Niresaka Tamin’i Samoela i Jehovah

Nanana zanaka roa lahy i Ely Mpisoronabe. Hofinia sy Finehasa no anarany, ary mpisorona tao amin’ny tranolay masina ry zareo. Tsy niraharaha ny lalàn’i Jehovah anefa ry zareo sady ratsy toetra be. Nalain-dry zareo, ohatra, ny hena tsara indrindra rehefa nanao sorona biby ho an’i Jehovah ny Israelita. Henon’i Ely ny zava-dratsy nataon’izy roa lahy, nefa tsy nanao na inona na inona izy. I Jehovah ve dia hijery fotsiny an’izany?

Efa lehibe i Hofinia sy Finehasa, fa i Samoela kosa mbola kely. Tsy nanao hoatran’izy roa lahy anefa i Samoela, dia faly i Jehovah. Rehefa natory izy indray alina izay, dia nisy niantso. Nifoha àry izy, dia nihazakazaka nankany amin’i Ely sady niteny hoe: ‘Ahoana tompoko?’ Dia hoy i Ely: ‘Tsy niantso anao aho ka! Mandehana miverina matory.’ Dia lasa natory i Samoela. Mbola nisy niantso fanindroany anefa izy, dia avy eo fanintelony. Fantatr’i Ely amin’izay àry hoe i Jehovah ilay niantso. Dia hoy izy tamin’i Samoela: ‘Raha mbola misy miantso ianao, dia ataovy hoe: “Mitenena Jehovah fa mihaino anao ny mpanomponao.”’

Niverina natory i Samoela. Nisy niantso indray izy hoe: ‘Samoela! Samoela!’ Dia hoy izy: ‘Mitenena fa mihaino anao ny mpanomponao.’ Niteny taminy àry i Jehovah hoe: ‘Teneno i Ely hoe hosaziko izy sy ny fianakaviany. Efa fantany hoe manao ratsy ny zanany lahy ato amin’ny tranolay masina, nefa izy tsy mibedy an-dry zareo akory.’ Ny ampitso maraina, dia nanokatra ny varavaran’ny tranolay masina hoatran’ny mahazatra i Samoela. Tsy sahy niresaka tamin’i Ely ny zavatra notenenin’i Jehovah anefa izy. Dia hoy i Ely taminy: ‘Inona no notenenin’i Jehovah taminao, anaka? Lazao daholo fa aza misy afenina.’ Dia notenenin’i Samoela taminy ilay izy.

Nihalehibe i Samoela, ary nanampy azy foana i Jehovah. Lasa fantatry ny olona rehetra tany Israely hoe nofidin’i Jehovah ho mpaminany sy mpitsara izy.