Mivoha ho Anao ve Izao ny Varavarana ho An’ny Fanompoan’ny Mpisava Lalana?
1 Ny andinin-teny ho an’ny taona 1999 dia mampahatsiahy antsika fa mbola ao anatin’ny ‘andro famonjen’i’ Jehovah isika izao. (2 Kor. 6:2). Hifarana tsy ho ela anefa io andro famonjeny io. Avy eo dia hanomboka ny ‘andro fitsarany’ (2 Pet. 2:9). Raha mbola manohy manitatra ny fahafahan’ny olombelona hahazo famonjena i Jehovah, dia mampientam-po erỳ ny mahita olona mihamaro hatrany mandray tsara!
2 Nisikina herim-po hiatrika ilay zava-tsarotra entin’ny fanatratrarana ireny olona mandray tsara ireny, ny vahoakan’i Jehovah, dieny mbola tsy diso aoriana loatra. Noho izany dia mpitory ilay Fanjakana maro no nirotsaka tao amin’ny fanompoan’ny mpisava lalana. Mivoha ho anao ve izao ny varavarana ho an’ny fanompoan’ny mpisava lalana? Nahoana izahay no manontany izany?
3 Teny maneho fankasitrahana: Araka ny voalaza tao amin’ny Fanompoantsika Ilay Fanjakana Janoary 1999, dia samy nahena ny ora takina amin’ny mpisava lalana maharitra sy mpanampy. Mba hahafenoana ilay fepetra vaovao, ny mpisava lalana maharitra dia mila manokana 70 ora eo amin’ny fanompoana isam-bolana, ka ho 840 ora ny tontaliny isaky ny taom-panompoana. Ny mpisava lalana mpanampy kosa dia handany 50 ora eo amin’ny fanompoana isam-bolana. Indreto ny sasantsasany tamin’ireo fanehoam-pankasitrahana maro be voaray, ho vokatr’ireo fanitsiana ireo:
“Izany ka fanomezana ombam-pitahiana avy amin’ilay Raintsika any an-danitra!”
“Tsy hita izay teny afaka mampita ny fifaliana sy ny fitiavana ary ny fankasitrahana noho io fandaharana io!”
“Hahatonga ny fandaharam-potoananay ho mora arahina kokoa izy io!”
“Mivavaka izahay mba ho maro lavitra ny isan’ireo hirotsaka hanao ny fanompoana manontolo andro izao, ka hahazo ny fitahiana entin’ny fanompoana an’i Jehovah amin’ny fomba miitatra.”
4 Arakaraka ny anatonantsika ny fara tampon’ilay andro famonjen’Andriamanitra, dia miharihary fa irin’i Jehovah ny hanaovan’ny vahoakany hiakam-piderana mahery farany. Nihaniitatra sy nihanahery io hafatra io 1) noho ny fitomboan’ny isan’ny mpitory ilay Fanjakana hatrany, ary 2) noho ny fiezahan’ny tsirairay hampitombo izay azony atao eo amin’ny fitoriana ilay Fanjakana. I Jehovah, ilay “mampitombo”, dia nanao izay hahombiazan’ireo rehetra nanaiky famonjena haneho fahazotoana manolo-tena. — 1 Kor. 3:6, 7; Sal. 110:3.
5 Aza diso ny zava-kendren’izy io: Momba io andro famonjen’i Jehovah io no nananaran’i Paoly toy izao an’ireo Kristianina tahaka azy: “Amin’ny fiaraha-miasa [amin’i Jehovah], dia miangavy anareo izahay mba tsy hanaiky ny hatsaram-panahin’Andriamanitra amin’izay tsy mendrika akory nefa ho diso ny zava-kendren’izy io.” Tsy ho “diso ny zava-kendren’izy io” isika raha toa heverintsika ho ‘fotoana fankasitrahana’ izy io mba hiasana ho famonjena ny hafa, isaky ny misy fahafahana hanao izany. (2 Kor. 6:1, 2, NW). Vao mainka mampiseho fahadodonana bebe kokoa ireo tenin’i Paoly ireo, amin’izao andro izao. Ireo Kristianina izay maneho fitiavana amim-pahatsorana an’i Jehovah dia mihevitra ho tombontsoa ny fandraisana anjara feno araka izay azo atao amin’ny fanompoana nanendreny azy ireo. Moa ve ianao izao afaka mandray anjara feno kokoa amin’ny fanompoana amin’ny maha mpisava lalana maharitra anao?
6 Tanjona antonony izany: Eto Madagasikara, ny tanjontsika dia ny hahita mpisava lalana maharitra 1 300 hiditra an-tsehatra amin’ny 1 Septambra. Mino izahay fa tanjona antonony sady azo tratrarina izany. Nahoana izahay no matoky aoka izany? Tamin’ny Martsa 1997 izahay dia nahita rahalahy sy anabavy 815 nanao ny asan’ny mpisava lalana mpanampy, ary tamin’ny Aprily 1998 dia 957 no nanao toy izany. Namerina tatitra 60 ora ny ankamaroany, izany hoe 10 ora monja no tsy nahatratrarany ilay ora vaovao takina amin’ny mpisava lalana maharitra! Na dia 130 monja amin’ireo nanao ny asan’ny mpisava lalana mpanampy aza no mirotsaka ho mpisava lalana maharitra alohan’ny faran’ity taom-panompoana ity, dia ho afaka hanomboka ny volana Septambra amin’ny mpisava lalana manontolo andro 1 300 na mihoatra isika!
7 Ilaina ny fandaharam-potoana: Mbola hitanao ho somary sarotra tratrarina ihany ve ny 70 ora eo amin’ny fanompoana isam-bolana? Angamba ny 17 ora isan-kerinandro no tsara hoeritreretina. Amin’ny fampiasana ireo fandaharam-potoana samy hafan’ny mpisava lalana maharitra eo amin’ny pejy manaraka, dia manandrama manamboatra fandaharam-potoanan’ny mpisava lalana maharitra izay hety amin’ny tarehin-javatra misy anao. Eo am-pandaminana io fandaharam-potoananao io, dia miresaha amin’ny mpisava lalana za-draharaha mba hahazoana ny toroheviny ny amin’ny fomba ampifandanjany ny fanompoan’ny mpisava lalana sy ireo andraikiny ara-pianakaviana. Anontanio ny mpiandraikitra ny fizaran-taninareo ny amin’ny fomba andaharan’ireo mpisava lalana ao amin’ny fizaran-tany ny asa fanompoan’izy ireny isan-kerinandro. Avy eo dia miantehera amin’i Jehovah mba hitahiany ny fandaharana mialoha ataonao mba ho mpisava lalana. — Ohab. 16:3.
8 Ataovy tetik’asam-pianakaviana ilay izy: Efa mba noeritreretinareo ve ny hanao ny asan’ny mpisava lalana ho tetik’asam-pianakaviana? Angamba ho azon’ny fianakavianareo atao ny hipetraka mba handinika ny fomba mety hahafahan’ny iray na roa amin’ny mpianakavy hanao ny asan’ny mpisava lalana — amin’ny fanaovana fandaharana mialoha amim-pitandremana sy fiaraha-miasa tsara. Mora takatra raha hitan’ny sasany fa tsy mamela azy ireo ho mpisava lalana maharitra dieny izao ny tarehin-javatra misy azy, rehefa nodinihina tamim-pahatsorana. Raha izany no izy, dia ataovy tanjona amin’ny hoavy ny asan’ny mpisava lalana. Kanefa, manandrama manao fandaharana mba hamerana daty iray voafaritra tsara hanombohana hanao ny asan’ny mpisava lalana. Angamba ianao ho afaka ho mpisava lalana mpanampy imbetsaka mandritra ny taona, mba hanatratrarana tsikelikely ilay tanjona, dia ny fanompoan’ny mpisava lalana maharitra.
9 Isan-karazany ny tarehin-javatra misy ireo mpisava lalana maharitra 1 279 eo amin’ny lisitra ankehitriny eto Madagasikara. Tsy ary salama tsara avokoa izy rehetra, ary manana adidy ara-pianakaviana sy ara-bola ny ankamaroany. Mpisava lalana 145 no mihoatra ny 50 taona, ary 31 no mihoatra ny 65 taona. Mpitovo ny 811, ary 20 taona na latsaka ny 107. Sahabo ho ny ampahatelon’ny mpisava lalana rehetra dia rahalahy, ary manana andraikitra ara-pianakaviana sy andraikitra ao amin’ny kôngregasiôna ny ankamaroany. ‘Manararaotra ny andro azo anaovan-tsoa’ izy rehetra ireny, mba ho mpisava lalana, ka tamin’izany ny maro taminy dia nanaraka fiainana tsotra kokoa, nefa nahafa-po kokoa. — Kol. 4:5.
10 Mila manao fanatsorana ve ianao?: Ny fanatsorana ny fiainanao no mety ho ny fanalahidy hanokatra ny varavarana ho an’ny asan’ny mpisava lalana. Moa ve ny fiainanao sahala amin’ny trano lehibe iray izay misy efitra sy fanaka maro tsy ilaina, kanefa mitaky fotoana sy vola ary asa be ny fikarakarana azy? Raha izany no izy, dia mety hamela anao hanao ny asan’ny mpisava lalana ny fizàrana amin’ny tarehin-javatra tsotra kokoa. Afaka mampihena ny fotoana laninao amin’ny asa fivelomana ve ianao? Afaka maka fotoana avy amin’ny asa tsy dia ilaina firy ve ianao, na koa maneho fahaiza-mandanjalanja bebe kokoa raha ny amin’ny fotoana lany amin’ny fialam-boly?
11 Mananatra antsika toy izao ny Baiboly, ao amin’ny 1 Timoty 6:8: “Raha manan-kanina sy fitafiana isika, dia aoka hianina amin’izany.” Raha mianina amin-javatra kely kokoa isika, izany dia lafin-javatra lehibe eo amin’ny fanaovana izay farany azontsika atao eo amin’ny fanompoana an’i Jehovah, sady manamora ny fanomezantsika ny laharam-pahamehana ho an’ny tombontsoa ara-panahy. (Matio 6:22, 33). Eo amin’ny pejy faha-104 amin’ny Diary 1998, ao amin’ny tatitra momba an’i Japon, dia misy tolo-kevitra maromaro mahakasika ny antony isian’ny toe-tsain’ny mpisava lalana tsara dia tsara any amin’io tany io. Diniho ity iray ity: “Mazàna no tsotra dia tsotra ny tokantrano japoney, ka tsy mitaky fotoana firy ny fikarakarana azy, ary amin’ny ankamaroany, dia zatra mihazona ny fiainany ho tsotra ny olona.” Moa ve tsy izany ny hevitra fototry ny 1 Timoty 6:8?
12 Manerana ny tany, dia mihamahery hatrany ny fitoriana ataon’ny mpanompon’Andriamanitra, alohan’ny hifaranan’ilay andro famonjen’i Jehovah. Mendri-piderana fa efa ho 700 000 tamin’ny antsalany, tamin’ny herintaona, no nandray anjara tamin’ny endri-panompoan’ny mpisava lalana, isam-bolana. Afaka mandamina ny fiainanao ve ianao mba hanatevin-daharana azy ireny? Manasa anao izahay handinika amim-pitandremana sy ao amin’ny vavaka ny tarehin-javatra misy anao, rehefa hamaly izao fanontaniana izao ianao: “Mivoha ho anao ve izao ny varavarana ho an’ny fanompoan’ny mpisava lalana?”
[Teny notsongaina, pejy 3]
TANJONA: MPISAVA LALANA MAHARITRA 1 300!
[Efajoro, pejy 4]
Fandaharam-potoana Samy Hafan’ny Mpisava Lalana Maharitra
Ilaina: 17 ora isan-kerinandro
Andro Roa Amin’ny Ankobanandro sy Alahady
Andro Ora
Zoma 8
Asabotsy 6
Alahady 3
Tontalin’ny Ora: 17
Andro Telo Amin’ny Ankobanandro
Andro Ora
Talata 7
Alakamisy 7
Asabotsy 3
Tontalin’ny Ora: 17
Andro Telo Amin’ny Ankobanandro sy Alahady
Andro Ora
Alatsinainy 5
Alarobia 5
Zoma 5
Alahady 2
Tontalin’ny Ora: 17
Takariva Roa sy Faran’ny Herinandro
Andro Ora
Alatsinainy 3
Alarobia 3
Asabotsy 8
Alahady 3
Tontalin’ny Ora: 17
Manamboara Fandaharam-potoanan’ny Mpisava Lalana Maharitra ho An’ny Tenanao
Andro Ora
Alatsinainy
Talata
Alarobia
Alakamisy
Zoma
Asabotsy
Alahady
Tontalin’ny Ora: 17