Mitantara ireo mpitory ilay Fanjakana
Manova fiainana ireo fahamarinana ao amin’ny Baiboly
SAOLY AVY ANY TARSISY dia naneho fahatsorana ara-pivavahana lehibe fony izy nanenjika ny kristiana marina hatramin’ny ‘fahafatesana’. (Asa. 22:4; 26:10, 11.) Tamin’ny tsy fahalalana anefa no nanaovany izany (I Timoty 1:13). Olona tso-po maro be nefa nohajambain’ny fivavahany no manaraka fihetsika sahala amin’izany amin’izao andro izao amin’ny fanoherana ny kristianisma marina. Nefa, toy ny nanarahan’i Saoly ny fomba fiaina kristiana rehefa avy nahalala ny fahamarinana, dia maro amin’ny mpiara-belona amintsika no miala amin’ny fanompoam-pivavahan-diso ka manaraka ny finoana marina.
◻ Misy ohatra iray ity. Tany Nouvelle-Calédonie, ny lehilahy iray sy ny vadiny samy diakonina tao amin’ny Fiangonana protestanta tany Tahiti, dia nanary ny zanany vavy sy ny vadin’io noho izy ireo tonga Vavolombelon’i Jehovah. Rehefa mba nankafy koa ny fampianarana ao amin’ny Baiboly omen’ny Vavolombelona ireo zanany zandrin’io, dia nanaovan’izy ireo izao fara teny izao: “Izay iray fidinareo na hisaraka amin’ireny olona ireny na hiala ato an-trano.” Nifidy ny hiala ireo zanaka.
Taorian’izany, dia nanontany tena ireo ray aman-dreny raha tsara ny nataon’izy ireo. Koa nanapa-kevitra ilay ray ny handalina ireo zavatra inoan’ny Vavolombelon’i Jehovah. Nifanakalo hevitra nandritra ny ora maromaro tamin’ny vinantolahiny izay Vavolombelona izy. Taorian’io resaka io, dia nanaiky izy fa vao nahita ny fahamarinana ao amin’ny Baiboly notadiaviny hatramin’ny 60 taona. Niala tsy ho ao amin’ny Fiangonany izy mivady, ary niaraka tamin’ny sisa tamin’ny fianakaviana, dia nanomboka nanatrika tsy tapaka ireo fivorian’ny Vavolombelona izy ireo. Ankehitriny ny rehetra dia mampahafantatra ireo fampianarana ao amin’ny Soratra masina isan-trano.
Raha tsy naneho fanetren-tena io lehilahy io, ary raha tsy naka fotoana handinihana ilay raharaha, dia tsy ho nahita ny fahamarinana na oviana na oviana. Amin’izao fotoana izao, dia sambatra daholo ny fianakaviany manompo an’i Jehovah. Nanova ny fiainan’izy ireo ny fahamarinana ao amin’ny Baiboly.
◻ Ny zava-nitranga hafa iray avy any Nouvelle-Calédonie dia mampiharihary koa ny hery manovan’ireo fahamarinana ao amin’ny Baiboly. Katolika nafana fo ireo anisan’ny foko iray, ny Wallis. Amin’ny ankapobeny dia tsy mety mifanakalo hevitra mihitsy amin’ny Vavolombelon’i Jehovah izy ireo. Indray andro anefa ny zazalahy iray dia nanaiky hifanakalo hevitra tamin’ireo, ary nahavariana azy izay nasehon’ireo taminy tao amin’ny Baiboly. Ny anabaviny, izay niara-nianatra tamin’ny relijiozy katolika, dia nanatrika ny anankiray tamin’ireo fifanakalozan-kevitra nataony tamin’ny Vavolombelona. Inona no vokany? “Azony ny valin’ireo fanontaniana napetrany hatramin’ny taona maro tamin’ireo pretra sy relijiozy. Nila herintaona izy mba hianarana ny fampianarana ny amin’ny Trinite, nefa dia tsy nisy vokany tena nahafapo. Tamin’io indray mandeha io, hoy ny fanazavan’ilay fitantarana, dia nahazo valiny nazava avy amin’ireo Vavolombelona izy tao anatin’ny ora vitsivitsy.” Tsy ela dia nandao ny Eglizy katolika izy. Nanao fanambarana tamin’ny fianakaviany izy mianadahy. Niala tamin’ny “Antokon’olon’i Maria” ny reniny. Nodorany ireo sarivongany sy ireo medainy tamin’ny fanambarana hoe: “Namitaka ahy nandritra ny taona maro ianareo!” Vavolombelon’i Jehovah izao ireo tanora roa ireo, ary amin’ny fitambarany, dia folo amin’ny mpianakaviny no manatrika ireo fivoriana. Mitory tsy tapaka ilay Fanjakana ilay reny sy ny zanany lahy telo ary zanany vavy iray.
Mahafaly ny mahita olona tso-po miala amin’ny haizim-piton’ny fivavahan-diso mba hitodika any amin’ny fahazavan’ny fahamarinana omen’i Jehovah amin’ny alalan’ny Teniny. Tsy azo lavina fa mahery ireo fahamarinana ao amin’ny Baiboly; manan-kery hanova fiainana izany. — Hebreo 4:12.