Ambarao amin’ny alalan’ny Ny Tilikambo Fiambenana ny vaovao tsara
1 Tena tsy manam-paharoa marina Ny Tilikambo Fiambenana satria mpitondra vaovao tsara. Mifanohitra amin’izany ny ankamaroan’ireo zavatra vita an-tsoratra eo amin’izao tontolo izao izay manasongadina vaovao ratsy sy mahakivy. Ahoana no ahafahantsika mampiseho amin’ny olona fa hafa Ny Tilikambo Fiambenana, satria misy hafatra izay tena mamelombelona marina?
2 Azontsika atao ny manintona ny saina ho amin’ny “Zava-kendren’ny Ny Tilikambo Fiambenana” eo amin’ny pejy faha-2 amin’ilay gazety. Asehoy fa ny zava-kendreny dia ny hanandratra an’i Jehovah amin’ny maha-Mpanapaka Tompom-piandrianana azy, hanamarika ireo zava-miseho eo amin’izao tontolo izao izay manatanteraka faminaniana ao amin’ny Baiboly, hanome hafatra mitondra fampiononana ho an’ireo ampahorina ary hanamafy ny finoana ireo fandaharana noraisin’Andriamanitra mba hamonjena antsika.
3 Moa ve ireo teny ataontsika momba Ny Tilikambo Fiambenana milaza hevitra amin’ny fomba mampiaiky? Izay lazaintsika dia tsy tokony ho fitenenana manaitra iray izay mamelona fahalianana vetivety fotsiny; tokony hisy heviny izany ka hamelona fatokiana izay hiteraka faniriana hianatra bebe kokoa.
4 Ilaina ny fanomanana: Mila ny mamaky ny gazety tsirairay amim-pitandremana isika, amin’ny famakafakana tsara ao an-tsaina fampisehoana samihafa ho an’ny faritanintsika. Manatsara ny fahatakaran’ny tenantsika manokana ireo fanazavana, ny fijerena ireo andinin-teny voalaza. Izany dia afaka mandalina ny fankasitrahantsika ny fahamarinana ka hanosika antsika hizara izany amin’ny hafa. Raha tsy ao am-pontsika ny fahamarinana, dia tsy hanana fandrisihana firy isika mba hiresaka.
5 Ny fahalianana asehon’ny olona iray no hamaritra izay hatolotsika azy. Rehefa tsy manaiky na tsy miraika ny fihetsiny, ireo teny lazaintsika dia mety ho ampy. Raha misy fahalianana, nefa fahalianana voafetra ihany, ny tsara indrindra dia mety ho ny fanolorana ireo gazety farany na bokikely iray. Raha manao teny mampiseho fankasitrahana amim-pahatsorana sy faniriana hianatra bebe kokoa, ilay olona, dia hety ny hanolorana famandrihana aminy.
6 Rehefa mamaky ireo lahatsoratra ao amin’ny nomerao farany amin’ny Ny Tilikambo Fiambenana ianao, dia miezaha hitadidy ireo resaka teo aloha nifanaovana tamin’ireo tompon-trano momba ireo foto-kevitra ireo izay nanaitra ny fahalianany. Manaova fiezahana manokana mba hiverenana any miaraka amin’izany gazety izany ka hanohizana ilay resaka.
7 Tsy fantatsika hoe hafiriana na hatraiza no mbola hanambarana ny vaovao tsara. Azontsika antoka anefa fa Ny Tilikambo Fiambenana dia handray anjara lehibe eo amin’izay tanterahina. Amin’ny fampiasantsika io fitaovana io, dia tokony hanahaka ireo apostoly amin’ny ‘fampianarana sy fanambarana amim-pahazotoana ny vaovao tsaran’ny tenin’i Jehovah’, isika. — Asan’ny apostoly 15:35, NW.