Parole Jéhovah vivant

PROPHETE Jérémie trouve realisation message jugement ki li ti pé annoncé pendant 40 an. Ki li ressenti kan, avek so prop lizié, li trouve destruction so la-ville ki li bien content? L’introduction livre Lamentations dan version La Septante en grec dire: “Jérémie ti assizé, li ti lamenté setadir li ti ploré lor [la ville] Jérusalem ek li ti dire douleur ki li ti ressenti.” Souvenir sa 18 mois kot bann Babylonien ti encerclé Jérusalem ek seki ti arrivé kan zot ti brule la ville-la ti encore frais dan l’esprit Jérémie kan li ti ecrire livre Lamentations en 607 a.n.l. Sa livre-la raconte bien la peine ki li ti ena dan so leker. (Jérémie 52:3-5, 12-14) Jamais dan l’histoire, bann dimoune finn plore lor enn la-ville avek bann parole ki casse leker coumsa.

Dan livre Lamentations ena cinq poem ki aussi bann chanté. Premier quatre poem-la, zot bann chanté deuil; cinquieme-la li enn requete, ou-soit enn la-priere. Bann premier poem-la, zot bann acrostiche, setadir chaque verset commence par enn lettre l’alphabet dan l’ordre sa 22 lettre ki ena dan l’alphabet hébreu-la. Mem si cinquieme chanté ena 22 verset, setadir mem quantité lettre ki ena dan alphabet hébreu, li pa en ordre alphabetik.—Lamentations 5:1, note.

“MO LIZIÉ INN FATIGUÉ AR PLORÉ”

(Lamentations 1:1–2:22)

“Ah guette couma li’nn assizé li tousel, sa la-ville kot ti ena enn quantité dimoune-la! Li’nn vinn pareil couma enn veuve, li, ki parmi bann peuple, ti enn la-ville kot ti ena beaucoup dimoune! Li, ki ti enn la-princesse parmi bann district administratif, li’nn vinn bon pou travail forcé!” C’est par sa bann parole-la ki bann chanté deuil prophete Jérémie lor la ville Jérusalem commencé. Jérémie donne raison kifer sa malheur-la inn arrivé. Li dire: “Jéhovah Li-mem inn donne li sa chagrin-la parski li’nn faire beaucoup kitsoz ki kont la loi.”—Lamentations 1:1, 5.

Jérusalem, li representé par enn veuve ki’nn perdi so mari ek so bann zenfant ek li demandé: “Eski ena enn douleur ki pareil couma mo douleur?” Li prié Bondié concernant so bann l’ennemi ek li demandé: “Faire ki tou zot mechanceté vinn devant toi, ek puni zot pareil couma to’nn puni moi a cause tou mo bann peché. Parski mo pa pé arrete soupiré, ek mo leker pé souffert.”—Lamentations 1:12, 22.

Jérémie dan enn grand chagrin ek li dire: “Dan so grand colere, [Jéhovah] inn coupe tou corne Israël. Devant l’ennemi, li’nn ramasse so la-main droite par derriere; ek Li pé contigne brulé dan Jacob couma enn grand difé ki’nn ravage partout kot li passé.” Jérémie raconte so grand chagrin kan li ploré ek li dire: “Mo lizié inn fatigué ar ploré. Mo l’intestin pé viré. Mo lé-foie inn devidé net lor la terre.” Mem bann ki ti pé passé, ti etonné ek ti dire: “Eski concernant sa la-ville-la-mem ki zot ti habitué dire, ‘pena okenn beauté ki pli parfait ki li, li enn grand la-joie pou la terre’?”—Lamentations 2:3, 11, 15.

Reponse pou bann question biblik:

1:15—Couma eski Jéhovah ti’nn “crase raisin dan pressoir tifi Juda ki enn vierge”? Kan bann Babylonien inn detruire la ville ki comparé avek enn vierge, zot inn tellement verse beaucoup di-sang ki sa ti coumadir kan crase raisin dan enn pressoir. Jéhovah ti annonce sa ek Li ti laisse sa arrivé. Alors kapav dire ki c’est Li ki ti’nn “crase raisin dan pressoir.”

2:1—Couma eski’nn ‘tire beauté Israël dan le ciel ek inn jette sa enba lor la terre’? “Le ciel pli haute ki la terre.” Alors parfois kan bann kitsoz ki ti dan enn grand position perdi zot grandeur, c’est coumadir ‘tire zot dan le ciel ek jette zot enba lor la terre.’ Inn jette “beauté Israël,” setadir so la-gloire ek pouvoir ki li ti ena kan Jéhovah ti pé donne li so benediction, kan bann Babylonien inn detruire Jérusalem ek kan Juda inn vinn enn pays abandonné.—Isaïe 55:9.

2:1, 6—Ki été “ti banc” ek “cabane” Jéhovah? Enn ecrivain Psaume ti chanté: “Anou rente dan so tabernacle ki extraordinaire; anou prosterne devant so ti banc kot Li pose so lipié.” (Psaume 132:7) Alors “ti banc” ki mentionné dan Lamentations 2:1, c’est lakaz kot adore Jéhovah, setadir so temple. Bann Babylonien “ti brule lakaz Jéhovah” pareil coumadir sa ti enn cabane, ou-soit, enn ti lakaz dan enn jardin.—Jérémie 52:12, 13.

2:16, 17—Eski verset 16 pa ti bizin commence avek lettre hébreu ayin ek verset 17 avek pé, pou suive l’ordre l’alphabet hébreu? Kan bann ecrivain inspiré ti compose bann poem dan sa style-la, zot ti habitué suive l’ordre l’alphabet. Mais zot ti evite faire sa kan bann parole-la pa ti parette naturel. Pou zot, l’idée ki zot ti ena pou transmette ti pli important ki zis suive enn certain fason ecrire ki ti pou aide bann dimoune pou rappel bann parole. Dan troisieme ek quatrieme chanté ki ena dan livre Lamentations, nou trouve enn lot cas kot pa’nn suive l’ordre bann lettre l’alphabet hébreu.—Lamentations 3:46, 49; 4:16, 17.

2:17—Ki “parole” precis Jéhovah ti realisé en rapport avek Jérusalem? Ici li mentionne Lévitique 26:17 ki dire: “Oui, mo pou tourne moi kont zot ek zot vrai-mem zot bann l’ennemi pou gagne la victoire lor zot; bann ki ena la haine pou zot pou faire dominere ar zot, ek vrai-mem zot pou sauvé sans ki personne galope derriere zot.”

Bann leson pou nou:

1:1-9. Jérusalem ploré beaucoup pendant la nuit, ek so bann larme pé coulé lor so la-joue. So bann la-porte reste abandonné, ek so bann pretre pé plaigné. So bann jeune fille vierge bien chagrin, ek li-mem li bien amer. Kifer? Parski Jérusalem inn vrai-mem faire peché. So l’impureté dan bord so linge enba. Peché pa faire gagne la joie mais plutot larme, plaigné, chagrin, ek li faire nou vinn amer.

1:18. Kan Jéhovah puni bann ki’nn faire peché, Li touletan agir avek justice.

2:20. Jéhovah ti averti bann Israélite ki si zot pa ecoute Li, bann malediction ti pou vinn lor zot. Par exemple, zot ti pou mange ‘la chair zot bann garson ek la chair zot bann tifi.’ (Deutéronome 28:15, 45, 53) Li pa sage si nou choisir pou desobeir Bondié, pa vrai?

“PA BOUCHE TO ZOREILLE KAN MO DEMANN TOI POU SOULAGE MOI”

(Lamentations 3:1–5:22)

Lamentations chapitre 3 koz lor nation Israël couma enn “zom fort.” Malgré bann problem ki li pé gagné, sa zom fort-la chanté: “Jéhovah bon pou sa kikenn ki ena l’espoir en Li-la, pou sa dimoune ki contigne rod Li-la.” Dan la priere li demann vrai Bondié: “Fodé to tann mo la-voix. Pa bouche to zoreille kan mo demann toi pou soulage moi, kan mo criyé toi pou gagne l’aide.” Li demann Jéhovah pou prend compte seki l’ennemi ti pé faire li. Li dire: “Ah Jéhovah, to pou traite zot dapré seki zot inn faire ar zot la-main.”—Lamentations 3:1, 25, 56, 64.

Bann Babylonien ti encerclé Jérusalem pendant 18 mois. Jérémie devide so leker, li ploré ek li raconte seki li ressenti concernant bann mauvais consequence ki sa finn ena. Li dire: “Punition pou faute ki tifi mo peuple inn faire, vinn pli grand ki punition ki Sodome inn gagné pou so peché, li, ki ti detruire coumadir enn sel coup, sans ki okenn la-main tourne vers li pou aide li.” Jérémie contigne dire: “Vaut mieux bann ki mort par l’epée ki bann ki mort par la famine, a cause bann ki mort par la famine, zot deperi, zot souffert beaucoup parski bann karo pa produire assez [mangé].”—Lamentations 4:6, 9.

Dan cinquieme poem, c’est bann habitant Jérusalem ki kozé. Zot dire: “Ah Jéhovah, pa blié seki’nn arrive nou. S’il te plait, guette nou ek trouve sa la-honte ki lor nou-la.” Letan ki zot pé raconte zot bann problem, zot demandé: “Mais toi, ah Jéhovah, to pou règne pou touletan. To trone, li la-mem, generation apré generation. Ah Jéhovah, faire nou ré-vinn vers toi, ek sans hesité nou pou retourné. Donne nou bann nouveau jour couma longtemps.”—Lamentations 5:1, 19, 21.

Reponse pou bann question biblik:

3:16—Ki sa vedir sa l’expression: “Li faire mo lé-dent cassé avek bann ti roche”? Enn livre reference dire: “Kan bann Juif ti pé al en exil, zot ti obligé cuit zot di-pain dan bann trou ki zot ti fouillé dan la terre. Alors bann ti roche ti rente dan zot di-pain.” Kan zot ti mange sa di-pain-la, sa ti kapav casse enn boute dan zot lé-dent.

4:3, 10—Kifer Jérémie dire ki “tifi [so] peuple” pareil couma “bann autruche dan desert”? Job 39:16 dire ki enn autruche “maltraite so bann piti, coumadir zot pa pou li.” Par exemple, apré ki bann dizef inn eclo, mama-la quitte so bann piti ek li al ensam avek bann lezot femelle pendant ki papa-la prend soin bann piti. Ek ki arrivé kan bizin faire face ar enn danger? Male ek femelle toulé-deux sauvé, quitte zot nik ek abandonne zot bann piti. Kan l’armée Babylone ti encerclé la ville Jérusalem, la famine ti tellement grand ki bann mama ki en general ena pitié, ti agir dan enn fason cruel envers zot prop zenfant, pareil couma bann autruche dan desert. Sa li bien different avek bann chacal ki prend bien soin zot bann piti.

5:7—Eski bann dimoune responsable devant Jéhovah pou bann peché ki zot bann grand-dimoune inn faire? Non, Jéhovah pa puni bann dimoune directement pou peché ki zot bann ancetre ti’nn faire. La Bible dire: “Sakenn pou rann compte pou li-mem devant Bondié.” (Romains 14:12) Mais, consequence bann peché kapav resté ek bann generation ki vini plitar, zot aussi zot kapav paye sa bann consequence-la. Par exemple, a cause peuple Israël ti tombe dan l’idolatrie dan le passé, plitar li ti pli difficile pou bann Israélite reste attaché ar seki droite, mem si zot ti fidel.—Exode 20:5.

Bann leson pou nou:

3:8, 43, 44. Pendant ki malheur ti abatte lor Jérusalem, Jéhovah ti refuse ecoute bann habitant ki ti pé criyé Li pou gagne l’aide. Kifer? Parski zot ti’nn desobeir Bondié ek zot pa ti repenti. Si nou envie ki Jéhovah reponn nou bann la-priere, nou bizin obeir Li.—Proverbes 28:9.

3:20. Jéhovah ki “Pli Grand lor la terre entier,” tellement grand ki Li abaisse-Li “pou guette le ciel ek la terre.” (Psaume 83:18; 113:6) Pourtant, Jérémie ti bien koné ki Tout-Puissant disposé pou abaisse-Li ziska bann dimoune, setadir vinn mem niveau ki zot pou Li encourage zot. Nou kapav content ki vrai Bondié pa zis ena enn puissance ek enn sagesse ki pena limite, mais Li aussi ena l’humilité!

3:21-26, 28-33. Couma nou kapav endure mem bann grand souffrance? Jérémie dire nou ki nou bizin faire. Fodé pa nou blié ki Jéhovah agir avek beaucoup l’amour fidel ek ki Li ena beaucoup misericorde. Nou bizin rappel aussi ki zis parski nou vivant, sa-mem assez pou donne nou enn raison pou garde l’espoir. Nou bizin pa blié aussi ki nou bizin ena patience ek attann Jéhovah en silence, sans plaigné, pou Li delivré nou. En plus nou bizin ‘mette nou la-bouche dan la poussiere,’ setadir accepté bann l’epreuve avek l’humilité parski nou reconette ki Jéhovah ena so bann raison pou laisse sa arrivé.

3:27. Kitfois la foi enn jeune pou passe par bann l’epreuve kan li trouve-li devant bann difficulté ek kan lezot bouffonne li. Mais livre Lamentations dire ki “li bon ki enn zom fort sarié joug dan so jeunesse.” Kifer? Parski kan enn dimoune aprann sarié joug souffrance dan so jeunesse, sa prepare li pou faire face ar bann difficulté ki li pou gagné plitar dan so la-vie.

3:39-42. Li pa bon ki nou “plaigné” kan nou souffert a cause nou bann peché. Au lieu ki nou plaigné parski nou pé recolté consequence nou mauvais action, “anou guette bien seki nou pé faire ek examine zot bien, ek anou ré-vinn vers Jéhovah.” Li bon ki nou repenti ek corrige nou maniere vive.

Mette ou confiance en Jéhovah

Livre Lamentations faire nou koné couma Jéhovah ti considere Jérusalem ek pays Juda apré ki bann Babylonien ti brule la ville ek ti laisse pays Juda abandonné. Par bann l’expression ki Jérémie servi dan sa livre-la, li reconette ki le peuple inn faire peché. Sa montré nou dan enn fason bien clair ki pou Jéhovah, peuple Israël ti konn sa malheur-la a cause zot peché. Dan bann chanté inspiré ki ena dan sa livre-la, ena bann parole ki exprime l’espoir en Jéhovah ek desir pou prend bon direction. La plupart dimoune dan lepok Jérémie pa ti pense coumsa, mais sa bann parole-la represente seki Jérémie ek sa reste ki ti repenti-la zot, zot ti pensé.

Dan livre Lamentations, nou aprann deux leson important dan fason ki Jéhovah examine situation Jérusalem. Premierement, destruction Jérusalem ek desolation Juda pousse nou pou obeir Jéhovah ek sa servi couma enn l’avertissement pou ki nou pa ignore So volonté. (1 Corinthiens 10:11) Nou aprann deuxieme leson dan l’exemple ki Jérémie inn donné. (Romains 15:4) Mem dan enn situation ki ti parette desesperé ek kot li ti bien chagrin, Jérémie ti tourne-li vers Jéhovah pou li gagne delivrance. Li vrai-mem bien important ki nou mette tou nou confiance dan Jéhovah ek dan so Parole!—Hébreux 4:12.

[Zimage, page 9]

Prophete Jérémie ti trouve realisation message jugement ki li ti annoncé

[Zimage, page 10]

La foi sa bann Témoin coréen-la ti testé lor question neutralité