Fampitomboana ny Fitoriana eo Am-panakekezan’ny Farany
1 Fotoana mahafaly ny fotoam-pijinjana. Fotoana fanaovana asa mafy koa izy io. Voafetra ny fotoana hanangonana ny vokatra. Tsy tokony hitaredretra eo amin’ny asany ireo mpiasa.
2 Niresaka ara-panoharana i Jesosy, ka nampitaha ny “fifaranan’ny fandehan-javatra iray” tamin’ny fotoam-pijinjana. (Matio 13:39, NW). Miaina amin’ny fifaranan’ity fandehan-javatra ity isika, ka voafetra ny fotoana sisa tavela mba hitoriana “amin’ny tany onenana manontolo”. (Matio 24:14, NW). Mila ny mampitombo ny fandraisantsika anjara amin’ny fanompoana isika, arakaraka ny anatonan’ny farany. Nahoana? Nanazava toy izao i Jesosy: “Be ny vokatra, fa ny mpiasa no vitsy”. — Matio 9:37, 38; Rom. 12:11.
3 Ataovy amim-pahadodonana izy io: Telo taona sy tapany monja no nananan’i Jesosy mba hanatanterahana izay nanendrena azy, fony izy nanomboka ny asa fitoriany lehibe. Nitory tamin’ny fahatsapana fahadodonana izy, ka nilaza hoe: “Tsy maintsy mitory ny teny soa mahafaly ny amin’ny fanjakan’Andriamanitra any amin’ny tanàna hafa koa Aho, satria izany no nanirahana Ahy.” — Lioka 4:43.
4 Nalentik’i Jesosy tsikelikely tao amin’ny mpianany ny fahatsapana fahadodonana mitovy amin’izany. (Marka 13:32-37). Izany no antony ‘tsy nitsaharan’izy ireo nampianatra sy nitory an’i Jesosy ho Kristy isan’andro teo an-kianjan’ny tempoly sy tao an-trano’. (Asa. 5:42). Tsy naka toerana voalohany teo amin’ny fiainany ny fanaovan-javatra tsy dia lehibe loatra. Na dia vitsy aza izy ireo, dia nahavita nitory ny vaovao tsara ‘teny ambanin’ny lanitra rehetra teny’. — Kol. 1:23.
5 Vao mainka isika ankehitriny manana antony lehibe kokoa mba hambolena izany fahatsapana fahadodonana izany, satria “antomotra ny faran’ny zavatra rehetra”. (1 Pet. 4:7). Efa nametra andro sy ora ho an’ny faran’ity fandehan-javatra ity i Jehovah. (Matio 24:36). Tsy maintsy vita ao anatin’ilay fotoana sisa tavela ny asa fitoriana. Izany no antony hanohizantsika hampitombo ny ezaka ataontsika mba hitondrantsika ny vaovao tsara amin’ny olona maro kokoa hatrany.
6 Amin’ny fampitomboana ny fandraisantsika anjara amin’ny asa fanambarana, eo am-panatonan’ny farany, dia hahita fahafaham-po isika hilaza amin’i Jehovah, tahaka an’i Jesosy hoe: ‘Vitanay ny asa nomenao hataonay.’ — Jaona 17:4.