Mpiandraikitra Mitari-dalana — Ny Mpitarika ny Fianarana ny Bokin’ny Kôngregasiôna
1 Tombontsoa miavaka ho an’ny loholona na ny mpanampy amin’ny fanompoana mahay, ny mitarika ny Fianarana ny Bokin’ny Kôngregasiôna. Andraikitra lehibe ny mikarakara ny zavatra ara-panahy ilain’ny antokon’olona miaraka aminy. Azo sokajina ho telo ny andraikiny.
2 Fahaiza-mampianatra: Takina amin’ny mpitarika ny Fianarana ny Bokin’ny Kôngregasiôna ny fanomanana feno, mba hampitany fahazoana hevi-javatra amin’ilay antokon’olona, isan-kerinandro. Miezaka hampitombo ny fahatakarana ilay zavatra ianarana izy. Tsy hiteny be loatra izy mandritra ilay fianarana, fa hametraka fanontaniana fanampiny mivantana tsara, mba hamoahana ny hevi-dehibe ao amin’ilay lesona, raha ilaina izany. Hiezaka mafy izy ny hanao izay hahatonga ilay fianarana hahaliana sy ho azo andraisana lesona, ary ny hampiditra ny rehetra ao amin’ilay fiaraha-midinika. Ny zava-kendreny dia ny hampandroso ara-panahy, sy ny hanasongadina ireo zavatra azo ampiharina ao amin’ilay fianarana, ary ny hahatonga ilay fianarana hanohina ny saina sy ny fo. — 1 Tes. 2:13.
3 Fiandrasana mahasoa: “Ho fierena amin’ny rivotra sy ho fialofana amin’ny ranonoram-baratra”, mpitarika ny Fianarana ny Bokin’ny Kôngregasiôna. (Isaia 32:2). Tena miahy ny rehetra ao amin’ny antokon’olona miaraka aminy izy, ka manao izay hahazoana antoka fa raha misy kivy amin’ireo izay eo ambany fiandraiketany, dia homena fanampiana ara-panahy. — Ezek. 34:15, 16; 1 Tes. 2:7, 8.
4 Fitoriana ny filazantsara amin-jotom-po: Tsy manao tsirambina ny fanaovana fandaharana azo ampiharina izay hahafahan’ny rehetra handray anjara feno amin’ny fanompoana eny amin’ny saha, ny mpitarika ny Fianarana ny Bokin’ny Kôngregasiôna. Mitari-dalana eo amin’ny asa fitoriana ny filazantsara izy, satria fantany fa hisy akony eo amin’ireo sisa amin’ilay antokon’olona ny tsy fahatapatapahana sy ny zotom-po ary ny hafanam-po asehony eo amin’ny fanompoana. (Kol. 4:17; 2 Tes. 3:9). Miezaka izy mba hiara-miasa amin’ny tsirairay amin’ilay antokon’olona, eny amin’ny fanompoana, rehefa mandeha ny fotoana. Raha irintsika ny hanatsara ny fahaizantsika mitory sy mampianatra eny amin’ny fanompoana, dia afaka manampy antsika mba hahatratra ny tanjontsika ny mpitarika ny Fianarana ny Bokin’ny Kôngregasiôna. — 1 Tim. 4:16; 2 Tim. 4:5.
5 Tena voatahy isika tamin’ny fahazoana ireny lehilahy natolotra ho fanomezana ireny, izay vonona ny hanolotra fanampiana ara-panahy sy fanohanana amim-pitiavana ho antsika. (1 Tes. 5:14). Enga anie isika hampiseho ny fankasitrahantsika io fandaharana mahatalanjona avy amin’i Jehovah io, amin’ny fandraisantsika anjara tsy tapaka amin’ny fianarana ny boky sy ny fanohanantsika amim-pahatokiana ny asa fitoriana ny filazantsara. — Heb. 10:25.