Ny Sambofiaran’i Noa

Lasa be dia be ny olona teto an-tany, rehefa nandeha ny fotoana. Nanao ratsy anefa ny ankamaroan-dry zareo. Na ny anjely sasany tany an-danitra aza lasa nanao ratsy. Niala tany ry zareo ary nanketỳ ambonin’ny tany, dia mody nanao olombelona. Fa maninona? Amin’izay ry zareo afaka manambady an’izay vehivavy tiany.

Niteraka lahikely ireo anjely ireo sy ny vadiny. Lasa natanjaka be ireny zanany ireny rehefa lehibe, dia nampijalijaly olona. I Jehovah ve anefa dia hijery fotsiny an’izany rehetra izany? Tsy izany ka! Nanapa-kevitra izy hoe hasiany safodrano be, dia ho faty daholo ny olona ratsy.

Nisy lehilahy iray izay anefa tsy mba hoatran’ny olon-drehetra. Tia an’i Jehovah mantsy izy. Noa no anarany. Nanambady izy ary nanan-janaka telo lahy. Sema sy Hama ary Jafeta no anaran-dry zareo. Nanambady koa ireo zanany ireo. Nasain’i Jehovah nanamboatra sambofiara i Noa. Hoatran’ny boaty ngezabe ilay izy, ary afaka mitsingevana eny ambony rano. Tsy ho faty amin’ilay Safodrano i Noa sy ny fianakaviany rehefa miditra ao. Nasain’i Jehovah nampiditra biby be dia be tao koa i Noa, amin’izay koa izy ireny tsy ho faty.

Tonga dia nanamboatra an’ilay sambofiara i Noa. Afaka 50 taona teo ho eo vao vita ilay izy, ary nataon-dry zareo hoatran’izay notenenin’i Jehovah mihitsy. Sady nanamboatra an’ilay sambofiara izy no nampitandrina ny olona hoe ho avy ny Safodrano. Tsy nisy nihaino anefa izy.

Tsy maintsy niditra tao amin’ilay sambofiara amin’izay àry ry Noa. Dia inona no nitranga avy eo?