Fanatanterahana ny Fanompoantsika Ilay Fanjakana ao Amin’ny Kongregasiona
1 Tamin’ny alalan’i Jesosy Kristy, ilay Lohan’ny kongregasiona kristiana, dia nanome andraikitra ny “mpitandrin-draharaha mahatoky” iray na mpiadidy ny trano, i Jehovah. (Lioka 12:42, 43). Izany fandaharana izany dia nahafahantsika nahazo toromarika vita pirinty ny amin’ny fomba ‘tokony hitondrantsika tena ao an-tranon’Andriamanitra’. (1 Tim. 3:15). Ny fitaovana lehibe indrindra ananantsika mba hahitana izay zavatra vita pirinty dia ny Indeksan’ny Zavatra Vita An-tsoratry ny Watch Tower. Amin’ny fomba ahoana no azon’izy io anampiana anao?
2 Loholona ve ianao? Misy lohateny ankapobe roa miresaka ny amin’ny andraikitrao, dia ny hoe “Loholona” sy ny hoe “Mpiandraikitra”. Eo ambanin’ny fizarana hoe “Loholona” dia ahitana ny ankamaroan’ireo loharanon-kevitra misy ireo fanazavana momba ny fanampiana olona samihafa ao amin’ny kongregasiona sy ny fomba fanomezana torohevitra, ny fifandraisana eo anivon’ny fitambaran-doholona sy ireo andraikitry ny loholona ary ny toy izany. Hita eo ambanin’ny hoe “Mpiandraikitra” ireo loharanon-kevitra momba ireo fepetra takina, satria io lohateny io no teny ampiasain’ny Baiboly rehefa miresaka ny amin’izy ireny. Eo ambanin’ny hoe “Mpiandraikitra” koa no ahitana ireo andraikitra ofisialy, toy ny hoe “mpiandraikitra mpitantan-draharaha” sy “mpiandraikitra ny fanompoana” ary “mpitan-tsoratra”. Hanome fanazavana manampy koa ilay lohateny lehibe hoe “Kongregasiona”.
3 Ianareo izay mpanampy amin’ny fanompoana koa dia manana anjara asa lehibe ao amin’ny kongregasiona. Manome lisitry ny fanazavana momba ireo fepetra takina sy ireo andraikitra, ilay lohateny hoe “Mpanampy Amin’ny Fanompoana”. Ho hitanareo koa ny loharanon-kevitra misy fanazavana mahakasika ny maha-zava-dehibe ny tombontsoam-panompoana misokatra ho anareo sy ny fomba hiezahana hahazo andraikitra fanampiny.
4 Samy manana tombontsoa mifandray amin’ireo fivorian’ny kongregasiona ireo loholona sy mpanampy amin’ny fanompoana. Ilay lohateny hoe “Fivoriana” dia manome loharanon-kevitra ho an’ny endriny rehetra amin’io foto-kevitra io, anisan’izany ny ohatra mampihetsi-po eo ambanin’ny hoe “fiezahana mba hanatrika izany”. Mazava ho azy fa misy lohateny lehibe koa ho an’ny tsirairay amin’ireo fivoriana.
5 Mba handraisantsika tombontsoa feno avy amin’ny fampiasana ny Indeksa anefa, dia ilaintsika ny manana ireo loharanon-kevitra atorony. Azon’ny mpitory sy ny fianakaviana tsirairay atao ny manao ezaka mba hananganana tahirim-boky, indrindra ho fanararaotana ny fiahian’ny Fikambanana antsika amin’ny alalan’ny fampihenana ny vidin’ireo volumes reliés.
6 Ny tapany farany amin’ny 1 Timoty 3:15 dia miresaka ny kongregasiona kristiana ho toy ny “andry sy fiorenan’ny fahamarinana”. Tombontsoantsika ny manohana ny fahamarinana raha mbola mitondra tena araka ny mety ao amin’ny ankohonan’Andriamanitra isika, amin’ny fanatanterahana ny fanompoantsika ilay Fanjakana ao amin’ny kongregasiona.