Ny Fitahirizam-bokin’ny Sekolin’ny Fanompoana Teokratika
1 Ny apostoly Paoly dia nampirisika an’i Timoty mba ‘hitandrina ny famakian-teny, ny fananarana, ny fampianarana sy hazoto hihevitra izany zavatra izany, dia hikely aina fatratra amin’izany, mba hiseho amin’ny olona rehetra ny fandrosoany’. (1 Tim. 4:13, 15). Ny fomba iray hahafahantsika hanaraka io fananarana io dia amin’ny alalan’ny fianarana sy ny fanaovana fikarohana manokana. Tena hanampy ho fikendrena izany ny fananana fitahirizam-boky teokratika tsara iray. Tsara ny manana fitahirizam-boky manokana an’ny tena ao an-trano sy ny mampiasa azy io. Ny fitahirizam-bokin’ny Sekolin’ny Fanompoana Teokratika any amin’ny Efitrano Fanjakana anefa dia mety hanana boky fanampiny azo jerena, indrindra ho an’ireo vaovao izay tsy manana manokana ireo zavatra vita an-tsoratra tranainy kokoa.
2 Tamin’ny 1944 no nampirisihana ireo kongregasiona hametraka fitahirizam-bokin’ny Sekolin’ny Fanompoana Teokratika any amin’ny Efitrano Fanjakana. Ny zava-kendrena amin’ny fitahirizam-boky dia ny hahafahan’ireo mpianatra hampiasa ireo zavatra vita an-tsoratry ny Fikambanana sy ireo boky fakan-teny hafa manampy ho amin’ny fikarohana sy ny fianarana Baiboly, nefa tsy hisy azony ampiasaina raha tsy eo izany. — Asa. 17:3, NW.
IZAY AO ANATINY
3 Zavatra vita an-tsoratra inona avy no tokony hatao ao anatin’ny fitahirizam-bokin’ny Sekolin’ny Fanompoana Teokratika? Koa satria ny hanampy antsika amin’ny fianarana Baiboly no zava-kendreny, dia tokony ho ao anatiny ireo zavatra vita an-tsoratra navoakan’ny Fikambanana farany sy ireo fandikan-tenin’ny Baiboly isan-karazany. Azo asiana dikisionera tsara iray koa ao. Ny Index des Publications de la Société Watch Tower 1950-1985 sy 1986-1990, izay natao ho an’ny fikarohana sy ny fianarana, dia boky tena ilaina ao amin’ny fitahirizam-boky teokratika tsara iray. Kanefa, maro ireo Efitrano Fanjakana tsy manana ireo zavatra vita an-tsoratra rehetra voasoratra ao amin’ny Index. Mba hisian’ny zavatra ianarana bebe kokoa azo ampiasaina, dia naverin’ny Fikambanana natao pirinty ireo volumes reliés amin’ny La Tour de Garde 1950 ka hatramin’ny 1979, amin’ny fiteny frantsay. Izany dia ho fanampiny tsara dia tsara ho an’ireo fitahirizam-bokin’ny Sekolin’ny Fanompoana Teokratika izay mbola tsy manana ireo boky fakan-teny ireo.
4 Ny mpiandraikitra ny Sekolin’ny Fanompoana Teokratika no tompon’andraikitra amin’ilay fitahirizam-boky. Mety ho azo tendrena hanampy azy hikarakara azy io ny mpikarakara momba ny asa iray. Tokony ho liana amin’ny fanampiana ireo vaovao hianatra ny fomba ahafahany mampiasa ilay fitahirizam-boky ny mpiandraikitra ny sekoly, mba handraisan’izy ireo soa faran’izay betsaka. Tokony ho mailaka koa izy hahita fa nanampy tao ny zavatra vita an-tsoratra vaovao ary fa voaisy fanamarihana mazava mampiseho fa fananan’ny kongregasiona ireo boky. Tokony hiara-miasa amin’ny mpiandraikitra ny sekoly ny rehetra amin’ny fihazonana ny fitahirizam-boky ho madio sy milamina. Raha manana zavatra vita an-tsoratra tianao hatao fanomezana ho an’ny fitahirizam-boky àry ianao, dia afaka mampahafantatra ny mpiandraikitra ny sekoly izay azonao omena.
KARAKARAO TSARA
5 Ny mpiandraikitra ny sekoly dia handamina ny hisian’ny fanaraha-maso an’ilay fitahirizam-boky ara-potoana mba hahitana fa milamina tsara izy io ary voakarakara izay fanamboarana na izay fanoloana rehetra tokony hatao. Aza misalasala mampiasa izay zavatra vita an-tsoratra rehetra ao amin’ny fitahirizam-boky, aloha sy aorian’ireo fivoriana. Kanefa, tsy hisy boky tokony hivoaka ny Efitrano Fanjakana. Raha manjary ilaina amin’ny fomba maningana izany, amin’izay dia tokony horesahina amin’ny mpiandraikitra ny sekoly. Rehefa mihoatra ny iray ny kongregasiona mivory ao amin’ny Efitrano Fanjakana, dia tokony samy hanana ny fitahirizam-bokin’ny Sekolin’ny Fanompoana Teokratika manokana ny kongregasiona tsirairay avy.
6 Tena ampiasaina amin’ny zava-kendrena mahasoa ny fitahirizam-bokin’ny Sekolin’ny Fanompoana Teokratika. Rehefa manararaotra an’io fandaharana io isika mba hanaovana fikarohana, dia hanana ny fifaliana hahita ireo ‘harena miafina’ ao amin’ny Tenin’Andriamanitra, izay manome fahalalana sy fahendrena ary fahazoana hevi-javatra. — Ohab. 2:4-6, NW.