Ho Tanteraka Avokoa ny Teny Ara-paminanian’Andriamanitra!
1 Efa liana foana tamin’ny faminaniana ao amin’ny Baiboly ny Vavolombelon’i Jehovah. Koa nientam-po isika nahafantatra fa ny foto-kevitry ny fivoriamben’ny distrika tamin’ity taona ity dia hoe “Ny Teny Ara-paminanian’Andriamanitra”. May ny hahalala izay ‘sakafo amin’ny fotoana mety’, notahirizin’i Jehovah ho antsika, isika. (Matio 24:45, NW). Tsy nandiso fanantenana antsika izy.
2 Hevitra nisongadina tamin’ilay fivoriambe: Ny lahateny fototra ny zoma hoe “Manehoa Fitandremana ny Teny Ara-paminanian’Andriamanitra”, dia nanome fahazavana ara-panahy ny amin’ny fitantarana momba ny fiovan-tarehy. (Matio 17:1-9). Nohamafisiny fa amin’izao isika miteny izao, dia eo an-tokonan’ny fotoana tsara indrindra isika, satria efa tena lasa lavitra dia lavitra ao anatin’ny fotoan’ny farany, ary efa eo anoloantsika ny fandehan-javatra vaovao! Ny fomba lehibe iray izay ilantsika hanehoana fitandremana ny Tenin’Andriamanitra, dia amin’ny famakiana azy io tsy tapaka. Ilay fitohitohizan-dahateny hoe “Mahità Fahafinaretana avy Amin’ny Famakiana ny Tenin’Andriamanitra” dia nanome fanoloran-kevitra azo ampiharina mba handraisantsika soa sy fahafinaretana kokoa amin’ny famakiantsika Baiboly.
3 Ny asabotsy tolakandro isika dia nijery antony tokony hampiaiky antsika fa miaina amin’ny andro farany isika. Tadidinao ve izany rehetra izany? Ny alahady maraina, dia nanjary toy ny tantara velona ny faminanian’i Habakoka, rehefa nahafantatra isika fa misy itoviana betsaka amin’ny androny ny androntsika, ary tsy ho ela dia hisy fisehoan-javatra lehibe ho tonga, rehefa handringana ny ratsy, sy hamonjy ny marina, i Jehovah. Azonao ve ny hevitr’ilay fampisehoana tantara ara-baiboly momba an’i Jakoba sy i Esao? Tsy maintsy manao zavatra mba hikatsahana fitahiana avy amin’i Jehovah isika, ka hanohitra ny toe-tsaina mampiseho tsy firaharahana sy tsy firaikana.
4 Boky vaovao mahavariana: Nientam-po mihitsy isika nandray ilay boky vaovao hoe Diniho ny Faminanian’i Daniela! Tsy isalasalana fa efa namaky io boky mitana tanteraka ny saina io ianao. Nilaza toy izao ilay mpandahateny namoaka io boky io: “Ankoatra ny tsipiriany sasantsasany, dia efa tanteraka avokoa ny faminaniana rehetra ao amin’ny bokin’i Daniela.” Moa ve izany tsy manamafy fa mahadodona ny fotoana iainantsika?
5 Ny fandaharan’ny fivoriambe dia tena nanatanjaka ny fiekentsika fa ho tanteraka ny fampanantenan’Andriamanitra rehetra mbola tsy tanteraka. Nahazo tosika isika mba hanohy hanambara amin’ny hafa ny teny ara-paminanian’Andriamanitra!