REPONS POU BANN KESTION BIBLIK
Eski bann anz kapav ed nou?
Parey kouma dan lepase zot ti ed Daniel, enn fidel serviter Bondie, azordi osi bann anz pe ed bann dimounn pou tir profi ar bonn nouvel
Bien avan ki Li ti kree bann dimounn, Jéhovah ti kree bann milyon anz. (Job 38:4, 7) Sa bann anz-la zot bann kreatir spiritiel pwisan ek zot servi Bondie. Parfwa Bondie avoy zot pou gid ek protez So bann serviter lor later. (Psaume 91:10, 11) Azordi, bann anz pe ed bann dimounn pou tir profi ar bonn nouvel ki bann disip Jésus pe prese.—Lir Révélation 14:6, 7.
Eski nou bizin priye bann anz pou gagn led? Non. Lapriyer se enn form ladorasion ki zis Bondie tousel merite. (Révélation 19:10) Parski bann anz zot bann serviter Bondie, zot obeir So bann linstriksion, pa linstriksion bann dimounn. Alor, nou bizin touletan priye zis Bondie tousel atraver Jésus.—Lir Psaume 103:20, 21; Matthieu 26:53.
Eski ena bann move anz?
Bondie ti kree bann anz avek liberte pou swazir, parey kouma bann dimounn, setadir pou fer seki bon ouswa seki move. Malerezman, boukou anz ti rebel kont Bondie. (2 Pierre 2:4) Premie anz ki ti rebele se Satan; lezot anz ti swiv li ek ti vinn bann demon. Dan nou lepok, inn tir Satan ek so bann demon depi lesiel ek inn zet zot lor later.—Lir Révélation 12:7-9.
Parski lemal ek laviolans pe kontign ogmante depi 1914, sa montre ki biento Bondie pou detrir Satan ek so bann demon. Apre sa, Bondie pou refer later vinn enn paradi.—Lir Révélation 12:12; 21:3, 4.