Mampiasà Bokikely Isan-karazany eo Amin’ny Fanompoanao
1 Liana amin’ny foto-dresaka isan-karazany ny olona amin’izao andro izao. Rehefa mandray anjara amin’ny fanompoana eny amin’ny saha ianao mandritra ny volana Jolay, dia azonao atao ny mitondra bokikely samy hafa maromaro eny aminao, amin’ny fampiasana bokikely iray voafaritra tsara izay hanohina ny fon’ny olona eo amin’ny faritany. Angamba ho tianao ny hanandrana ny iray amin’ireto fomba fampiseho ireto:
2 Amin’ny fanolorana ny bokikely “Ny Fitondram-panjakana Izay Hitondra ny Paradisa”, dia azonao atao ny manontany hoe:
◼ “Araka ny hevitrao, hanao ahoana izao tontolo izao raha Andriamanitra irery ihany no mpanapaka? [Avelao ilay olona hamaly.] Ny fandraisan’Andriamanitra ny fanapahana ny tany no angatahintsika indrindra rehefa manao ilay Vavaka Nampianarin’ny Tompo, na ny Rainay Izay any An-danitra, izay nampianarin’i Jesosy Kristy antsika, isika. [Avadiho ho eo amin’ny pejy faha-3 ilay bokikely, ary vakio ny fehintsoratra voalohany, izay manonona ny Matio 6:10.] Raha tianao ny hiaina ao amin’ny tontolo tahaka izany, dia tokony hamaky itỳ bokikely itỳ ianao.” Atolory ilay izy.
3 Azo asongadina amin’izao fomba izao ny “Rehefa Nody Mandry ny Olona Iray Tianao”:
◼ “Araka ny hevitrao, ho avy ve ny andro izay tsy hisian’ny iray amintsika ho voatery hamoy olon-tiana iray amin’ny fahafatesana? [Avelao ilay olona hamaly.] Itỳ bokikely nosoratana tamin’ny fomba kanto itỳ dia nampionona olona an-tapitrisany maro tamin’ny fampanantenana azo antoka ao amin’ny Baiboly fa ho tonga amin’ny hoavy tsy ho ela izany andro izany. [Avadiho ho eo amin’ny pejy faha-5 ilay bokikely, ary vakio ny fehintsoratra fahadimy, anisan’izany ny 1 Korintiana 15:21, 22. Avy eo dia avadiho ho eo amin’ny pejy faha-30.] Eto ilay mpanakanto dia nanasongadina ny fifaliana mety ho hitantsika amin’ny fandraisana an-tanan-droa ireo olon-tiantsika nody mandry amin’ny fitsanganana amin’ny maty. Kanefa aiza no hitrangan’io fisehoan-javatra mahafinaritra io? Hampiseho anao ny valiny ao amin’ny Baiboly amin’io fanontaniana io itỳ bokikely itỳ.” Raha raisina ilay bokikely, dia ho azonao atao ny hanampy teny hoe: “Tiako ny hiverina any aoriana ka hidinika momba io foto-dresaka io bebe kokoa.”
4 Ho azonao atao ny hanasongadina ny bokikely “Indro, Havaoziko ny Zavatra Rehetra”, amin’ny fampiasana itỳ tari-dresaka mivantana itỳ mba hanombohana fampianarana Baiboly:
◼ “Olona maro no manana fanontaniana momba ny Baiboly. Mety ho efa nanontany tena momba ny valin’ny iray amin’ireto fanontaniana ireto ianao. [Sokafy eo amin’ny pejy faha-30.] Itỳ fanontaniana farany itỳ dia nanaitra ny fahalianan’ny maro: ‘Ahoana no azonao iomanana hiaina mandrakizay ao amin’ny Paradisa?’ ” Raha iarahanareo midinika ny fehintsoratra faha-57-58 eo amin’ny pejy faha-29-30 ary vakinao ny Apokalypsy 21:3, 4, dia hametraka ny fototra ho amin’ny fanombohana fampianarana Baiboly ianao. Farano amin’ny fametrahana ilay bokikely sy amin’ny fanaovana fandaharana ho amin’ny fiverenana mitsidika izay hahafahanareo hidinika ny sasany amin’ireo fanontaniana hafa.
5 Mety ho tianao ny hanandrana itỳ fampisehoana tsotra itỳ amin’ny alalan’ny bokikely “Ny Anaran’Andriamanitra Izay Haharitra Mandrakizay”:
◼ “Ny iray amin’ireo zavatra voalohany nianarako tao amin’ny Baiboly dia ny anaran’Andriamanitra. Fantatrao ve hoe iza no anarany? [Avelao ilay olona hamaly.] Aoka hasehoko anao. Ato amin’ny Baiboly ato izy io, ao amin’ny Salamo 83:18. [Vakio.] Asehon’itỳ bokikely itỳ hoe ahoana no isehoan’ny anaran’Andriamanitra hoe Jehovah amin’ny fiteny maro samy hafa. [Asehoy ilay faritra voafefy eo amin’ny pejy faha-8.] Raha tianao ny hahafantatra bebe kokoa momba an’i Jehovah sy ny fikasany, dia tokony hamaky itỳ bokikely itỳ ianao.” Atolory an’ilay tompon-trano ilay bokikely.
6 Amin’ny fananantsika bokikely tsara dia tsara isan-karazany toy izany mba hampiasaina, dia azo antoka fa ampy fitaovana tsara isika “hitory teny soa mahafaly amin’ny mpandefitra”. — Isaia 61:1.