Fivoriamben’ny Distrika 1999 “Ny Teny Ara-paminanian’Andriamanitra”
1 Rehefa nadiva hiditra tao amin’ny Tany Nampanantenaina ireo Isiraelita, dia niangavy azy ireo mba hankasitraka ny toromarik’Andriamanitra i Mosesy. Hoy izy tamin’izy ireo: “Tsy teny tsy misy vidiny ho anareo izany, fa midika ho fiainana ho anareo kosa”. (Deot. 32:45-47, NW). Tsy mankasitraka an’i Jehovah ve isika, noho ny fiainantsika sarobidy aoka izany aminy, hany ka manohy mitari-dalana antsika amin’ny alalan’ny Teniny sarobidy izy? Noho izany, dia miandrandra ny fivoriambe maharitra telo andro hoe “Ny Teny Ara-paminanian’Andriamanitra”, sy izay omanin’i Jehovah ho antsika, isika.
2 Amin’ity taona ity, dia nomanina hatao any amin’ny toerana 8 manerana an’i Madagasikara, ny fivoriambe. Toy izao avy ireo toerana sy ireo daty hanaovana azy: 30 Jolay–1 Aogositra: Antananarivo Frantsay; 6-8 Aogositra: Antananarivo I sy Fianarantsoa; 13-15 Aogositra: Antananarivo II sy Antsiranana; 20-22 Aogositra: Antananarivo III sy Antalaha; 27-29 Aogositra: Antsirabe sy Toamasina; 3-5 Septambra: Toliara sy Mahajanga.
3 Tsy isalasalana fa efa nanao fandaharana mba hanatrika amin’ny andro rehetra amin’ny fivoriambe ianao, satria mino ianao fa manantena ny hanatrehanao i Jehovah. Matokia fa hitany ny ezaka sy ny sorona ataon’ny mpanompony tsirairay mba hanatrehana ny fivoriambe, ary tsaroany amim-pankasitrahana ny toy izany. (Heb. 6:10). Amin’ny fanatrehantsika amin’ny andro tsirairay amin’ny fivoriambe, manomboka amin’ny hira fanokafana ka hatramin’ny vavaka famaranana, dia asehontsika amin’i Jehovah fa mihevitra ny teny lazainy amintsika ho sarobidy isika. (Deot. 4:10). Amin’izany koa isika dia mampiseho fankasitrahana ny asa mafy ataon’ireo rahalahintsika maro mba hanomanana ny fivoriambe.
4 Mitaky fanaovana fandaharana mialoha sy fandaminan-javatra tsara ny fandaminana olona an-jatony na an’arivony maro amin’ny vahoakan’Andriamanitra mba hivory any amin’ny toerana fanaovana fivoriambe. Ny fahafantarana fa nisy fandaharana natao tamim-pitiavana ho antsika dia tokony hanosika antsika hanaraka azy ireny, mba ‘hatao amin’ny fahamendrehana sy ny filaminana ny zavatra rehetra’. (1 Kor. 14:40). Nomena izao fanazavana sy fampahatsiahivana manaraka izao, mba ho vonona tanteraka hankafy ireo sakafo ara-panahy sy ny fiarahana kristianina ianao, rehefa tonga any amin’ny fivoriambenao.
Alohan’ny fivoriambe
5 Mila fanampiana mba hanao ny fandaharan’ny tenany manokana mba hanatrehana ny fivoriambe ve ireo ampianarinao Baiboly sy ny olona liana hafa? Mety hanosika azy ireo ho tonga mpivavaka amin’i Jehovah ny zavatra hitany sy reny any. (1 Kor. 14:25). Tokony ho fantatr’ireo loholona izay rehetra mila fanampiana eo amin’ny filasiana na ny fitaterana, indrindra fa ireo mpikambana be taona ao amin’ny kôngregasiôna, ka hiandraikitra amim-pitiavana ny hahazoan’izy ireo ny zavatra ilainy izy. — Gal. 6:10.
6 Efa vita ve ny fandaharana ny amin’ny toerana hilasianao? Raha any amin’ny tranon’ny rahalahy na ny tranon’olona manokana ianao no milasy, dia hilainao ny haneho fiheverana, amin’ny fandraisana anjara amin’ny raharaha ao an-trano na ny vola lany. Hilainao ny hanara-maso ny zanakao mba hitondran’izy ireny tena tsara amin’ny fotoana rehetra.
7 Afaka manome anao ny adiresin’ny toerana voafaritra tsara iray ny mpitan-tsoratry ny kôngregasiôna, raha mila fanazavana momba ny fivoriambe iray ianao.
8 Koa satria natao mba hikarakarana ny toe-javatra ilana fanampiana, vonjimaika ihany, ny Sampan-draharahan’ny Fitsaboana Vonjimaika, noho izany dia manoro hevitra izahay ny mba hitondranao ny aspirinina, ny bandy sy sparadirà, ny fitaovana fifoham-panafody, ny fanafody fandevonan-kanina, ary ny zavatra mitovy amin’izany, raha heverinao fa mety hilainao izany. Raha toa ianao na ny havanao ka manana aretina lehibe toy ny aretim-po, diabeta, na androbe, dia iangaviana ianao hitondra any amin’ny fivoriambe ny fanafody ilaina amin’izany, toy ny hoe any an-tranonao ianao, na any am-panaovana vakansy. Ho fahendrena ny hiarahan’ny mpianakavy iray na ny namana akaiky izay mahafantatra ny toe-javatra, amin’ilay olona marary foana, satria ho tsara toerana indrindra mba hanome ny fanampiana ilaina izany olona izany.
9 Azo inoana fa hisy fahafahana hanao fanambarana tsy ara-potoana, rehefa mandeha any amin’ny fivoriambe sy miverina avy any ianao. Ho vonona ny hizara ny fahamarinana amin’ny hafa ve ianao? Isika rehetra, anisan’izany ny ankizy kely, dia afaka manao izany amin’ny fanolorana taratasy mivalona amin’ny mpivaro-dasantsy, sy ny hafa izay hitanao eny amin’ny lalanao. Hisy fahafahana hametraka gazety, bokikely, na zavatra vita an-tsoratra hafa amin’ny olona liana. Aoka ianao hiomana hanao fanambarana tsy ara-potoana amin’ny olona izay mety tsy ho tratra amin’ny fomba fitoriana mahazatra kokoa.
Mandritra ny fivoriambe
10 Isan’andro dia ho azo idirana ny toeram-pivoriambe amin’ny valo ora maraina. Ireo havanao akaiky na ny olona miray fiara aminao ihany no azonao amandrihana toerana. Hisy toerana tsy mampananosarotra hatokana ho an’ireo rahalahy sy anabavy be taona, ary hisy faritra hatokana ho an’ny kilemaina. Tsy hety ny hanokanana efitrano manokana any amin’ilay toeram-pivoriambe ho an’ireo izay manana aretina mitaiza sy tsy fahazakan-javatra. Isan’andro, rehefa miala eo amin’ny toeranao ianao, dia iangaviana mba hijery tsara raha eny aminao daholo ny zavatrao.
11 Hatao batisa amin’ny fivoriambe ve ianao? Amin’ny fotoam-pivoriana ny asabotsy maraina, dia hisy faritra hatokana ho an’ny mpilatsaka hatao batisa, ary hitarika anao ho amin’io toerana io ny mpikarakara ny mpanatrika. Raha mbola azo atao koa, dia iangaviana ianao mba hipetraka eny, alohan’ny hanombohan’ny fotoam-pivoriana. Ento ny Baibolinao, ny fihirananao, ny lamba famaohanao, ary fitafiana fitondra milomano maotina, sy matevina tsara, satria ny akanjo manify dia mampiharihary ny vatana rehefa lena. Tsy mety amin’ny fisehoan-javatra manan-kaja toy ny batisa ny pataloa jinina notapahina sy ny akanjo ambony tiserta misy teny faneva. Ireo loholona izay miara-mandinika ireo fanontaniana ao amin’ny boky Ny Fanompoantsika amin’ny mpilatsaka atao batisa, dia tokony hahazo antoka fa mahatakatra ireo hevitra ireo ny tsirairay aminy. Koa satria mariky ny fanoloran-tenan’ny olona iray amin’i Jehovah Andriamanitra ny batisa, dia tsy hety ny hifampitantanan’ny mpilatsaka atao batisa eo am-panaovana batisa azy ireo.
12 Azonao atao ny mampiasa fakan-tsary, caméscopes, ary magnétophones any amin’ny fivoriambe. Kanefa ny toeran’izy ireny na ny fampiasana azy dia tsy tokony hanakantsakana ny lalan’ny olona, hanakona ny fahitan’ny hafa, na hanelingelina ny saina tsy ho amin’ilay fandaharana. Tsy maintsy mahaleo tena izy ireny, izany hoe tsy ampifandraisina amin’ny fanamafisam-peon’ny fivoriambe.
13 Noho ny fotoana sy ny fanatsorana, dia nangatahin’ny Fikambanana isika mba hitondra ny sakafontsika isan’andro eny amin’ny fivoriambe. Nanaraka io toromarika io ny ankamaroan’ireo rahalahy, ary nahita fa tamin’ny fiatoana tamin’ny antoandro, dia afaka niara-nipetraka tamin’ny fianakaviany izy ireo ary nihinana izay nentiny ho an’ilay andro. Maro no nilaza fa nahafinaritra ny fahafahana niala sasatra kely nandritra ny fiatoana tamin’ny antoandro sy ny fiaraha-nandany fotoana fanampiny tamin’ireo rahalahiny sy anabaviny. Izany dia mitaky ny hividianana sakafo sy zava-pisotro alohan’ny fotoana sy ny hametrahana azy ireo ao anaty fitoerana na vata fampangatsiahana kely izay azo atao ao ambany seza. Mangataka ny mpanatrika rehetra izahay mba hanaraka io toromarika io. Tato ho ato, dia nahamarika rahalahy sasany nandao ny faritry ny fivoriambe mba hividy sakafo tany amin’ny hotely kely teo, ireo mpikarakara trano sy ireo mpivarotra sakafo teo amin’ny manodidina. Ny sasany amin’ireo mpivarotra sakafo eo amin’ny toerana fanaovana fivoriambe izao dia mangataka ny hamelana azy ireo hanokatra ny fivarotany sakafo ho an’ireo solontena manatrika ny fivoriambentsika. Raha navela hatao izany, dia ho olon’izao tontolo izao maro no hifangaro amintsika mandritra ilay andro. Afa-tsy izany koa, dia hiverina indray ny fitangoronana sy ny laharana lava be manodidina ireo toeram-pivarotana, ka hanelingelina ilay rivo-piainana milamin’ny fivoriambentsika. Noho izany, dia mangataka ny tsirairay izahay mba hiezaka hitondra ny sakafony sy ny zava-pisotrony isan’andro any amin’ny fivoriambe. Tokony hitondra ny sakafony koa ireo olona liana miaraka aminao any amin’ny fivoriambe. Tsy azo atao ny mitondra tavoahangy sy zava-pisotro misy alkaola any amin’ny toerana hanaovana fivoriambe.
14 Afaka manolo-tena mba hanampy amin’ny fanadiovana ilay toerana ve ianao aorian’ny fotoam-pivoriana isan’andro? Sa, afaka miasa ao amin’ny iray amin’ireo sampan-draharaha hafa ao amin’ny fivoriambe? Raha afaka manampy ianao, dia iangaviana mba ho tonga ao amin’ny Sampan-draharahan’ny Fanompoana An-tsitrapo any amin’ny fivoriambe. Asaina miara-miasa amin’ny rainy na ny reniny na ny olon-dehibe hafa mahay mandray andraikitra, ny ankizy latsaka ny 16 taona. Mazava ho azy fa afaka mandray anjara amin’ny fanadiovana ilay toerana ny rehetra, ka hijery raha voatsimpona sy voary tsara ny fako rehetra.
15 Nahazo toro lalana tsara dia tsara isika momba ny fitafiana sy ny fisehoana ankapobe mifanentana amin’ny fivoriambentsika. Ohatra: Manana toromarika momba io raharaha io isika ao amin’ny takelaka fanampiny amin’ny Fanompoantsika Ilay Fanjakana, manana sary isan-karazany isika ao amin’ny bokintsika sy ny gazetintsika, ary ny zava-dehibe indrindra, dia manana izay lazain’i Jehovah ao amin’ny Baiboly isika. (Rom. 12:2; 1 Tim. 2:9, 10). Fantatry ny olona hoe iza isika, sy hoe nahoana isika no tonga mivory eo amin’ny tanànany. Araka izany, dia fanaovana fanambarana mahery ny fitafiantsika sy ny fisehoantsika ankapobe. Mamela ohatra tsara amin’io lafiny io ny ankamaroan’ny vahoakan’i Jehovah. Indraindray anefa, dia hita taratra eo amin’ny fitafiana sy ny fisehoana ankapoben’ny sasany izay manatrika ny fivoriambentsika ny toe-tsain’izao tontolo izao. Ny fitafiana mampihanjahanja rehetra, dia mampisy fisalasalana ny amin’ny filazan’ilay manao azy fa olona araka ny fanahy ny tenany. Tena manintona ny fisehoana ivelany maotona sy madio ary milamina. Tokony hanisy fiheverana ny amin’izay akanjo kasain’ny mpianakaviny hanaovana àry ny loham-pianakaviana. Hihatra koa izany rehefa eny ivelan’ny toerana fanaovana fivoriambe isika. Ny fanaovana ny insigne-ntsika aloha sy aorian’ny fotoam-pivoriana dia fomba hafa koa hampifandraisana antsika amin’i Jehovah sy ny vahoakany madio. — Ampitahao amin’ny Marka 8:38.
16 I Solomona Mpanjaka hendry dia nahazo tsindrimandry hilaza fa “miraikitra amin’ny fon’ny zaza ny hadalana”, ary ny “zaza aranana mampahamenatra ny reniny”. (Ohab. 22:15; 29:15). Nandritra ireo fotoam-pivoriana, dia nisy Vavolombelona tanora kokoa tsy voara-maso nitondra fanelingelenana an’ireo rahalahy sy anabavy izay niezaka nandray soa avy tamin’ny fandaharana. Koa satria ampamoahina eo anatrehan’i Jehovah ny ray aman-dreny noho ny fitondran-tenan’ireo zanany, dia afaka mahazo antoka ny reny iray na ny ray iray fa tsy hitondra tena tsara sy tsy hihaino ny fampianaran’i Jehovah ny ankizy raha tsy rehefa miara-mipetraka aminy ihany. Ny mpikarakara ny mpanatrika dia hanatona izay rehetra mahatonga fanelingelenana, ary hangataka azy ireny mba hampitsahatra izany, ka hampahatsiahy azy ireny amin-katsaram-panahy mba hihaino tsara ny fandaharana.
17 Noho isika miaraka amin’ny olona maro be eny amin’ny fivoriambentsika, dia fahendrena ny maneho fitandremana ny amin’ny ankizy sy ny fananana. Fanomezana sarobidy avy amin’i Jehovah ny zanatsika. Fantatsika anefa fa izao tontolo izao dia manome taratry ny toetran’i Satana tia miremby. Noho izany, dia fantaro hoe aiza ny zanakao amin’ny fotoana rehetra. Afa-tsy izany koa, dia tokony ho eny aminao amin’ny fotoana rehetra na fakan-tsary na poketra na zavatra sarobidy, fa tsy havela eo amin’ny toeranao. Ataovy azo antoka fa mihidy lakile ny fiaranao, ary ataovy ao amin’ny fitoeran’entana ao aoriana ny fanananao, na ento miaraka aminao. Hampihena ny fakam-panahy hamakian’ny olona ny fiaranao izany.
18 Ny Sampan-draharaha Momba ny Filasiana eo an-toerana dia maniry hanampy anao raha misy zava-manahirana momba ny toerana ilasianao. Iangaviana ianao mba hampahafantatra amin’ny Sampan-draharaha Momba ny Filasiana izay zava-manahirana rehetra raha mbola ao amin’ny fivoriambe ianao. Ho faly hanampy hanao mba handamina ilay raharaha ireo rahalahy mba hahafahanao hanohy hankafy ny fivoriambe.
19 Mampahery ny mahita rahalahy sy anabavy mandray an-tsoratra mandritra ireo fotoam-pivoriana amin’ny fivoriambe. Hanampy anao hifantoka sy hampahatsiahy ny hevi-dehibe ao an-tsainao ny fandraisana an-tsoratra fohy. Hamela anao hisaintsaina ireo hevitra nisongadina tamin’ny fivoriambe mba tsy hanadinoana azy ireny, ny fijerenao indray ny fandraisana an-tsoratrao miaraka amin’ny fianakavianao na ny namanao.
20 Nampiseho fahalalahan-tanana foana ny vahoakan’i Jehovah tamin’ny fanaovany fanomezana ho an’ny zava-kendrena teôkratika. (Eks. 36:5-7; 2 Tant. 31:10; Rom. 15:26, 27). Ny fanomezana an-tsitrapo nataonao ho an’ny asa maneran-tany dia ampiasaina mba hisahanana ny lany mifandray amin’ny fanofana ireo toerana lehibe anaovana ny fivoriambe. Raha atao amin’ny alalan’ny seky ny fanomezanao, dia mba ataovy amin’ny anaran’ny “FI.MPI.BA.MA” aza fady.
21 Araka ny Amosa 3:7, dia nilaza i Jehovah fa ‘tsy manao na inona na inona izy, raha tsy milaza ny heviny amin’ny mpaminany mpanompony’. Amin’ny maha “Mpampiseho zava-miafina” azy, i Jehovah dia nandrakitra an-tsoratra tao amin’ny Baiboly faminaniana an-jatony maro izay tanteraka tamin’ny fomba marina sy tamin’ny fomba feno. (Dan. 2:28, 47). Mbola misy fampanantenana lehibe hotanterahina. Ny fivoriambe 1999 “Ny Teny Ara-paminanian’Andriamanitra” dia hanatanjaka ny finoanao ny fampanantenan’Andriamanitra. Henoy amim-pitandremana ny tenin’i Jehovah ho anao. Ampiharo izay ho hitanao sy renao — eny amin’ny fanompoana, sy any amin’ny kôngregasiôna, ary eo amin’ny fiainanao manokana. Mivavaka izahay mba homba ny fandaharana rehetra ataonao mba hanatrehana amin’ny andro rehetra amin’io hanim-pito loha ara-panahy io, ny fitahian’i Jehovah manana amby ampy!
[Teny notsongaina, pejy 3]
Manaova fandaharana mialoha mba hanatrehana fivoriambe ny zoma, ny asabotsy, ary ny alahady!