AHOANA NO HIATREHANA NY FIAKARAN’NY VIDIM-PIAINANA?
Ekeo ny Zava-misy
Rehefa miakatra tsikelikely ny vidim-piainana, indrindra raha miakatra manaraka an’izay ny karamantsika, dia mety tsy dia ho voamaritsika ilay fiovana. Rehefa miakatra be anefa ny vidim-piainana nefa ny karamantsika tsy miova dia mety hanomboka hanahy sy hiady saina isika, indrindra raha mamelom-bady aman-janaka.
Isika aloha tsy afaka manakana ny fiakaran’ny vidim-piainana e! Handray soa anefa isika raha manaiky ny zava-misy.
NAHOANA IZANY NO ILAINA?
Rehefa manaiky ny sain’ny olona iray hoe miakatra foana ny vidim-piainana, dia ho mora aminy ny hanao an’ireto:
Tony foana. Rehefa tony isika dia misaina tsara sady hahay hanapa-kevitra kokoa.
Izay zavatra tena ilaina no andaniana vola fa tsy zavatra tsy ilaina. Tonga dia aloa, ohatra, ny jiro sy rano.
Tsy hifamaly amin’ny ao an-trano amin’ny resaka vola.
Mitady hevitra hoe ahoana no ividianana ny zavatra tena ilaina. Mety hilaina ny mampihena ny fandaniana dia mijery hoe inona no tena tsy maintsy hovidina.
INONA NO AZONAO ATAO?
Mahaiza miaina mifanaraka amin’ny zava-misy. Raha azo atao dia aleo mampihena ny fandaniana rehefa midangana be ny vidim-piainana. Tsy te hiova amin’ny fiainana mampiadana be efa nahazatra azy ny olona sasany dia miezaka mitazona an’izay foana. Hoatran’ny olona milomano manohitra renirano mahery be anefa ny olona hoatr’izany. Ho reraka ihany izy amin’ny farany. Raha manam-bady aman-janaka koa ianao dia rariny raha mieritreritra ny fomba hamelomana an-dry zareo. Tadidio anefa hoe ireto no tena ilain’ny vady aman-janakao: Ny fitiavanao sy ny fotoananao ary ny fiahianao an-dry zareo.
Hoatran’ny hoe milomano manohitra renirano mahery be ny olona tsy te hiova amin’ny fiainana mampiadana be efa nahazatra azy