Bann dimoune juste pou loué Bondié pou touletan
“Souvenir enn dimoune juste pou reste pou touletan . . . So justice reste pou touletan.”—PS. 112:6, 9.
1. (a) Ki l’avenir extraordinaire pé attann bann dimoune ki Bondié considere couma juste? (b) Ki question nou kapav posé?
C’EST vrai-mem enn l’avenir extraordinaire ki pé attann tou bann dimoune ki Bondié considere couma juste! Pou touletan zot pou content pou aprann plus lor bann grand qualité ki Jéhovah ena. Zot pou envie loué Bondié a mesure ki zot aprann plus encore lor so creation. Pou nou kapav profite sa l’avenir extraordinaire-la nou bizin manifesté la “justice” ek Psaume 112 mette l’accent lor sa qualité-la. Mais couma Jéhovah, enn Bondié ki saint ek ki juste kapav considere bann dimoune imparfait couma bann dimoune juste? En realité, n’importe ki quantité zeffort nou faire pou faire seki juste, nou commette bann erreur, ek parfois bann erreur bien grave.—Rom. 3:23; Jacq. 3:2.
2. Ki deux mirak Jéhovah ti faire par amour?
2 Avek amour, Jéhovah ti trouve enn moyen parfait pou sa. Ki Li’nn faire? Premierement, Li ti faire enn mirak: Li ti transfere la vie so Garson ki Li content ek ki ti avek Li dan le ciel, dan ventre enn vierge pou li kapav né couma enn dimoune parfait. (Luc 1:30-35) Deuxiemement, apré ki bann l’ennemi ti touye Jésus, Jéhovah ti faire enn lot mirak extraordinaire. Bondié ti ressuscite li couma enn creature spirituel ek ti donne li enn grand la gloire.—1 Pierre 3:18.
3. Kifer Bondié ti content pou recompense so Garson kan Li ti donne li la vie dan le ciel?
3 Jéhovah ti recompense so Garson kan Li ti donne li enn kitsoz ki li pa ti ena avant li vinn lor la terre: enn la vie dan le ciel, enn la vie ki pa kapav detruire. (Héb. 7:15-17, 28) Jéhovah ti content pou faire sa parski Jésus ti’nn garde enn fidelité parfait dan bann l’epreuve bien difficile. C’est coumsa ki Jésus ti donne so Papa pli bon reponse ki ena, oui, enn reponse complet kont l’accusation ki Satan ti faire, ki bann dimoune servi Bondié avek bann mobile egoïste ek pa par enn l’amour sincere.—Prov. 27:11.
4. (a) Apré ki li’nn retourne dan le ciel, ki Jésus inn faire pou nou, ek couma Jéhovah ti reagir? (b) Ki ou ressenti kan ou mazinn tou seki Jéhovah ek Jésus inn faire pou ou?
4 Dan le ciel, Jésus ti faire enn lot kitsoz encore. Li ‘ti parette pou nou devant Bondié en personne’ avek valeur “so prop di-sang.” Nou bon Papa dan le ciel ti accepté avek compassion sa offrande ki Jésus ti faire ek ki ena enn grand valeur-la couma “enn sacrifice ki couvert nou bann peché.” Grace a sa, avek enn ‘conscience pur’ nou kapav offert “Bondié enn service sacré.” Sa donne nou enn bon raison pou ki nou aussi nou dire sa bann parole ki commence Psaume 112-la: “Loué Yah!”—Héb. 9:12-14, 24; 1 Jean 2:2.
5. (a) Ki nou bizin faire pou garde enn position ki juste devant Bondié? (b) Dan ki fason Psaume 111 ek Psaume 112 inn ecrire?
5 Pou nou kapav contigne garde enn position ki juste devant Bondié, nou bizin contigne ena la foi dan di-sang ki Jésus inn versé. Alors, fodé pa nou laisse enn sel jour passé sans ki nou remercié Jéhovah pou so grand l’amour ki Li ena pou nou. (Jean 3:16) Nou bizin aussi contigne etudié Parole Bondié ek faire tou seki nou kapav pou vive en accord avek so message. Dan Psaume 112, ena bann bon conseil pou tou seki envie garde enn conscience pur devant Bondié. Sa Psaume-la ena enn rapport avek Psaume 111. Toulé-deux commence par l’expression “Loué Yah!” ou-soit “Alleluia!” ek zis apré ena 22 la ligne ki suive, sakenn commence par enn lettre alphabet hébreux dan l’ordre.a
Enn base pou nou heureux
6. Couma sa “kikenn” ki ena la crainte pou Bondié-la li beni dapré Psaume 112?
6 “Heureux sa kikenn ki ena la crainte pou Jéhovah-la, li’nn suive so bann commandement avek enn grand plaisir. So descendance pou vinn puissant lor la terre. Generation bann dimoune droite li, li pou beni.” (Ps. 112:1, 2) Remarké ki en premier, sa psalmiste-la mentionne zis enn “kikenn” ek apré dan dernier partie verset 2, li koz lor “bann dimoune droite.” Sa faire nou comprend ki Psaume 112 kapav pé faire reference ar enn groupe kot ena beaucoup dimoune. Li interessant pou remarké ki l’apotre Paul ti inspiré pou applik Psaume 112:9 en rapport avek bann chretien dan premier siecle. (Lire 2 Corinthiens 9:8, 9.) Oui, sa psaume-la montré vrai-mem pou ki raison bann disciple Christ lor la terre kapav heureux zordi!
7. Kifer li important ki bann serviteur Bondié ena la crainte pou Li, ek ki sentiment ou bizin ena pou bann commandement Bondié?
7 Couma nou trouvé dan Psaume 112:1, sa bann vrai chretien-la zot konn enn grand bonheur parski zot contigne ena “la crainte pou Jéhovah.” Sa la crainte ki zot ena pou deplaire Jéhovah-la aide zot pou resisté kont l’esprit ki ena dan le monde Satan. Zot trouve “enn grand plaisir” pou etudié Parole Bondié ek pou obeir so bann commandement. Parmi ena commandement pou preche la bonne nouvelle Royaume Bondié partout lor la terre. Zot faire zeffort pou faire bann disciple parmi bann dimoune dan tou nation ek en mem temps zot averti bann mauvais dimoune ki jour jugement Bondié pé vini.—Ézék. 3:17, 18; Mat. 28:19, 20.
8. (a) Couma bann serviteur Bondié ki bien devoué finn recompensé pou zot zele zordi? (b) Ki benediction bann ki ena l’esperance pou vive lor la terre pou gagné dan l’avenir?
8 Parski zot obeir sa bann commandement-la, zordi bann serviteur Bondié lor la terre zot plus ki sept million. Kisannla kapav dire ki sa peuple-la pa’nn vinn “puissant lor la terre”? (Jean 10:16; Rév. 7:9, 14) Sa peuple-la pou vrai-mem “beni” a mesure ki Bondié pou realise so projet! En tant ki enn groupe, bann dimoune ki ena l’esperance pou vive lor la terre pou gagne la vie sauve pendant “la grande tribulation” ki pé vini ek zot pou forme “enn nouveau la terre” kot “pou ena la justice.” Kan ler pou arrivé, bann ki pou reussi traverse vivant Har-Maguédôn “pou beni” encore plus. Zot pou la pou accueillir plusieurs million dimoune ki pou ressuscité lor la terre. C’est vrai-mem enn privilege extraordinaire ki ena devant zot! Finalement, bann ki trouve “grand plaisir” dan bann commandement Bondié pou vinn parfait ek zot pou profite pou touletan “liberté extraordinaire bann zenfant Bondié.”—2 Pierre 3:13; Rom. 8:21.
Servi la richesse avek sagesse
9, 10. Couma bann vrai chretien finn servi zot richesse spirituel, ek couma zot justice pou reste pou touletan?
9 “Ena bann kitsoz ki ena valeur ek bann richesse dan so lakaz; ek so justice reste pou touletan. Li’nn apparette dan enn grand noirté couma enn la lumiere pou bann dimoune droite. Li ena compassion, misericorde ek justice.” (Ps. 112:3, 4) Dan lepok biblik, beaucoup dimoune ti konn certain serviteur Bondié pou zot richesse. Dan enn lot sens, bann ki ena faveur Bondié zot vrai-mem vinn riche, mem si li pa lor plan materiel. En realité, la plupart dimoune ki accepté pou humilié-zot devant Bondié, kitfois zot misere ek dimoune meprise zot, pareil couma sa ti été dan lepok Jésus. (Luc 4:18; 7:22; Jean 7:49) Mais ki enn dimoune li riche ou-soit misere lor plan materiel, li possible pou li vinn riche lor plan spirituel.—Mat. 6:20; 1 Tim. 6:18, 19; lire Jacques 2:5.
10 Bann chretien oint ek zot bann compagnon, pa garde zot richesse spirituel pou zot. Au contraire, dan le monde Satan, enn le monde kot ena noirté spirituel, zot “apparette” “couma enn la lumiere pou bann dimoune droite.” Zot faire sa kan zot aide lezot pou profite bann tresor spirituel couma la sagesse ek connaissance Bondié. Bann ki opposé ar peuple Bondié inn essaye arrete predication lor Royaume Bondié mais zot pa’nn reussi. Au contraire, fruit ki sa travail juste-la inn accompli, pou “reste pou touletan.” Kan bann serviteur Bondié reste attaché ar la justice malgré bann l’epreuve, zot kapav sur ki zot pou vive pou touletan, oui zot aussi zot pou “reste pou touletan.”
11, 12. Cite certain fason couma peuple Bondié servi bann kitsoz materiel ki zot ena.
11 Peuple Bondié, setadir bann chretien oint ek bann membre ‘la grande foule’ toulé-deux, finn montré ki zot genereux en rapport avek bann kitsoz materiel. Psaume 112:9 dire: “Li ti partage avek generosité; li ti donne bann pauvre.” Dan nou lepok, souvent bann vrai chretien faire bann don materiel pou aide lezot chretien ek mem zot bann voisin ki dan le besoin. Zot servi aussi bann kitsoz materiel pou soutenir bann secours kan ena bann catastrophe. Pareil couma Jésus ti dire, sa aussi c’est enn kitsoz ki faire zot heureux.—Lire Actes 20:35; 2 Corinthiens 9:7.
12 En plus, mazinn bann depense ki faire pou imprime sa periodik-la dan 172 langue, ek beaucoup parmi sa bann langue-la c’est bann dimoune misere ki koz sa. Reflechi aussi ki sa periodik-la li disponible en plusieurs langue des signe pou bann dimoune ki sourde, ek aussi en braille, pou bann ki aveugle.
Compassion ek justice
13. Kisannla ki’nn donne pli bon l’exemple kan zot inn donne avek compassion, ek couma nou kapav imite zot l’exemple?
13 “Sa kikenn ki ena compassion ek ki preté-la, li bon.” (Ps. 112:5) Surement ou finn deja remarké ki bann dimoune ki aide lezot, pa touletan ena compassion. Certain zot donné pou montré ki zot ena plus ki lezot, ou-soit zot donné a cause ki a faire. Sa pa faire nou plaisir pou gagne l’aide ar enn kikenn ki faire nou senti ki nou inferieur ou-soit ki nou enn fardeau. Mais, c’est enn grand difference kan nou gagne l’aide ar enn kikenn ki ena compassion. Nou senti-nou encouragé. Jéhovah Li-mem donne nou pli grand l’exemple enn Kikenn ki ena compassion ek ki donne avek la joie. (1 Tim. 1:11; Jacq. 1:5, 17) Jésus Christ ti reflete compassion so Papa dan enn fason parfait. (Marc 1:40-42) Alors, pou ki Bondié considere nou couma bann dimoune juste, nou bizin donne avek la joie ek avek compassion, surtout dan predication kan nou donne enn l’aide spirituel nou prochain.
14. Cite certain fason couma nou kapav ‘soutenir nou bann zaffaire avek justice.’
14 “Li reglé so bann zaffaire avek justice.” (Ps. 112:5) Couma sa ti annoncé, groupe l’intendant fidele prend soin bann di-bien so Maitre en accord avek la justice Jéhovah. (Lire Luc 12:42-44.) Nou trouve sa kan nou considere direction biblik ki donne bann ancien, ki parfois bizin occupe bann cas kot certain inn commette bann peché bien grave dan congregation. L’esclave fidele agir dan enn fason juste ek nou trouve sa aussi dan direction biblik ki li donne tou bann congregation, bann lakaz missionnaire ek bann Béthel pou zot kapav bien fonctionné. Pa zis bann ancien ki bizin ena la justice, mais lezot chretien aussi bizin montré sa qualité-la dan fason ki zot traite sakenn zot camarade, bann dimoune ki pa servi Jéhovah, ek mem kan zot faire business.—Lire Mika 6:8, 11.
Bann benediction pou bann dimoune juste
15, 16. (a) Ki l’effet bann mauvais nouvelle ki ena dan le monde ena lor bann dimoune juste? (b) Ki bann serviteur Bondié bien decidé pou contigne faire?
15 “Parski jamais li pou manké tombé. Souvenir enn dimoune juste pou reste pou touletan. Li pa pou mem peur bann mauvais nouvelle. So leker ferme ek ena confiance en Jéhovah. So leker solide; li pa pou peur, ziska ki li guette so bann l’ennemi.” (Ps. 112:6-8) Jamais avant dan l’histoire pa finn ena sa quantité mauvais nouvelle-la lor la terre: la guerre, terrorisme, bann nouveau maladie ek bann maladie ki pé reapparette, crime, misere ek pollution ki pé detruire la terre. Bann ki Bondié considere couma bann dimoune juste zot aussi zot affecté par sa bann mauvais nouvelle-la, mais sa pa faire zot peur l’avenir. Au contraire, zot leker “ferme” ek “solide” parski zot guette l’avenir avek confiance, zot koné ki le monde nouveau ek juste ki Bondié inn promette li pré. Si arrive zot bann malheur, zot pli kapav faire face ar sa parski zot compte lor Jéhovah pou gagne l’aide. Jamais Li pa permette ki so bann serviteur juste “manké tombé”—Li donne zot l’aide ek la force pou endure bann malheur.—Phil. 4:13.
16 Bann serviteur juste ki servi Bondié zot bizin aussi supporte la haine ek bann fausseté ki zot bann opposant fané lor zot, mais jamais sa pa’nn faire bann vrai chretien arrete preché ek jamais sa pou faire zot arrete preché. Au contraire, bann serviteur Bondié contigne reste ferme ek solide dan travail ki Jéhovah inn donne zot—preche la bonne nouvelle lor Royaume Bondié ek faire bann disciple parmi bann dimoune interessé. Pena doute ki bann dimoune juste pou gagne plus l’opposition a mesure ki la fin pé kosté. Sa la haine-la pou vinn pli fort kan Satan le Diable, dan so role Gog de Magog pou attak zot partout lor la terre. Lerla enfin, nou pou kapav ‘guette nou bann l’ennemi’ perdi la victoire. Sa pou vrai-mem enn grand l’experience pou trouve nom Jéhovah sanctifié dan enn fason complet!—Ézék. 38:18, 22, 23.
“Li pou elevé avek la gloire”
17. Couma sa kikenn ki juste-la pou “elevé avek la gloire”?
17 Li pou vrai-mem enn grand plaisir pou loué Jéhovah dan l’unité, sans okenn l’opposition ar Satan ek so le monde! Sa bonheur-la pou enn recompense eternel ki tou bann ki reste juste devant Bondié pou gagné. Zot pa pou bizin courbé avek la honte devant zot l’ennemi, parski Jéhovah ti aussi promette ki so serviteur juste “pou elevé avek la gloire.” (Ps. 112:9) Sa serviteur Jéhovah ki juste-la pou dan la joie kan li pou trouve tou bann l’ennemi souveraineté Jéhovah, tombé.
18. Couma bann dernier parole Psaume 112 pou realisé?
18 “Sa mauvais dimoune-la pou trouvé ek vrai-mem li pou en colere. Li pou grince so lé-dent ek vrai-mem li pou fonn. Desir bann mauvais dimoune pou fini net.” (Ps. 112:10) Tou bann ki contigne oppose-zot ar peuple Bondié bientot coumadir zot pou “fonn” ensam avek zot jalousie ek zot la haine. Zot desir pou trouve nou travail arreté, pou fini net avek zot pendant “la grande tribulation.”—Mat. 24:21.
19. Ki kitsoz nou kapav sur?
19 Eski ou pou forme parti parmi bann dimoune heureux ki pou survive sa grand victoire-la? Ou-soit, si arrivé ki a cause maladie ou-soit la vieillesse, ou mort avant ki le monde Satan detruire, eski ou pou parmi “bann dimoune ki juste” ki pou ressuscité? (Actes 24:15) Ou pou kapav dire oui, si ou contigne ena la foi dan sacrifice Jésus ek si ou imite Jéhovah pareil couma tou bann dimoune ki representé par “sa kikenn” ki juste, mentionné dan Psaume 112-la. (Lire Éphésiens 5:1, 2.) Jéhovah pou veillé ki jamais pa blié “souvenir” sa bann dimoune juste-la ek tou bann action juste ki zot inn faire. Jéhovah pou rappel zot ek pou content zot pou touletan.—Ps. 112:3, 6, 9.
[Note]
a Kan nou guette fason ki’nn ecrire sa deux psaume-la ek seki zot dire, nou trouvé ki ena enn lien entre zot. Psaume 111 loué bann qualité ki Bondié ena. Dan Psaume 112, sa “kikenn” ki ena la crainte pou Bondié-la, li imite sa bann qualité-la. Nou kapav trouve sa kan nou compare Psaume 111:3, 4 avek Psaume 112:3, 4.
Question lor ki nou kapav medité
• Cite certain raison ki nou ena pou dire “Alleluia.”
• Pou ki raison bann vrai chretien kapav heureux dan nou lepok?
• Dan ki fason Jéhovah content ki nou donné?
[Zimage lor page 25]
Pou reste juste devant Bondié, nou bizin ena la foi dan di-sang ki Jésus inn versé
[Zimage lor page 26]
Bann contribution ki nou faire avek tou nou leker kapav aidé pou secours lezot ek faire tou dimoune gagne bann publication biblik