Ambarao ny Vaovao Tsara Momba Ilay Fanjakana Amin’ny Alalan’ny Bokikely
1 Fifaliana toy inona moa ny hoe mahafantatra ny fahamarinana sy ny ho anisan’ireo izay manambara amin-jotom-po ny vaovao tsara! Ireo olona any ivelan’ny fandaminan’Andriamanitra dia mila mafy ny mandre ny vaovao tsara momba ilay Fanjakana. Ny fahamarinana momba ilay Fanjakana dia hazavaina amin’ny fomba tsotra ao amin’ny bokikely Mifalia Amin’ny Fiainana eto An-tany Mandrakizay!, sy “Indro, Havaoziko ny Zavatra Rehetra”, ary Ny Fitondram-panjakana Izay Hitondra ny Paradisa. Milazalaza amin’ny fomba manaitra ny maso ny fiainana eto an-tany eo ambanin’ny Fanjakan’Andriamanitra izy ireo, ary mitarika ny mpamaky ho amin’ny zava-misin’ilay Fanjakana hazavaina ao amin’ny Tenin’Andriamanitra. Mazava ho azy fa ny fametrahana bokikely iray amin’ny olona liana dia vao fanombohan’ny asantsika. (1 Kor. 9:23). Aoka isika hanolokolo haingana ny fahalianana tany amin’izay rehetra nametrahantsika bokikely, ho fikendrena ny hanolotra fampianarana amin’ny alalan’ny boky Fahalalana Izay Mitarika ho Amin’ny Fiainana Mandrakizay. Ahoana no ahafahantsika manatanteraka izany mandritra ny Aogositra?
2 Ny bokikely “Mifalia Amin’ny Fiainana eto An-tany Mandrakizay!” dia azo atolotra amin’ny fomba fampiseho tena fohy. Rehefa mampiseho ny fonony ianao, dia ho azonao atao ny hilaza hoe:
◼ “Ho tiako ny hampiseho aminao zavatra iray mirakitra hafatra kanto iray.” Sokafy ny bokikely Fiainana eto An-tany (Mifalia), ary vakio ny fehintsoratra voalohany amin’ny teny fampidirana. Avy eo dia manohiza hoe: “Izy itỳ koa dia mamaly ilay fanontaniana hoe [avadiho ho amin’ny lohateny eo ambonin’ny sary faha-8 ilay bokikely]: ‘Nahoana no maty ny olona?’ Ho hitanao fa mahaliana ny mandinika ireo sary sy ny mamaky ireo andinin-teny ato amin’itỳ bokikely itỳ. Raha tianao ny hanao izany, dia azonao tazonina izy itỳ.”
3 Inona no holazainao rehefa miverina mitsidika olona nametrahana ny bokikely “Fiainana eto An-tany” ianao? Ho afaka hanandrana an’izao tari-dresaka izao ianao:
◼ Asehoy ny sary faha-49 amin’ny bokikely Fiainana eto An-tany ary manontania hoe: “Tsy tsara tarehy ve izao sary izao? [Avelao ilay olona hamaly.] Izy io dia ao amin’ilay bokikely napetrako taminao tamin’ny fitsidihako farany. Ho tiako ny hametraka aminao ilay fanontaniana eo amin’ny pejy manaraka.” Avadiho ho eo amin’ny sary faha-50 ilay bokikely ary vakio ilay fanontaniana hoe: “ ‘Irinao ve ny ho velona mandrakizay ao amin’io paradisa mahafinaritra io?’ [Avelao ilay olona hamaly.] Raha izany no fanirianao, dia mariho izay lazainy hoe tokony hataonao: ‘Mianara bebe kokoa àry momba izay lazain’Andriamanitra.’ [Vakio ny Jaona 17:3.] Ho faly aho hiara-mianatra ny Baiboly maimaim-poana aminao. Ho tianao ve izany?” Mifanaova fotoana raikitra mba hiverenana.
4 Rehefa manolotra ny bokikely “Indro, Havaoziko ny Zavatra Rehetra” ianao, dia ho azonao atao ny hanomboka amin’ny fampisehoana ny sary eo amin’ny fonony novelarina sy ny hanontany hoe:
◼ “Inona no heverinao fa hilaina mba hanaovana ny tany manontolo ho toy izao?” Avelao ilay olona hamaly. Lazalazao ny sasany amin’ireo lafin-javatra eo amin’ilay sary, izay mifandray amin’ny pejy faha-3. Avy eo dia milazà hoe: “Ny ankamaroan’ny olona dia mihevitra fa tsy azo atao ny hanao tontolo iray toy izao. Nefa, izy io dia tsy hoe tsy azon’Andriamanitra tanterahina akory. [Milazà hevitra ao amin’ny fehintsoratra 43; avy eo, dia vakio ny Isaia 9:5, 6.] Nampanantena Andriamanitra fa hitondra tontolo vaovao iray izay hankafizan’ny olona avy amin’ny firenena rehetra paradisa mahatalanjona iray. Ho tiako ny hamakianao itỳ bokikely itỳ. Hampiseho aminao ny fomba hahafahanao sy ny fianakavianao hankafy hoavy mahatalanjona avy amin’Andriamanitra, izy itỳ.”
5 Amin’ny fiverenana mitsidika, dia ho afaka hampiasa ny bokikely “Indro” ianao mba hanazavana ny antony ilana hianarana bebe kokoa momba ny Baiboly. Angamba hampiseho ilay fonony indray ianao ary hilaza hoe:
◼ “Fony aho nampiseho taminao itỳ sary itỳ tamin’ny voalohany, dia nitovy hevitra isika fa ho tiantsika ny hiaina ao amin’ny tontolo mahatalanjona toy izao. Mba hahatonga an’izany hety, dia misy zavatra ilaintsika rehetra atao.” Sokafy ny bokikely “Indro” ho eo amin’ny fehintsoratra faha-52; vakio ilay fehintsoratra sy ilay andinin-teny ao amin’ny Jaona 17:3. Ampifandraiso amin’ilay fanoharana ao amin’ny fehintsoratra faha-53 momba ny fianarana Baiboly araka ny tokony ho izy ilay fanazavana, ary avy eo dia hazavao fa ny Vavolombelon’i Jehovah dia manolotra fianarana toy izany maimaim-poana any an-tokantranon’ny olona. Manolora ny hampiseho ny fomba fampianatsika, amin’ny alalan’ny boky Fahalalana.
6 Rehefa manolotra ny bokikely “Ny Fitondram-panjakana Izay Hitondra ny Paradisa” ianao, dia ho azonao atao ny hanandrana hilaza hoe:
◼ “Efa nandre olona maro niteny aho hoe ho tiany ny hiaina eo ambany fitondram-panjakana iray tena ho afaka handamina ireo zava-manahirana lehibe atrehintsika amin’izao andro izao. [Manonòna zava-manahirana eo an-toerana, toy ny tsy fananana asa, ny fitomboan’ny heloka bevava, na ny fampiasana zava-mahadomelina.] Ireo zavatra ireo dia mahatonga antsika hahatsapa ho tena tsy milamin-tsaina momba ny hoavintsika sy ny an’ireo olon-tiantsika. Heverinao ve fa hisy fitondram-panjakana iray hahalamina ireo zava-manahirana ireo? [Avelao ilay olona hamaly.] Angamba ianao efa nanao ilay Vavaka Nampianarin’ny Tompo. Raha izany no izy, fantatrao ve fa, raha ny marina, ianao dia mivavaka mba hisian’ny fitondram-panjakana marina iray?” Avadiho ho eo amin’ny pejy faha-3 ilay bokikely Fitondram-panjakana, ary vakio ny fehintsoratra roa voalohany. Atolory ilay bokikely.
7 Raha ny bokikely “Ny Fitondram-panjakana Izay Hitondra ny Paradisa” no voapetraka, dia ho afaka hanomboka ny dinika amin’ny fiverenana mitsidika ianao amin’ny filazana hoe:
◼ “Teo aloha isika dia nidinika momba ny ilana fitondram-panjakana marina iray izay afaka mandamina ny zava-manahirana ny olombelona. Ilay bokikely napetrako taminao dia manondro ny Fanjakan’Andriamanitra ho ny hany fanantenantsika. Manontany tena ny olona sasany hoe inona no ho azon’izany fitondram-panjakana izany atao mba hanatsarana ny tarehin-javatra misy antsika. Mampiseho ny Baiboly fa i Kristy dia efa nanaporofo fa hahomby izy eo amin’izay tsy nahombiazan’ireo mpitarika olombelona.” Sokafy ny bokikely Fitondram-panjakana ho eo amin’ny pejy faha-29, ary vakio ireo fehintsoratra efatra farany. Avy eo dia milazà hoe: “Tsy hoavy mahatalanjona ve izany? Ho tianao ve ny hahita azy io?” Avelao ilay olona hamaly. Vakio ny Jaona 17:3. Ampirisiho ilay olona hianatra bebe kokoa amin’ny alalan’ny fianarana Baiboly ao an-tokantranony.
8 Raha mampiasa bokikely hafa ianao, dia afaka manomana ny fomba fampisehonao manokana, amin’ny fandraisana ireo fanoloran-kevitra eo ambony ho modely. Miomàna tsara ary mitadiava ny fitahian’i Jehovah eo am-panambaranao ny vaovao tsara momba ilay Fanjakana.