Bann Ki Pankor Pre pou Fer Letid dan Liv Ki Labib Ansegne?—Kouma pou Ed Zot?
1. Eski tou dimounn o-komansman pou interese avek liv Ki Labib Ansegne? Explike.
1 Pou ki enn dimounn vinn enn adorater Jéhovah, li bizin aprann seki Labib ansegne. Selman, ena sertin dimounn ki dan enn relizion ki pa Kretien ek ki pa konsider Labib kouma Parol Bondie. Ena lezot ki pa krwar dan Bondie ditou ek pena respe pou Labib. Ki bann piblikasion ki’nn ed bann dimounn ki o-komansman pa ti dispoze pou aksepte liv Ki Labib Ansegne? Bann sigzesion ki ena anba zot baze lor komanter bann proklamater ki sorti dan anviron 20 diferan pei.
2. Si enn dimounn dir nou ki li pa krwar dan Bondie, ki kitsoz nou bizin esey kone, ek kifer?
2 Bann Ki Pa Krwar dan Bondie: Si enn dimounn dir ki li pa krwar dan Bondie, li bon nou kone kifer li pans koumsa. Eski se parski li krwar dan levolision? Eski li’nn perdi lafwa dan Bondie akoz linzistis ki ena dan lemond ouswa akoz lipokrizi ki ena dan bann relizion? Eski li sorti dan enn pei kot ti anpes bann dimounn krwar dan Bondie? Kitfwa li pa persiste pou dir ki Bondie pa existe, me li pa trouv sa neseser pou krwar an Li. Boukou proklamater trouve ki, kan zot demann dimounn-la si ‘touletan li ti pans koumsa’, sa ankouraz dimounn-la pou exprim li. Ekout dimounn-la ek pa koup li kan li pe koze. Kan nou konpran kifer dimounn-la pa krwar dan Bondie, nou pou kone kouma pou reponn li ek ki piblikasion pou ofer li.—Prov. 18:13.
3. Kouma nou kapav montre ki nou ena respe pou bann dimounn ek pou zot krwayans?
3 Kan nou pe reponn, evit donn linpresion dimounn-la ki nou pe kritik so lopinion. Get enn sigzesion ki sorti l’États-Unis: “Li bien inportan nou respekte liberte ki bann dimounn ena pou deside dan ki zot pou krwar. Olie ki nou diskit avek bann dimounn pou esey montre ki nou ena rezon, li pli bon nou poz bann kestion ki fer zot reflesi ek tir zot prop konklizion.” Apre ki li’nn ekout so interlokiter exprim li, enn sirveyan sirkonskripsion souvan koumans so repons koumsa: “Eski ou finn deza reflesi lor sann opsion-la?”
4. Kouma nou kapav ed bann Boudis?
4 Boukou Boudis zame pa’nn tann koz lor lexistans Bondie. Kan sertin proklamater dan l’Angleterre zwenn bann Boudis, zot kontan servi brosir La paix et le bonheur durables : comment les trouver. Apre ki zot inn get lintrodiksion, zot examinn seksion « Existe-t-il vraiment un Créateur Très-Haut ? » ek apre sa, seksion « Un guide bénéfique pour tous les humains ». Kitfwa apre, zot kapav introdir liv Ki Labib Ansegne? ek dir zot interlokiter: “Mem si ou pa krwar dan Bondie, kan ou etidie Labib ou pou gagn bann bienfe parski ena boukou konsey pratik ladan.” Enn pionie dan l’États-Unis ki pe servi dan enn teritwar Sinwa ti dir: “Boukou dimounn dan nou teritwar kontan lir. Ek souvan, zot fini lir nou bann piblikasion an-antie avan mem ki nou revizit zot. Me kitfwa zot pa arive konpran kifer bizin fer enn letid Labib. Alor, mo kontan ofer brosir Enn Bon Nouvel premie fwa ki mo zwenn bann dimounn, parski sa brosir-la inn fer dan enn fason ki ankouraz zot pou partisip dan konversasion.” Enn sirveyan sirkonskripsion ki servi dan enn sirkonskripsion kot koz Sinwa dan l’États-Unis, dir ki li posib pou introdir liv Ki Labib Ansegne? premie fwa ki nou zwenn bann dimounn. Me selman, li pou pli bon ki koumans enn letid dan sapit 2 ki koz lor Labib, plito ki dan sapit 1 ki koz lor Bondie.
5. Kifer li inportan nou ena pasians?
5 Sa pran letan avan ki enn dimounn devlop lafwa dan Bondie, akoz sa li inportan ki nou ena pasians. Nou bann premie konversasion kitfwa pa pou pous enn dimounn aksepte ki ena enn Kreater. Me kitfwa avek letan, li pou rekonet ki sa kapav posib, ouswa li kapav dir ki li konpran kifer enn dimounn kapav arive krwar ladan.
6. Kifer sertin dimounn pa interese ar Labib?
6 Bann Ki Pa Interese Ouswa Ki Pena Konfians dan Labib: Me souvan li arive ki enn dimounn ki krwar dan Bondie, pa interese ar seki Labib ansegne parski li pa krwar ki se Parol Bondie. Kitfwa li res dan enn pei kot bann dimounn pa Kretien ek li asosie Labib ar relizion Kretien. Ouswa li kapav res dan enn pei kot bann dimounn dir ki zot Kretien me zot pa relizie, ek li panse ki Labib pa pou itil pou li. Kouma nou kapav ed sa bann dimounn-la pou interese ar Labib ek apre pou aksepte enn letid dan liv Ki Labib Ansegne?
7. Sit enn bon fason pou ankouraz bann dimounn pou interese ar Labib.
7 Biro Nasional Bann Temwin Jéhovah dan Grèce ti ekrir: “Meyer fason pou ed bann dimounn ki pa interese ar Labib, se ouver Labib ek montre zot seki ena ladan. Boukou proklamater inn remarke ki mesaz ki ena dan Labib ena enn pli gran linflians lor leker bann dimounn, ki seki zotmem zot ti pou dir. (Héb. 4:12) Kan zot inn trouv nom Bondie dan Labib, sa inn ed boukou dimounn pou anvi konn plis lor seki ena dan Labib.” Biro Nasional Bann Temwin Jéhovah dan l’Inde ti ekrir: “Laverite lor lavi ek lamor vremem interes boukou Indou. Seki interes zot ankor, se promes ki Labib fer konsernan enn lemond kot pa pou ena diskriminasion an rapor avek bann kast.” Kan bann proklamater koz lor enn size ki interes bann dimounn dan zot teritwar, souvan sa donn zot lokazion pou montre seki Labib dir kouma Rwayom Bondie pou rezoud bann problem limanite.
8. Ki nou kapav dir bann dimounn ki ena bann panse negatif lor Labib akoz bann relizion ki dir zot Kretien?
8 Si enn dimounn inn gagn bann panse negatif lor Labib akoz bann relizion ki dir zot Kretien, montre li kouma sa bann relizion-la inn deform bann lansegnman Labib. Biro Nasional Bann Temwin Jéhovah dan l’Inde ti ekrir: “Parfwa nou bizin ed bann dimounn pou konpran ki bann legliz pena okenn drwa lor Labib.” Zot ti dir ki bann Indou bien souvan inpresione par seksion 4 dan brosir Quel est le but de la vie ? Comment le découvrir ?, kot explike kouma bann legliz inn rod deform ek detrir Parol Bondie. Enn pionie dan Brésil abitie demann bann dimounn: “Kifer ou pa esey aprann plis lor seki ena dan Labib? Boukou dimounn pe fer sa avek enn lespri ouver, san ki zot santi zot oblize pou form parti dan enn relizion. Kitfwa ou pou etone par seki ou aprann.”
9. Kifer nou bizin pa bes lebra si o-komansman enn kikenn pa interese ar seki Labib ansegne?
9 Jéhovah examinn leker sak dimounn. (1 Sam. 16:7; Prov. 21:2) Li pe atir bann dimounn ki ena enn leker sinser ver vre ladorasion. (Jean 6:44) Boukou parmi zot zame pa finn gagn lokazion pou aprann lor Bondie ouswa pa’nn tro gagn akse ar Labib. Nou minister donn zot posibilite pou “gagn lavi sov ek gagn enn konesans exakt lor laverite.” (1 Tim. 2:4) Alor, si o-komansman sertin pa interese ar seki Labib ansegne, pa bes lebra! Servi enn bann piblikasion ki disponib dan ou lang pou ed zot manifeste lintere. Avek letan, ou kapav kontigne konversasion-la dan liv prinsipal ki nou servi pou etidie Labib, liv Ki Labib Ansegne Vremem?
[Lankadre paz 4]
Si enn dimounn dir ki li pa krwar dan Bondie, esey fer sa:
• Pou kone kifer dimounn-la pa krwar dan Bondie, demann li: “Eski touletan ou’nn pans koumsa?”
• Si li enn Boudis, servi brosir La paix et le bonheur durables : comment les trouver, paz 9-12.
• Si li krwar dan levolision, ou kapav servi sa bann referans-la:
Seri lartik « Hasard ou conception ? » dan Réveillez-vous !
DVD Les merveilles de la création révèlent la gloire de Dieu
Bann brosir Une vie pleinement satisfaisante : comment ?, seksion 4; La vie a-t-elle été créée ?; ek Cinq questions à se poser sur l’origine de la vie
• Si li’nn perdi lafwa dan Bondie akoz bann linzistis ek soufrans, ou kapav servi sa bann referans-la:
Liv Y a-t-il un Créateur qui se soucie de vous ?, sapit 10
Bann brosir Dieu se soucie-t-il vraiment de nous ?, parti 6, ek Quel est le but de la vie ?, seksion 6
• Deswit kouma dimounn-la aksepte ki kitfwa Bondie existe, koumans letid dan liv Ki Labib Ansegne? Li pou pli bon koumans avek sapit 2 ouswa enn lot size ki apropriye pou dimounn-la.
[Lankadre paz 5]
Si enn dimounn pa krwar dan Labib, esey fer sa:
• Examinn sapit 17 ek 18 dan liv La vie : comment est-elle apparue? Évolution ou création ?
• Pou bann Indou, servi brosir Pourquoi adorer Dieu en amour et en vérité ?
• Pou bann Zwif, servi brosir Connaîtrons-nous un jour un monde sans guerre ?, paz 3-11.
• Koz lor bann bienfe ki li kapav gagne kan li swiv bann prinsip Labib. Bann piblikasion ki ou kapav servi pou montre enn dimounn bann konsey pratik ki ena dan Labib se:
Seri lartik « De l’aide pour les familles » dan Réveillez-vous !
DVD La Bible, une force dans votre vie
Bann brosir Enn Bon Nouvel Ki Sorti kot Bondie!, leson 9 ek 11; Un livre pour tous, paz 22-26; ek Une vie pleinement satisfaisante : comment ?, seksion 2
Pou bann Boudis, servi brosir La voie qui mène à la paix et au bonheur, paz 3-7.
Pou bann Mizilman, servi brosir La vraie foi : le chemin qui mène au bonheur, seksion 3.
Si ou pe pres dan enn landrwa kot bann dimounn ena enn move lopinion lor Labib, li pli bon ki o-komansman ou pa dir zot kot sa bann lansegnman-la sorti. Ou kapav fer sa apre plizir vizit.
• Explike kouma bann profesi Labib inn realize. Ou kapav servi sa bann piblikasion-la:
DVD La Bible : un récit historique exact, des prophéties dignes de foi
Brosir Un livre pour tous, paz 27-29
• Deswit kouma dimounn-la demande ki Labib ansegne lor diferan size, koumans letid dan liv Ki Labib Ansegne?
[Lankadre paz 6]
Si enn dimounn dir: “Mo pa krwar dan Bondie,” ou kapav reponn:
• “San ki mo pran ou letan, eski mo kapav explik ou ki’nn konvink mwa ki ena enn Kreater?” Apre sa, koz lor bann pwin ki ena dan liv Comment raisonner, paz 72-74, ouswa fer bann laranzman pou amenn pou dimounn-la enn piblikasion ki ou’nn apresie.
• “Me si ti ena enn Bondie, kouma ou ti pou kontan Li ete?” Laplipar dimounn dir ki zot ti pou kontan enn Bondie ki ena lamour, lazistis, ek mizerikord, enn Bondie ki pa fer preferans. Montre li atraver Labib ki Bondie ena sa bann kalite-la. (Kitfwa ou kapav servi osi sapit 1 dan liv Ki Labib Ansegne?, apartir paragraf 6.)
Si enn dimounn dir: “Mo pa krwar dan Labib,” ou kapav reponn:
• “Boukou dimounn pans koumsa. Sertin ena linpresion ki Labib se pa enn liv siantifik ouswa ki bann prinsip ki ena ladan zot pa pratik. Permet mwa demann ou: ‘Eski ou’nn deza gagn lokazion lir Labib?’ [Les dimounn-la reponn. Apre sa montre li lintrodiksion ki ena lor paz 3 dan brosir Un livre pour tous, ek ofer li brosir-la.] Boukou dimounn pa donn Labib linportans parski bann relizion inn deform so bann lansegnman. Prosenn fwa, mo ti pou kontan retourne pou koz lor lexanp ki ena lor paz 4 ek 5.”
• “Boukou dimounn pans parey kouma ou. Me permet mwa montre ou enn kitsoz ki’nn inpresionn mwa konsernan Labib? [Lir Job 26:7 ouswa Isaïe 40:22, pou montre ki Labib li exakt kan li koz lor sians.] Labib donn osi bann bon konsey pou ed bann fami. Prosenn fwa, mo ti pou kontan montre ou enn lexanp.”
• “Mersi ki ou’nn dir mwa sa. Me dir mwa, si Bondie vremem ti ekrir enn liv pou limanite, ki ou panse ti pou ena ladan?” Apre sa, atraver enn verse montre dimounn-la ki Labib dakor avek seki li’nn dir.