servi la Bible kan nou pé preché porte en porte. Selman, kitfois nou bizin montré-nou prudent kan nou pé koz avek bann ki pa interessé ar la Bible ou-soit la religion ou-soit avek bann dimoune ki pa dan enn religion chretien.

2. Couma nou kapav servi bann publication ki pou offert pou aide bann ki interessé ek bann ki pa interessé ar la Bible?

² Servi publication ki pou offert dan enn fason efficace: Bann publication ki pou offert pendant sa l’année service-la pou changé chaque deux mois ek pou attire l’attention lor bann periodik, tract ek brochure. Mem si en general bann dimoune dan nou territoire pa interessé ar la Bible, nou pou kapav presente zot enn lartik ki interesse zot dan nou bann publication. Kitfois nou pa pou kapav lire enn verset kan nou zwenn enn dimoune premier fois ou-soit nou pa pou koz directement lor la Bible, mais si li montré l’interet nou kapav retourné avek l’objectif pou aide li ena la foi dan nou Createur ek dan So Parole inspiré. De lot coté, si nou preche dan bann territoire kot bann dimoune ena respé pou la Bible, nou kapav servi bann publication ek enn presentation ki adapté. En realité, nou kapav offert livre Ki la Bible enseigné?, bann brochure Ecoute Bondié ou-soit Ecoute Bondié ek vive pou touletan n’importe kan, mem si pé offert enn lot publication sa mois-la. Seki pli important, c’est servi enn presentation ki marché.

3. Dan ki sens leker bann dimoune dan nou territoire pareil couma la terre?

³ Prepare la terre: Leker enn dimoune pareil couma la terre. (Luc 8:15) Certain la terre bizin plus preparation avant ki la grain la verité ki ena dan la Bible kapav prend racine ek poussé. Bann predicateur dan premier siecle ti reussi plante dan tou qualité la terre, ek sa ti faire zot gagne satisfaction ek la joie. (Actes 13:48, 52) Nou kapav gagne mem succès si nou veille bien lor nou presentation.