Ki Lespwar Ena pou Mo Bann Anset?

GET kestion ki, pa tro lontan, ti aparet lor premie paz The Chosun Ilbo, enn zournal Koreen: “‘Extraordiner Shim Cheong,’ Ki Pa Ti Konn Nanye lor Jésus​—Eski Li’nn Al dan Lanfer?”

Boukou dimounn ti ankoler kan zot ti trouv sa tit-la. Kifer? Se parski, dapre enn zistwar bien renome dan Corée, Shim Cheong se enn zenn tifi ki’nn sakrifie so lavi pou ed so papa ki ti aveg. Avek letan, bann dimounn finn donn li boukou loner. An realite, dan Corée, bann dimounn konsider Shim Cheong kouma enn model parski li ti enn tifi bien devwe.

Kan zot inn tande ki enn kikenn koumsa pou pini dan enn lanfer dife zis parski li pa ti enn Kretien ki batize, boukou inn konsider sa kouma enn linzistis, mem kouma enn gran ofans. Apre tou, li paret ki zistwar Shim Cheong inn arive bien lontan avan ki bann dimounn dan so vilaz ti tann mesaz Christ.

Dan sa lartik-la ena osi interview enn pret. Zot ti poz li sa kestion-la: Eski tou bann dimounn ki’nn mor san ki zot gagn lokazion pou aprann lor Jésus, inn kondane pou al dan lanfer? Li ti reponn: “Nou pa kone. Nou sipoze ki Bondie inn prevwar enn kitsoz pou sa bann dimounn-la.”

ENN KONDISION POU GAGN LAVI SOV

Gete ki Nouvelle Encyclopédie catholique (an Angle) dir: “Pou ki enn dimounn gagn lavi sov, li bien inportan ki li pran batem. Parey kouma Christ limem ti dir, enn kikenn pa kapav rant dan Rwayom Bondie, amwin ki li’nn ne ankor enn fwa avek delo ek Lespri Sin (Jn 3.5).” Akoz sa, boukou krwar ki Bondie pou zet tou bann ki’nn mor san ki zot inn pran batem, dan enn lanfer dife ouswa pou fer zot soufer dan enn lot fason, apre zot lamor.

Me ena boukou ki konsider sa krwayans-la kouma enn kitsoz bien bet. Plizir milyon dimounn inn mor san ki zot konn Labib. Eski zot merit al dan enn lanfer dife kot zot pou tourmante pou touletan? Ki Labib dir lor sa size-la?

LESPERANS KI ENA DAN LABIB

Labib montre dan enn fason kler ki Bondie pa mepriz bann dimounn ki’nn viv san ki zot inn konn so bann prinsip. Actes 17:30 donn nou sa lasirans-la: “Bondie finn ferm lizie lor sa letan kot zot ti dan liniorans la.” Alor, ki lespwar Labib donn bann ki’nn mor san ki zot inn gagn lokazion pou aprann lor Bondie?

Repons-la trouv dan seki Jésus ti dir enn parmi sa de kriminel ki ti mor akote li la. Sa zom-la ti dir Jésus: “Pa bliye mwa kan to rant dan to Rwayom.” Ki Jésus ti reponn li? “Vremem mo dir twa zordi, to pou avek mwa dan Paradi.”​—Luc 23:39-43.

Eski Jésus ti promet sa zom-la ki li pou al dan lesiel? Non. Sa zom-la pa finn “ne ankor enn fwa” avek delo ek lespri​—enn kondision bien inportan pou rant dan Rwayom Bondie. (Jean 3:3-6) Okontrer, Jésus ti promet sa kriminel-la ki li pou reviv dan Paradi. Antan ki enn Zwif, sa zom-la ti kone ki ete Paradi lor later​—zardin Éden​—ki’nn dekrir dan premie liv Labib. (Genèse 2:8) Promes ki Jésus ti fer li, se enn lasirans ki li pou resisite dan Paradi ki pou retabli lor later.

Ofet, Labib promet ki pou ena “enn rezireksion bann dimounn ki zis ek bann dimounn inzis, toulede.” (Actes 24:15) “Bann dimounn inzis” se bann ki pa finn viv an-akor avek bann prinsip Bondie ki zis parski zot pa ti konn volonte Bondie. Jésus pou resisit sa kriminel inzis ki ti koz avek li la, ansam avek plizir milyon ouswa mem plizir milyar dimounn ki’nn mor dan liniorans. Lerla, dan Paradi lor later, zot pou kapav aprann bann prinsip Bondie, ek zot pou gagn lokazion pou prouve ki zot kontan Bondie kan zot obeir so bann komannman.

KAN BANN DIMOUNN INZIS POU RESISITE

Kan bann dimounn inzis pou resisite, eski pou ziz zot dapre bann aksion ki zot inn fer dan lepase? Non. Romains 6:7 dir: “Sa kikenn ki’nn mor la finn libere ar so pese.” Enn dimounn inzis inn fini pey so pese kan li’nn mor. Alor, lor ki kitsoz pou ziz li? Pa lor bann kitsoz ki li’nn fer dan liniorans avan so lamor, me plito lor seki li’nn fer apre so rezireksion. Kouma eski sa li enn lavantaz?

Apre rezireksion, bann inzis pou gagn lokazion pou aprann bann lalwa Bondie. Nou pou konn sa bann lalwa-la kan pou ouver bann roulo sinbolik. Lerla, pou ziz zot “dapre zot bann aksion,” setadir, si zot inn obeir bann lalwa Bondie ouswa non. (Révélation 20:12, 13) Se pa enn deziem sans ki laplipar sa bann dimounn inzis la pou gagne, me se sel sans ki zot pou ena pou gagn lavi eternel lor later, kan zot aprann ek fer volonte Bondie.

Sa lansegnman Labib la inn ed boukou pou regagn lafwa an Bondie. Yeong Sug li enn parmi zot. Se enn tifi ki’nn grandi dan enn fami ki bien devwe dan relizion Katolik. Plizir manb so fami ti bann pret. Avek letan, li’nn rant dan enn kouvan, parski li ti anvi vinn enn reliziez. Me kan li’nn trouv tou seki ti pe pase laba, li ti bien sagrin, ek li’nn deside pou kit sa kouvan-la. Anplis, li pa ti kapav aksepte doktrinn lor lanfer parski pou li, si Bondie tortir enn dimounn dan enn lanfer dife, savedir ki Li inzis ek Li pena lamour.

Enn zour, enn Temwin Jéhovah inn montre Yeong Sug sa bann parol-la dan Labib: “Bann vivan kone zot pou mor; me bann dimounn mor pa konn nanye ditou, ni zot gagn okenn rekonpans.” (Ecclésiaste 9:5) Sa Temwin-la inn ed li konpran ki so bann anset pa ti pe tourmante dan enn lanfer dife. Okontrer, zot pe dormi dan lamor, ek zot pe atann enn rezireksion.

Yeong Sug ti kone ki boukou dimounn zame pa’nn tann laverite ki sorti dan Labib, alor sa finn pous li pou pran aker parol ki trouv dan Matthieu 24:14: “Sa bon nouvel lor Rwayom la pou prese partou kot dimounn reste lor later kouma enn temwaniaz pou tou bann nasion, ek lerla lafin pou vini.” Asterla li partisip dan predikasion bon nouvel ek li partaz sa lespwar extraordiner ki li’nn aprann dan Labib la avek lezot.

“BONDIE PA FER PREFERANS”

Labib dir nou: “Bondie pa fer preferans, me dan ninport ki nasion, enn dimounn ki ena lakrint pou Li ek ki fer seki bon, Bondie aksepte li.” (Actes 10:34, 35) Nou kapav atann ki Bondie pou rann enn lazistis parfe, parski Li “kontan lazistis ek seki drwat.”​—Psaume 33:5.