Fanolokoloana ny Fahalianana Amin’ny Fiverenana Mitsidika
1 Nampitovina tamin’ny fomba nety tamin’ny fambolena ny asa fanompoana, ary nampitahaina tamin’ny fanolokoloana sy ny fanondrahana ny fanaovana fiverenana mitsidika. (Matio 13:23; Lioka 10:2; 2 Kor. 9:10). Amin’ny maha-“mpiara-miasa amin’Andriamanitra” antsika dia manana adidy hanampy izay voa vaovao rehetra mitsimoka isika, mba hitomboany ho amin’ny fahamasahana ka hamoazany. (1 Kor. 3:6, 9). Inona no fomba tsara indrindra hanatanterahana izany?
2 Aoka ianao ho mailaka hiverina hitsidika ireo olona rehetra nampiseho fahalianana. Jereo indray ny fandraisanao an-tsoratra isan-trano, ary diniho hoe iza no hotsidihinao ary inona no horesahinao. Amin’ny ankapobeny, ny foto-kevitra horesahinao dia ho voafaritr’izay nodinihina tamin’ny fitsidihana voalohany. Aoka ianao hahay hanovaova, amin’ny fananana ao an-tsaina hevitra hafa araka ny Soratra Masina izay mety ho azo ampidirina. Tsara foana ny mampiasa ny Baiboly, ka manaiky ny heriny mba hanohinana ny fo. — Heb. 4:12.
3 Raha ny bokikely “Tena Miahy Antsika ve Andriamanitra?” no napetrakao, dia ho azonao atao ny hanomboka amin’ny filazana zavatra tahaka izao:
◼ “Olona tso-po maro no mino fa handevona ny tany Andriamanitra, kanefa kosa ny hafa dia matahotra fa ny olona mihitsy no hanao izany. Inona no hevitrao? [Avelao izy hamaly.] Milaza amintsika ny Baiboly fa tsy handevona ny tany Andriamanitra fa hanadio azy amin’ny tsy fahamarinana kosa, ka hahatonga azy ho toeram-piadanana sy filaminana.” Tariho ny saina ho amin’ny pejy faha-22, ary vakio ny Ohabolana 2:21, 22, izay voatonona ao. Raha misy fahalianana aseho dia hazavao ny fandaharana momba ny fianarana Baiboly any an-tokantrano na atolory ireo gazety farany indrindra, ary manaova fotoana mba hiverenana ka hiresahana bebe kokoa momba ny tontolo vaovao ampanantenain’Andriamanitra.
4 Raha ny bokikely “Indro” no napetrakao, dia ho azonao atao ny hilaza toy izao:
◼ “Tamin’ny fitsidihako teo aloha isika dia namaky tao amin’ny Baiboly momba ny fampanantenan’Andriamanitra hanao ny tany ho paradisa iray, tahaka ilay hitantsika asehon’ny sary eo amin’ny fonon’ilay bokikely napetrako taminao. Ho afaka hifaly amin’izany fitahiana izany isika amin’ny fianarana bebe kokoa momba ny sitrapon’Andriamanitra sy ny fomba hampiharana izany eo amin’ny fiainantsika.” Vakio ny Jaona 17:3, ary avy eo dia avadiho eo amin’ny fehintsoratra faha-52 sy faha-53 eo amin’ny pejy faha-27 ilay bokikely. Diniho fohy ny antony tokony hahazoana fahalalana araka ny marina ny Tenin’Andriamanitra.
5 Rehefa mifandray amin’olona tia fivavahana, izay nametrahana ny bokikely “Zava-kendren’ny Fiainana” ianao, dia angamba hitanao ho mety ny hilazana toy izao:
◼ “Tena azo inoana fa namerina imbetsaka ilay Vavaka nampianarin’ny Tompo ianao. Inona no tonga ao an-tsainao rehefa mangataka ny hahatongavan’ny Fanjakan’Andriamanitra ianao?” Aorian’ny valin-teny omen’ilay tompon-trano, dia jereo ny fehintsoratra faha-8 sy faha-9 eo amin’ny pejy faha-26, ary vakio ny Daniela 2:44. Angamba ianao ho afaka hanohy ny resaka amin’ny fanazavana fa ny fahatongavan’ny Fanjakan’Andriamanitra dia hidika ho faran’ny faharatsiana sy ny fijaliana. Mariho fa raha marina eo imason’Andriamanitra isika, dia ho afaka hifaly amin’ny fiainana mandrakizay ao amin’ny Paradisa eto an-tany.
6 Tadidio fa ny fiverenana mitsidika dia azo atao amin’izay olona rehetra vonona hihaino, na nisy zavatra vita an-tsoratra napetraka na tsia. Miezaha manokana fotoana sasany isan-kerinandro mba hanaovana fiverenana mitsidika. I Jehovah dia hitahy ny ezaka amim-pahazotoana ataonao mba hanolokoloana ny fahalianana hitanao. Enga anie izany hamoa ho fankalazana azy. — Jaona 15:8.